ជាថ្មីម្តងទៀត មហាជនបានផ្ទុះការសរសើរជាថ្មីទៅកាន់តារាសម្តែងនាង ស៊ីន យូប៊ីន បន្ទាប់ពីតារាស្រីរូបនេះ បានច្នៃម៉ូតសម្លៀកបំពាក់បង្ហាញពីអត្តសញ្ញាណតំណាងខេត្តក្រុងទាំង២៥របស់កម្ពុជា ស្លៀកនៅលើឆាកអន្តរជាតិកាលពីពេលថ្មីៗនេះ ។ រ៉ូបដែលបានច្នៃខាងលើ ត្រូវបានតារាស្រីរូបនេះស្លៀកទៅចូលរួមកម្មវិធីប្រគល់ពានរង្វាន់មួយដែលមានឈ្មោះថា…
ជាថ្មីម្តងទៀត មហាជនបានផ្ទុះការសរសើរជាថ្មីទៅកាន់តារាសម្តែងនាង ស៊ីន យូប៊ីន បន្ទាប់ពីតារាស្រីរូបនេះ បានច្នៃម៉ូតសម្លៀកបំពាក់បង្ហាញពីអត្តសញ្ញាណតំណាងខេត្តក្រុងទាំង២៥របស់កម្ពុជា ស្លៀកនៅលើឆាកអន្តរជាតិកាលពីពេលថ្មីៗនេះ ។
រ៉ូបដែលបានច្នៃខាងលើ ត្រូវបានតារាស្រីរូបនេះស្លៀកទៅចូលរួមកម្មវិធីប្រគល់ពានរង្វាន់មួយដែលមានឈ្មោះថា HOFS awards ដែលបានធ្វើឡើងនៅក្នុងប្រទេសសង្ហបុរី កាលពីរាត្រីថ្ងៃទី៤ ខែមិថុនា ឆ្នាំ២០២៥ ។
បើតាមការអះអាងពី ស៊ីន យូប៊ីន នេះ ជារ៉ូបដែលនាងបានចូលជាមួយអ្នកច្នៃម៉ូតនៅស្រុកខ្មែររួមគ្នាបង្កើតចេញមកបង្ហាញពីអត្តសញ្ញាតំណាងខេត្តក្រុងទាំង២៥របស់ខ្មែរយើង ។ នាងបញ្ជាក់ថា នៅខាងលើរ៉ូបដែលនាងស្លៀកនេះ គឺមានរូបព្រះបរមរាជវាំងដែលតំណាងឲ្យទីក្រុងភ្នំពេញ ហើយខាងក្រោមមានរូបលោកតាដំបងក្រញ៉ូង តំណាងខេត្តបាត់ដំបង រូបឆ្នាំងតំណាងខេត្តកំពង់ឆ្នាំង មានដើមត្នោតខ្មែរ និងមានរូបដំរីជាន់ខ្លា តំណាងឲ្យខេត្តកំពង់ធំ ព្រមទាំងរូបផ្សេងទៀតដែលតំណាងឲ្យខេត្តខ្មែររបស់យើង ។
នាងបន្ថែមថា អ្វីដែលសំខាន់នោះរ៉ូបមួយនេះ ក៏មានរំលេចនូវរូបព្រាបសន្តិភាព និងពិសេសនៅខាងក្រោមរ៉ូបក៏មានរូបឆ្នេរខ្សាច់ដ៏សក្បោះរបស់កោះរ៉ុងថែមទៀតផងដែរ ។ ក្រោយទទួលបានពានរង្វាន់ខាងលើនេះ ស៊ីន យូប៊ីន បានបង្ហោះសំណេរលើបណ្តាញសង្គមថា ៣ឆ្នាំជាប់ៗគ្នាជាមួយនឹងពានរង្វាន់ HOFS សូមអរគុណដល់មនុស្សទាំងអស់ដែលតែងតែនៅក្បែរខ្ញុំ និងសូមអបអរសាទរដល់ព្រះអង្គម្ចាស់ក្សត្រីយ៍ ។
យ៉ាងណា ក្រោយពីការបង្ហាញពីការច្នៃម៉ូតបង្ហាញពីអត្តសញ្ញាណខ្មែរនាពេលនេះ មហាជន ជាពិសេស បណ្តាប្រិយមិត្តគាំទ្រសម្តែងមោទនភាពជាថ្មីម្តងទៀតទៅកាន់តារាសម្តែងនាង ស៊ីន យូប៊ីន បន្ទាប់ពីកន្លងមក តារាស្រីរូបនេះក៏ធ្លាប់បានធ្វើរឿងដូចគ្នា ពេលដែលនាងមានឱកាសចេញទៅចូលរួមកម្មវិធីនានានៅលើឆាកអន្តរជាតិ ។
ជាការកត់សម្គាល់ តារាសម្តែងនាង ស៊ីន យូប៊ីន គឺជាតារាសម្តែងមួយរូប ដែលមានប្រជាប្រិយភាពជាខ្លាំងនៅក្នុងប្រទេសកម្ពុជា ហើយនាងក៏ជាតារាស្រី ដែលតែងតែមានវត្តមានទៅចូលរួមកម្មវិធីសិល្បៈធំៗនៅលើឆាកអន្តរជាតិជាហូរហែផងដែរ ដោយនៅក្នុងនាងធ្លាប់បានចូលរួមកម្មវិធីល្បីៗដូចជា មហោស្រពភាពយន្តអន្តរជាតិទីក្រុងកាន, ព្រឹត្តិការណ៍បង្ហាញម៉ូដផលិតផលម៉ាកដ៏ល្បី «Dior» នៅប៉ារីស ប្រទេសបារាំង ព្រមទាំងកម្មវិធីលំដាប់អន្តរជាតិជាច្រើនទៀត ។
គួរបញ្ជាក់ថា ពាន HOFS AWARDS 2025 គឺជាវេទិកាមួយដែលផ្តល់កិត្តិយសដល់បុគ្គលឈានមុខគេ និងអាជីវកម្មតាមរយៈសមិទ្ធផល និងការលះបង់របស់ពួកគេ ហើយមិនមែនគ្រាន់តែជាបុគ្គលលក្ខណៈល្បីល្បាញប៉ុណ្ណោះទេ ប៉ុន្តែជាឥស្សរជនដែលមានឥទ្ធិពលដែលជម្រុញឧស្សាហកម្ម និងមនុស្សដូចគ្នាយ៉ាងពិតប្រាកដ ។
សម្រាប់ពានរង្វាន់ខាងលើដែលទទួលបាននាឆ្នាំនេះ សម្រាប់អ្នកសិល្បៈកម្ពុជាមិនមែនមានតែ ស៊ីន យូប៊ីន តែម្នាក់ប៉ុណ្ណោះទេ ពោលគេឃើញមានព្រះនាងចេនណា និងតារាសម្តែងវ័យក្មេងនាង ស៊ីន ជេននី ក៏ទទួលពានខាងលើនេះផងដែរ ៕
ចែករំលែកព័តមាននេះ