ខេត្តប៉ៃលិន ៖ រហូតមកដល់ព្រឹកថ្ងៃទី០៦ ខែឧសភា ឆ្នាំ២០២៥ នេះ គេសង្កេតឃើញប្រជាពលរដ្ឋក៏ដូចជាភ្ញៀវទេសចរជាតិ និងអន្តរជាតិធ្វើដំណើរឆ្លងដែនចេញ-ចូលធម្មតានៅក្នុងតំបន់អន្តរជាតិព្រំ ជាប់នឹងព្រំប្រទល់ប្រទេសថៃ ក្នុងភូមិផ្សារព្រំ…
ខេត្តប៉ៃលិន ៖ រហូតមកដល់ព្រឹកថ្ងៃទី០៦ ខែឧសភា ឆ្នាំ២០២៥ នេះ គេសង្កេតឃើញប្រជាពលរដ្ឋក៏ដូចជាភ្ញៀវទេសចរជាតិ និងអន្តរជាតិធ្វើដំណើរឆ្លងដែនចេញ-ចូលធម្មតានៅក្នុងតំបន់អន្តរជាតិព្រំ ជាប់នឹងព្រំប្រទល់ប្រទេសថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បើតាមប្រភពព័ត៌មានពីប្រជាពលរដ្ឋម្នាក់ឈ្មោះ សុខ ម៉េង ភេទប្រុស មានស្រុកកំណើតនៅខេត្តបាត់ដំបងបានរៀបរាប់ឱ្យដឹងថា លោកធ្វើការងារជាកម្មករសំណង់នៅខេត្តរ៉ាក់យ៉ង ប្រទេសថៃ អស់រយៈពេលជាច្រើនឆ្នាំមកហើយ ដោយប្រើលិខិតឆ្លងដែន លុះធ្វើការរហូតដល់ពេលអស់សុពលភាព លោកនិងប្រពន្ធ ក៏បានធ្វើដំណើរមកបន្តសារថ្មីឡើងវិញនៅច្រកទ្វារព្រំដែនទាំងខាងខ្មែរ និងថៃ ។
លោកបន្តទៀតថា រហូតមកដល់ពេលនេះ ការធ្វើដំណើរឆ្លងដែនពីប្រទេសថៃ ចូលមកប្រទេសខ្មែរ មិនមានសភាពការណ៍អ្វីប្រែប្រួលគួរឱ្យកត់សម្គាល់នោះទេ គឺប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ជាពិសេស ពលករអាចធ្វើដំណើរឆ្លងដែនទៅមកដោយរលូន ។
បើទោះបីជាមានសភាពតានតឹងនៅព្រំដែនខាងខេត្តព្រះវិហារ ពាក់ព័ន្ធនឹងបញ្ហាចម្រូង
ចម្រាស់គ្នាជាមួយនឹងភាគីថៃក៏ដោយ។
លោកបញ្ជាក់ទៀតថា បើពិនិត្យមើលទៅសភាពការណ៍ខាងថៃ និងខាងខ្មែរ មិនឃើញមានការតានតឹង ឬមានការរឹតដ្បិតការធ្វើដំណើរនោះទេ ពោលគឺប្រជាពលរដ្ឋទាំងខ្មែរ និងឡាវ ដែលជាពលករព្រមទាំងភ្ញៀវបរទេសចរឆ្លងដែនចូលពីខ្មែរទៅថៃ និងមានអ្នកឆ្លងដែនពីប្រទេសថៃមកប្រទេសកម្ពុជា ក៏នៅតែធ្វើដំណើរធម្មតាគ្មានការភិតភ័តអ្វីឡើយ ។
ចំណែករថយន្តដឹកទំនិញគ្រប់ប្រភេទ និងរថយន្តដឹកកសិផល ទាំងខាងឈ្មួញខ្មែរ និងថៃ ក៏បើកបរចេញចូលទៅមកតាមច្រកទ្វារអន្តរជាតិមួយនេះ ដោយរលូនដែរ គ្មានការរាំងស្ទះអ្វីនោះឡើយ ខណៈដែលអ្នកលក់ដូរនៅតាមដងផ្លូវ ក៏មមារញឹក ក្នុងការប្រកបអាជីវកម្មរបស់ខ្លួន ។
បើតាមប្រភពព័ត៌មានពីមន្ត្រីប្រចាំការនៅច្រកទ្វារអន្តរជាតិព្រំបានរៀបរាប់ឱ្យដឹងដែរថា រហូតមកដល់ពេលនេះ សកម្មភាពឆ្លងដែនរបស់ប្រជាពលរដ្ឋនៅច្រកទ្វារនេះ មានដំណើរការធម្មតាទេ ដោយគ្មានសភាពការអ្វីប្លែកគួរឱ្យកត់សម្គាល់នោះទេ ដោយសមត្ថកិច្ចប្រចាំការនៅបន្តសហការគ្នាជាមួយខាងភាគីថៃក្នុងការទទួលភ្ញៀវឆ្លងដែនចេញចូលទៅមក ដោយមានភាពកក់ក្តៅ ។
ប្រភពបន្តទៀតថា សមត្ថកិច្ចយកចិត្តទុកដាក់តាមតួនាទីរបស់ខ្លួន ក្នុងការពិនិត្យឯកសារ និងលិខិតឆ្លងដែនរបស់ពលរដ្ឋ ដើម្បីកុំឱ្យមានការខ្វះចន្លោះ ដែលនាំឱ្យមានការលំបាកនៅថ្ងៃក្រោយ ៕
ចែករំលែកព័តមាននេះ