សង្គ្រាមអ៊ុយក្រែន ៖ ក្នុងពេលជួបពិភាក្សាគ្នាតាមទូរស័ព្ទជាថ្មីទៀត កាលពីថ្ងៃទី៣ កក្កដា អស់ពេលប្រមាណ១ម៉ោង ប្រធានាធិបតីរុស្ស៊ីលោកវ្ល៉ាឌីមៀរពូទីន គូសបញ្ជាក់ប្រាប់ដល់សមភាគីអាមេរិកលោកដូណាល់ត្រាំថា លោកនឹងមិនបោះបង់ចោលឡើយបណ្ដាទិសដៅរបស់លោកក្នុងសង្គ្រាមនៅអ៊ុយក្រែន ។…
សង្គ្រាមអ៊ុយក្រែន ៖ ក្នុងពេលជួបពិភាក្សាគ្នាតាមទូរស័ព្ទជាថ្មីទៀត កាលពីថ្ងៃទី៣ កក្កដា អស់ពេលប្រមាណ១ម៉ោង ប្រធានាធិបតីរុស្ស៊ីលោកវ្ល៉ាឌីមៀរពូទីន គូសបញ្ជាក់ប្រាប់ដល់សមភាគីអាមេរិកលោកដូណាល់ត្រាំថា លោកនឹងមិនបោះបង់ចោលឡើយបណ្ដាទិសដៅរបស់លោកក្នុងសង្គ្រាមនៅអ៊ុយក្រែន ។ នេះបើតាមទីប្រឹក្សាការទូតរុស្ស៊ីលោកអ៊ីអ៊ូរីអ៊ូឆាកូវ ។
ទិសដៅនោះរបស់លោកពូទីនគឺលុបបំបាត់ចោលបណ្ដាមូលហេតុសំខាន់ដែលនាំឲ្យកើតមានសភាពការណ៍បច្ចប្បន្ន ។ នៅមុខអ្នកកាសែតជាច្រើនលោកអ៊ីអ៊ូរីអ៊ូឆាកូវបញ្ជាក់ថា លោកពូទីនគូសបញ្ជាក់ពីឆន្ទៈរបស់ភាគីរុស្ស៊ី បន្តដំណើរការនៃការចរចា ដែលចាប់ផ្ដើមនៅក្រុងអ៊ីស្តង់ប៊ុល ដែលមានការចរចាដោយផ្ទាល់រវាងរុស្ស៊ី និងអ៊ុយក្រែន២លើករួចមកហើយ តែទទួលបានផលតិចតួចបំផុត។ ចំណែកប្រធាចនាធិបតីអាមេរិកវិញ បានប្រាប់សារព័ត៌មាននាយប់ថ្ងៃទី៣កក្កដាថា មិនមានការរីកចម្រើនអ្វីឡើយ ក្រោយការជួបនិយាយគ្នាតាមទូរស័ព្ទជាមួយលោកពូទីន។
ភាគីរុស្ស៊ីចាត់ទុកការជួបនិយាយគ្នាតាមទូរស័ព្ទលើកទី៦នោះ រវាងមេដឹកនាំទាំង២ថាត្រង់ទៅត្រង់មក។ ការជួបគ្នាតាមទូរស័ព្ទនេះធ្វើឡើង បន្ទាប់ពីអាមេរិកផ្អាកការបញ្ជូនអាវុធមួយចំនួនដល់អ៊ុយក្រែន។ រឿងនោះមិនត្រូវបានលើកមកនិយាយក្នុងការជួបគ្នាតាមទូរស័ព្ទ រវាងលោកពូទីននិងលោកត្រាំឡើយ។ លោកត្រាំថ្លែងកាលពីថ្ងៃទី៣កក្កដាថា អាមេរិកបានផ្ដល់អាវុធច្រើនពេកហើយដល់អ៊ុយក្រែន ក្រោមរដ្ឋការមុនរបស់លោកចូបៃដិន។
នោះជាការធ្វើអត្ថាធិប្បាយជាសាធារណៈដំបូងរបស់លោក ពីការផ្អាកលែងផ្ដល់អាវុធមួយចំនួនដល់ក្រុងគៀវ ពិសេសបណ្ដាមីស៊ីលការពារអាកាសនិងកាភ្លើងធំព្រមទាំងគ្រាប់ផ្លោង ខណៈរុស្ស៊ីបង្កើនការវាយលុក។ ថ្លែងទៅកាន់ក្រុមអ្នកកាសែតមុនពេលលោកឡើងយន្តហោះប្រធានាធិបតីទៅកាន់រដ្ឋអៃយ៉ូវ៉ាលោកត្រាំថ្លែងថា អតីតប្រធានាធិបតីលោកចូបៃដិន បានឲ្យគេយកចេញអស់ពីស្តុកបណ្ដាអាវុធ ហើយពេលនេះយើងត្រូវបំពេញស្តុកវិញ ឲ្យបានគ្រប់គ្រាន់សម្រាប់យើងផ្ទាល់។ បណ្ដាមីស៊ីលការពារអាកាស កាំភ្លើងធំបាញ់ច្បាស់ចំគោលដៅនិងអាវុធដទៃៗទៀតស្ថិតក្នុងចំណោមអាវុធដែលយើងលែងផ្ដល់ដល់អ៊ុយក្រែនទៀត។ លោកក៏លើកដែរថា អាមេរិកមិនអាចបំពេញជំនួយអាមេរិកដល់អ៊ុយក្រែនឡើយ។
រុស្ស៊ីបន្តវាយប្រហារខ្លាំងលើអ៊ុយក្រែន
មនុស្សយ៉ាងតិច៨នាក់ស្លាប់និងប្រមាណ១០នាក់ទៀតរងរបួស ក្នុងការវាយប្រហារជាច្រើនរបស់រុស្ស៊ីកាលពីថ្ងៃទី៣ កក្កដា លើអ៊ុយក្រែន។ នេះបើតាមអាជ្ញាធរអ៊ុយក្រែន។ ការវាយប្រហារថ្មីៗរបស់រុស្ស៊ីធ្វើលើទីក្រុងអូដេសា ប៉ុលតាវ៉ានិងជិតទីក្រុងដូណេតស្ក៍។ បណ្ដាហេដ្ឋារចនាសម្ព័ន្ធកំពង់ផែរងការខូចខាតក៏ដូចជាមជ្ឈមណ្ឌលជ្រើសរើសទ័ពមួយ ។
ចំណែកកងទ័ពអ៊ុយក្រែនវិញប៉ុនប៉ងវាយប្រហាររុស្ស៊ីដោយដ្រូន ក្នុងទឹកដីរុស្ស៊ីដោយផ្ទាល់ដែរបណ្ដាលឲ្យមនុស្សម្នាក់ស្លាប់នៅក្រុងលីពីតស្ក៍ ចម្ងាយប្រមាណ៤០០គីឡូម៉ែត្រនាភាគអាគ្នេយ៍ក្រុងមូស្គូ។ ដ្រូនអ៊ុយក្រែនក៏បណ្ដាលឲ្យមានភ្លើងឆាបឆេះក្នុងទីតាំងសហគ្រាសមួយនៃទីក្រុងឡឺឡែតក្នុងតំបន់លីពីតស្ក៍ កន្លែងដែលមានប្លុកឧស្សាហកម្មជាច្រើន តែមិនបណ្ដាលឲ្យមានជនរងគ្រោះឡើយ៕
ចែករំលែកព័តមាននេះ