រាជធានីភ្នំពេញ៖ ប្រជាពលរដ្ឋប្រមាណជាង៤០គ្រួសារ ដែលរស់នៅក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ បានប្រមូលផ្ដុំគ្នានៅក្នុងបុរីខាងលើនាវេលាម៉ោង២រសៀលថ្ងៃទី៣១ ខែឧសភា ឆ្នាំ២០២៥…
រាជធានីភ្នំពេញ៖ ប្រជាពលរដ្ឋប្រមាណជាង៤០គ្រួសារ ដែលរស់នៅក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ បានប្រមូលផ្ដុំគ្នានៅក្នុងបុរីខាងលើ
នាវេលាម៉ោង២រសៀលថ្ងៃទី៣១ ខែឧសភា ឆ្នាំ២០២៥ សម្ដែងការ ឈឺចិត្តនិងយំស្រែក ហើយស្រែកថា«អយុត្តិធម៌ណាស់ៗ» ។
ពួកគាត់បានលើកឡើងថា បានចាញ់បោកលោកឧត្ដមសេនីយ៍ត្រីជា សុភ័ក្ត្រ មន្ត្រីនគរបាលពន្ធនាគារក្រសួងមហាផ្ទៃ និងប្រពន្ធឈ្មោះគង់ យ៉ាងធី ដែលជាម្ចាស់ក្រុមហ៊ុនបុរីផ្ទះល្វែង«ធី សុភ័ក្ត្រ»ព្រមទាំងប្អូនប្រុសឈ្មោះគង់ អៀងពៅ ។ បណ្ដាលឲ្យម្នាក់ៗខាតបង់អស់ប្រាក់រាប់ម៉ឺនដុល្លារ អស់ផ្ទះសម្បែង គ្មានទីជម្រក ជំពាក់ប្រាក់ធនាគារវ័ណ្ឌ ក ហើយត្រូវបានលោកឧត្ដមសេនីយ៍ត្រីជា សុភ័ក្ត្រ និងប្រពន្ធនោះប្ដឹងឡើងតុលាការទាំងអយុត្តិធមថែមទៀត ។
ពេលប្រមូលផ្ដុំគ្នានោះប្រជាពលរដ្ឋខាងលើបានកាន់បង្ហាញជាសាធារណៈនៅរូបថត រួមជាមួយអត្តសញ្ញាណប័ណ្ណរបស់លោកឧត្ដមសេនីយ៍ត្រីជា សុភ័ក្ត្រ និងប្រពន្ធឈ្មោះ គង់ យ៉ាងធី ដែលជាម្ចាស់ក្រុមហ៊ុនផ្ទះល្វែង«ធី សុភក្ត្រ » ព្រមទាំងប្អូនប្រុសឈ្មោះគង់ អៀងពៅ នោះផងដែរ ហើយបានចោទទៅលើបុគ្គលទាំង៣នាក់នោះថា អាងអំណាច អាងខ្នងធំរកសុីបោកប្រាស់ធ្វើឲ្យពួកគាត់រងទុក្ខវេទនា ទឹកភ្នែករាល់ថ្ងៃ ។
ប្រជាពលរដ្ឋបាននិយាយបន្តទៀតថា ក្រុមហ៊ុនបុរីផ្ទះល្វែង«ធី សុភ័ក្ត្រ» របស់ឈ្មោះជា សុភ័ក្ត្រ និងប្រពន្ធឈ្មោះគង់ យ៉ាងធី នោះបានទិញផ្ទះពីពួកគាត់ដែលជាម្ចាស់ដើមយកទៅជួសជុលលក់បន្ត ហើយម្ចាស់ផ្ទះខ្លះក៏ទទួលបានការទូទាត់ប្រាក់ខ្លះៗប៉ុណ្ណោះមិនគ្រប់ចំនួនឡើយ និងខ្លះទៀតក៏អត់សូម្បី១រៀល ។ បន្ទាប់មកបុគ្គល៣នាក់នោះបានក្លែងឯកសារ ធ្វើប្លង់ផ្ទះថ្មីលក់បន្តទៅឲ្យអ្នកទី២ ទី៣ ពីមួយទៅមួយជាបន្តបន្ទាប់ទៀតជាន់គ្នា ដែលក្នុងផ្ទះ១មានប្លង់២ទៅ៣ និងមានម្ចាស់ដល់ទៅ២ ឬ៣នាក់ បើគិតរហូតមកដល់សព្វថ្ងៃមានអ្នករងគ្រោះជិត១០០គ្រួសារហើយ ។ ក្នុងនោះអ្នកខ្លះបានបាត់បង់ផ្ទះទាំងស្រុង ឯអ្នកខ្លះទៀតចំណាយប្រាក់រាប់ម៉ឺនដុល្លារមកទិញផ្ទះពីក្រុមហ៊ុន ធី សុភ័ក្ត្រនេះ ហើយមិនទទួលបានផ្ទះទេ គឺរញ៉េរញ៉ៃបំផុតធ្វើឲ្យម្នាក់ៗជំពាក់ប្រាក់ធនាគាររាប់ម៉ឺនដុល្លារ ហើយត្រូវធនាគារទារពីមុខពីក្រោយ និងត្រូវរ៉ាប់រងបង់ប្រាក់ជំនួសបុគ្គល៣នាក់ខាងលើ អ្វីដែលហួសចិត្តទៀតនោះ បានទទួលរងនូវបណ្ដឹងបុគ្គលអ្នកមានអំណាចនោះថែមទៀតផង ។
ប្រជាពលរដ្ឋទាំងនោះបាននិយាយរៀបរាប់ថា លោកឧត្ដមសេនីយ៍ត្រី ជា សុភ័ក្ត្រនិងប្រពន្ធឈ្មោះគង់ យ៉ាងធី ព្រមទាំងប្អូនប្រុសឈ្មោះគង់ អៀងពៅ បង្កើតក្រុមហ៊ុនផ្ទះល្វែង«ធី សុភក្ត្រ » នេះរកសុីបោកប្រាស់ពួកគាត់ច្រើនឆ្នាំហើយ និងបានផ្ទុះខ្លាំងចាប់តាំងពីឆ្នាំ២០២១រហូតមក ។ ចំណែកសកម្មភាពបោកគ្មានមេត្តានេះមានចំនួន៣វិធីគឺទី១, បុគ្គលខាងលើបានទិញផ្ទះពីពួកគាត់ដោយទូទាត់ប្រាក់ជាដំណាក់កាលៗ តែម្ចាស់ផ្ទះខ្លះក៏បានលុយបន្តិចបន្តួច និងអ្នកខ្លះក៏អត់សោះ ។
ប្រសិនបើម្ចាស់ផ្ទះណាមួយជំពាក់ប្រាក់ធនាគារហើយជាប់ប្លង់ផ្ទះនៅធនាគារនោះក្រុហ៊ុនធី សុភ័ក្ត្រ មានគោលការណ៍បង់ជំនួស និងសន្យាថា ពេលក្រុមហ៊ុនលក់ផ្ទះដែលទិញពីម្ចាស់ដើមនោះដាច់ ក្រុមហ៊ុននិងបង់ប្រាក់ផ្ដាច់ឲ្យធនាគារជំនួសម្ចាស់ផ្ទះមិនឲ្យលំបាកទេ ឯប្រាក់នៅសល់ប៉ុន្មាននិងទួទាត់ទៅឲ្យម្ចាស់វិញ ។ ប៉ុន្តែក្រោយពេលលក់ផ្ទះដាច់លោកជា សុភ័ក្ត្រ និងប្រពន្ធឈ្មោះគង យ៉ាងធី ព្រមទាំងឈ្មោះគង់ អៀងពៅ ដែលជាប្អូនប្រុសបានក្ដោបយកប្រាក់ទាំងអស់ អត់បង់ផ្ដាច់ធនាគារឲ្យហើយ អត់ឲ្យលុយម្ចាស់ផ្ទះឡើយ រួចបានក្លែងឯកសារធ្វើប្លង់ថ្មី១ ឬ២ទៀតលក់បន្តឲ្យអ្នកទី២ និងទី៣បន្តទៀត(ផ្ទះ១លក់៣ដង) និង ដោយផ្ទះ១មានប្លង់២ឬ៣ មានម្ចាស់២ទៅ៣នាក់ឯណោះ ដែលបានធ្វើឲ្យរងគ្រោះទាំងម្ចាស់ផ្ទះដើមនិងអ្នកទិញបន្តពីក្រុមហ៊ុនមួយនេះ ។
ពួកគាត់បាននិយាយប្រាប់ពីវិធីបោកទី២ទៀតថា ឈ្មោះជា សុភ័ក្ត្រ ឈ្មោះគង់ យ៉ាងធី និងឈ្មោះគង់ អៀងពៅ បានល្បួងប្រជាពលរដ្ឋដែលជាអ្នកស្គាល់ទុកចិត្តគ្នាជាច្រើននាក់ឲ្យជួយឈរឈ្មោះដើម្បីខ្ចីប្រាក់ពីធនាគារជំនួសពួកខ្លួន ដោយប្រាប់ថា គ្រាន់តែឲ្យជួយឈរឈ្មោះប៉ុណ្ណោះ មិនឲ្យលំបាកទេ ។ ចំណែកទ្រព្យបញ្ចាំធនាគារគឺយកប្លង់ផ្ទះរបស់ក្រុមហ៊ុនទៅដាក់ទេ បន្ទាប់ពីបានព្រមព្រៀងគ្នាហើយ បុគ្គលនោះបានយកក្រដាស់ទទេរគ្មានអក្សរ១ច្បាប់ទៅឲ្យអ្នកជួយឈរឈ្មោះទាំងនោះផ្ដិតមេដៃ ហើយប្រាប់ថា កុំភ័យផ្ដិតមេដៃរួចក្រុមហ៊ុនសរសេរបញ្ចូលប្លង់ផ្ទះរបស់ក្រុមហុនទេ ។
ដោយសារតែជឿទុកចិត្តលើបុគ្គលខាងលើខ្វះការពិចារណា ពួកគាត់ក៏ព្រមផ្ដិតមេដៃឈរឈ្មោះឲ្យ ហើយក្រោយពេលផ្ដិតមេដៃរួច ស្រាប់តែបុគ្គលទាំងនោះបានសរសេរនៅក្នុងលិខិតខ្ចីប្រាក់នោះតាមឈ្មោះម្ចាស់មេដៃនីមួយទៅវិញ រួចយកទៅខ្ចីប្រាក់បានរាប់ម៉ឺនដុល្លារ ចំណែកអ្នកជួយឈរឈ្មោះឲ្យនោះជំពាក់ធនាគារម្នាក់ៗរាប់ម៉ឺនដុល្លារ ហើយទាល់តែធនាគារខលទារលុយ និងប្រាប់ថាខានបង់លុយច្រើនខែហើយ ទើបម្នាក់ៗបានដឹងនិងហួសចិត្តភ្ញាក់ខ្លួនគ្រប់ៗគ្នាដឹងខ្លួនដូចខ្មោច៧ថ្ងៃ ។
អ្នកចាញ់បោកទាំងនោះបានរៀបរាប់ទាំងទឹកភ្នែកទឹកសម្បោរប្រាប់ជាសាធារណៈទៀតថា វិធីបោកទី៣, ប្រសិនបើឈ្មោះរបស់អ្នកដែលជួយឈរឈ្មោះជាតំណាងឲ្យនោះខ្ចីប្រាក់ធនាគារអត់បានទេ(ធនាគារអត់ឲ្យ)ព្រោះតែកំពុងជំពាក់ប្រាក់ធនាគារដែរ ឬ ធនាគារចុះសិក្សាឃើញថាមិនអាចឲ្យខ្ចីបានទេនោះ បុគ្គល៣នាក់ខាងលើបានកោសលុបឈ្មោះក្នុងអត្តសញ្ញាណប័ណ្ណរបស់អ្នកឈរឈ្មោះនោះរួចកែដាក់ឈ្មោះអ្នកផ្សេងទាំងសាម៉ីជនមិនបានដឹងសោះ ។ បន្ទាប់មកយកទៅខ្ចីលុយធនាគារបានរាប់ម៉ឺនដុល្លារ ហើយអត់បង់ប្រាក់ឲ្យធនាគារទេ ក្រោយពីអត់បង់ច្រើនខែ ខាងធនាគារក៏ខលមកទារលុយពីអ្នកឈរឈ្មោះ ឬ អ្នកដែលមានឈ្មោះក្នុងអត្តសញ្ញាណប័ណ្ណទាំងអស់ ទើបបែករឿងហើយបុគ្គលខាងលើមិនត្រឹមតែមិនព្រមដោះស្រាយឲ្យប៉ុណ្ណោះទេ អាងខ្លួនមានខ្នងធំធ្វើការធំបានគំរាមកំហែងប្ដឹងជនរងគ្រោះដាក់គុកច្រវាក់ថែមទៀត ។
ពេលប្រមូលផ្ដុំគ្នានោះប្រជាពលរដ្ឋទាំងអស់បានកាន់រូបថតសម្ដេចអគ្គមហាសេនាបតីតេជោហ៊ុនសែន ប្រធានព្រឹទ្ធសភាកម្ពុជា និងសម្ដេចគតិព្រិទ្ធបណ្ឌិតប៊ុន រ៉ានី ហ៊ុនសែន ,សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
លោកអភិសន្តិបណ្ឌិតស សុខា រដ្ឋមន្ត្រីក្រសួងមហាផ្ទៃ , លោកទេសរដ្ឋមន្ត្រីឱម យិនទៀង ប្រធានអង្គភាពប្រឆាំងអំពើពុករលួយ ,លោកឃួង ស្រេងអភិបាលរាជធានីភ្នំពេញ និងលោកឧត្ដមសេនីយ៍ឯកជួនណារិន្ទអគ្គស្នងការរង និងជាស្នងការ នគរបាលរាជធានីភ្នំពេញ ។ ដោយបាននាំគ្នាយំស្រែកនិងស្នើរសុំយ៉ាងទទូចដល់ថ្នាក់ដឹកនាំកំពូលខាងលើមេត្តាជួយរកដំណោះស្រាយជូនពួកគាត់ផង ក្នុងកាលៈទេសៈដែលកំពុងរងទុក្ខវេទនា គ្មានទីជម្រកដោយបាត់បង់ផ្ទះ អស់លុយកាក់ ជំពាក់ធនាគារវ័ណ្ឌ ក និងប្រឈមមុខផ្លូវច្បាប់ទៀត ព្រោះតែស្នាដៃអ្នកមានអំណាច១គ្រួសារនេះ ។
សូមបញ្ជាក់ថា ព័ត៌មានខាងលើនេះគឺជាការអះអាងរបស់ប្រជាពលរដ្ឋតែម្ខាងប៉ុណ្ណោះ កោះសន្តិភាពមិនអាចស្វែងរកការបំភ្លឺពីលោកឧត្ដមសេនីយ៍ត្រីជា សុភ័ក្ត្រ និងប្រពន្ធឈ្មោះគង់ យ៉ាងធី ព្រមទាំងឈ្មោះគង់ អៀងពៅ បានឡើយ ។ ចំណែកប្រជាពលរដ្ឋពិតជាបានបង្ហាញនូវអារម្មណ៍ឈឺចាប់បំផុត រហូតដល់ថ្នាក់និយាយថា បើពួកគាត់ជាប់គុកដោយសារតែការបោកប្រាស់នេះក៏ជាប់ទៅចុះ ប៉ុន្តែទោះជាយ៉ាងណាពួកគាត់បានដាក់ពាក្យបណ្ដឹងទៅកាន់ក្រសួងមហាផ្ទៃ និងស្ថាប័ននានាមួយចំនួនទៀតរួចហើយដែរ ។
ដរាបណាមានការបំភ្លឺពីថៅកែក្រុមហ៊ុនទាំង៣នាក់ខាងលើ កោះសន្តិភាពនឹងផ្សាយជូនបន្តទៀត ដើម្បីយុត្តិធម៌ទាំងអស់គ្នា ៕
ចែករំលែកព័តមាននេះ