ទីក្រុងម៉ូស្គូ៖ ទោះបីកំពុងមានបញ្ហាខ្លួនឯងដោះស្រាយមិនទាន់ចេញក៏ដោយ ក៏លោកពូទីនត្រៀមចូលរួមចំណែកកម្រិតណាមួយដើម្បីដោះស្រាយបញ្ហានុយក្លេអ៊ែររបស់អ៊ីរ៉ង់។ រុស្ស៊ីធ្លាប់ជួយជ្រោមជ្រែងនៅក្នុងបញ្ហានេះរហូតដល់មានកិច្ចព្រមព្រៀងឆ្នាំ២០១៥ (ជំនាន់លោកអូបាម៉ា)។ យោងតាមវិមានក្រឹមឡាំង, នៅក្នុងការសន្ទនាគ្នាតាមទូរស័ព្ទកាលពីយប់មិញ លោកពូទីនថ្លែងប្រាប់លោកត្រាំថាលោកត្រៀមខ្លួនរួចជាស្រេចក្នុងនាមជាសម្ព័ន្ធមិត្តដ៏ជិតស្និទ្ធរបស់អ៊ីរ៉ង់ដើម្បីចរចាគ្នា។
លោកត្រាំថ្លែងក្រោយពេលនិយាយទូរស័ព្ទថាពេលវេលាកាន់តែនៅសល់តិចមែនទែនហើយ។ អ៊ីរ៉ង់ត្រូវតែសម្រេចចិត្តឱ្យបានដាច់ស្រេចនៅក្នុងបញ្ហានេះ។ ត្រាំមានជំនឿថាទោះបីជាសម្ព័ន្ធមិត្តជិតស្និទ្ធរបស់អ៊ីរ៉ង់ក៏ដោយ ក៏រុស្ស៊ីមិនចង់ឃើញអ៊ីរ៉ង់ផលិតអាវុធនុយក្លេអ៊ែរនោះទេ។ លោកថាលោកពូទីនចង់រួមចំណែកចរចាគ្នាជាមួយអ៊ីរ៉ង់។ ដូច្នេះ ត្រាំមានជំនឿថាបើបានដូច្នេះមែនអាចនឹងជួយពន្លឿនការចរចាគ្នា។ គ្រាន់តែថាសម្រាប់ពេលនេះ ត្រាំយល់ថាអ៊ីរ៉ង់ហាក់ដូចជាដើរអូសជើងបន្តិច។
អ្នកនាំពាក្យវិមានក្រឹមឡាំង លោកប៉េស្កូស ថ្លែងថាប្រទេសយើងទាំង២ (អ៊ីរ៉ង់ និងរុស្ស៊ី) ជាដៃគូដ៏ជិតស្និទ្ធនឹងគ្នា។ លោកពូទីនថ្លែងរួចហើយថាលោកនឹងប្រើប្រាស់ភាពជិតស្និទ្ធនេះដើម្បីសម្រេបសម្រួល និងរួមចំណែកនៅក្នុងដំណើរការចរចា (រវាងអាមេរិក និងអ៊ីរ៉ង់) ដែលបាន និងកំពុងបន្ត។ ចំពោះសំណួរថាតើលោកពូទីនអាចចូលរួមនៅពេលណា? លោកប៉េស្កូសថ្លែងថាការសន្ទនាគ្នារវាងម៉ូស្គូជាមួយតេអេរ៉ង់ និងវ៉ាស៊ីនតោនបានចាប់ផ្ដើមជាបណ្ដើរៗហើយតាមរយៈខ្សែរយៈមួយចំនួន។
អគ្គមគ្គុទ្ទេសក៍អ៊ីរ៉ង់ថ្លែងពីម្សិលមិញថាបើសិនតម្រូវឱ្យអ៊ីរ៉ង់លែងចម្រាញ់សារធាតុអ៊ុយរ៉ាញ៉ូម (វិទ្យុសកម្ម) ទាំងស្រុងវានឹងធ្វើឱ្យប៉ះពាល់ផលប្រយោជន៍ជាតិរបស់អ៊ីរ៉ង់។ ថ្លែងដូច្នេះដើម្បីច្រានចោលការទាមទាររបស់អាមេរិកដើម្បីបិទបញ្ចប់ជម្លោះរយៈពេលជាងដប់ឆ្នាំកន្លងទៅនេះ។ សំណើរបស់អាមេរិកបានបញ្ជូនតាមរយៈប្រទេសអូម៉ង់កាលពីថ្ងៃសៅរ៍។ ការចរចាគ្នារវាងអ៊ីរ៉ង់ និងអាមេរិកជានយោបាយការទូតប្រយោល (shuttle diplomacy) មានន័យថាមានអន្តរការីធ្វើជាអ្នកពាំនាំសេចក្ដីទៅមករវាងភាគីជម្លោះ។ ករណីចរចាគ្នានៅក្នុងបញ្ហាអ៊ុយក្រែន និងអ៊ីស្រាអែលក៏ដូចគ្នាដែរ។
បន្ទាប់ពីចរចាគ្នា៥ដងកន្លងទៅនេះ ចំណោទបញ្ហានៅតែកើតមានដដែល។ អ៊ីរ៉ង់ថាខ្លួនត្រូវតែមានសិទ្ធិចម្រាញ់សារធាតុវិទ្យុសកម្មកម្រិតស្រាលដើម្បីបម្រើឱ្យវិស័យស៊ីវិល។ អាមេរិកថាបើមានសិទ្ធិចម្រាញ់ក៏មានសិទ្ធិចុះ។ ប៉ុន្តែត្រូវចម្រាញ់នៅប្រទេសដទៃដើម្បីធានាតម្លាភាព។ អ៊ីរ៉ង់ក៏នៅតែមិនព្រមទៀត។ អ៊ីរ៉ង់ថាខ្លួនត្រូវតែមានសិទ្ធិចម្រាញ់វិទ្យុសកម្មនៅលើទឹកដីរបស់ខ្លួន។ អគ្គមគ្គុទ្ទេសក៍អ៊ីរ៉ង់ថ្លែងថាអ៊ីរ៉ង់មិនបដិសេធការចរចាគ្នាទេ។ ប៉ុន្តែសំណើរបស់អាមេរិកពិបាកទៅរួចព្រោះផ្ទុយពីគុណតម្លៃរបស់អ៊ីរ៉ង់ស្ដីពីភាពឯករាជ្យ-ម្ចាស់ការ និងគោលការណ៍ «យើងអាចធ្វើបាន»៕
ចែករំលែកព័តមាននេះ