សហរដ្ឋអាមេរិក ៖ ប្រធានាធិបតីអាមេរិក លោកដូណាល់ត្រាំ និងមហាសេដ្ឋីលោកអេឡុន ម៉ាសក៍ ដែលជួយលោកត្រាំក្នុងការបោះឆ្នោតប្រធានាធិបតី បានបញ្ចេញសង្គ្រាមពាក្យសម្ដីនិងហែកហួរគ្នាជាថ្មីទៀតហើយ។ លើកនេះថៅកែក្រុមហ៊ុនTESLA និងបណ្ដាញសង្គមX…
សហរដ្ឋអាមេរិក ៖ ប្រធានាធិបតីអាមេរិក លោកដូណាល់ត្រាំ និងមហាសេដ្ឋីលោកអេឡុន ម៉ាសក៍ ដែលជួយលោកត្រាំក្នុងការបោះឆ្នោតប្រធានាធិបតី បានបញ្ចេញសង្គ្រាមពាក្យសម្ដីនិងហែកហួរគ្នាជាថ្មីទៀតហើយ។ លើកនេះថៅកែក្រុមហ៊ុនTESLA និងបណ្ដាញសង្គមX បានហៅលោកត្រាំជាអតីតសម្ព័ន្ធមិត្តថា ជាជ្រូកគន្ធាត់ហើយពិតណាស់លោកត្រាំក៏តបតវិញដែរ។
តាមមើលទៅជម្លោះរវាងលោកត្រាំនិងលោកអេឡុន ម៉ាសក៍ កាន់តែធ្វើឲ្យអនាគតរបស់TESLAរងការគំរាមកំហែងកាន់តែខ្លាំងជាងពេលណាៗទាំងអស់។ តើមកពីអ្វីទៅ? គម្រោងច្បាប់ថវិកាថ្មីរបស់លោកត្រាំដែលកាត់បន្ថយការចំណាយដ៏ច្រើន ពិតជាវិធានការមួយក្នុងចំណោមវិធានការ ដែលនាំឲ្យលោកអេឡុន ម៉ាសក៍មានការខ្លាច ដែលនោះជាការលុបចោលឥណទានសម្រាប់ទិញរថយន្តអគ្គិសនី។ បច្ចុប្បន្នរដ្ឋការអាមេរិកបានជួយប្រាក់៧៥០០ដុល្លារសម្រាប់ទិញរថយន្តអគ្គិសនីថ្មីមួយគ្រឿង និងជួយ៤០០០ដុល្លារសម្រាប់ការទិញរថយន្តអគ្គិសនីមួយទឹកមួយគ្រឿង។
ដោយមានបណ្ដាញសង្គមX លោកអេឡុន ម៉ាសក៍ បានសម្រេចធ្វើសង្គ្រាមប្រឆាំងគម្រោងថវិកានោះដោយគំរាមថាលោកនឹងចេញទៅបង្កើតគណបក្សនយោបាយផ្ទាល់ខ្លួនមួយ។ ជម្លោះរវាងអតីតសម្ព័ន្ធមិត្តទាំង២ពេលនេះហាក់កាន់តែទៅឆ្ងាយថែមទៀត។ បន្ទាប់ពីការរិះគន់គ្នាដោយពាក្យធ្ងន់ៗកាលពីថ្ងៃទី១កក្កដាលោកត្រាំអះអាងថា លោកមិនបដិសេធឡើយការបណ្ដេញលោកអេឡុន ម៉ាសក៍ ដែលទទួលបានសញ្ជាតិអាមេរិកកាលពីឆ្នាំ២០០២ និងបញ្ជូនទៅកាន់ប្រទេសដើមវិញគឺអាហ្វ្រិកខាងត្បូង។
ពេលបណ្ដាអ្នកកាសែតសួរលោកពីរឿងនេះលោកត្រាំលើកឡើងថា យើងត្រូវពិចារណាពីរឿងនោះ។ លោកក៏លើកដែរពីលទ្ធភាពប្រើគណៈកម្មាធិការទទួលបន្ទុកប្រសិទ្ធភាពរដ្ឋាភិបាលបង្កើតឡើងសម្រាប់លោកអេឡុន ម៉ាសក៍ ដើម្បីប្រឆាំងនឹងមហាសេដ្ឋីរូបនោះវិញដោយកាត់បន្ថយការចំណាយសហព័ន្ធ តាមរយៈមូលនិធិសាធារណៈដែលវិនិយោគក្នុងបណ្ដាសហគ្រាសរបស់មហាសេដ្ឋីរូបនេះ ពិសេសក្នុងវិស័យអវកាស៕
ចែករំលែកព័តមាននេះ