រាជធានីភ្នំពេញ ៖ បុរសអ្នកបើករថយន្តក្រុងម្នាក់ បានចុចស៊ីផ្លេ ជាច្រើនដង ស៊ីញ៉ូទៅកាន់អ្នកបើកបររថយន្តក្រុង ១គ្រឿងទៀត ដែលជាអ្នកស្គាល់គ្នា ដែលកំពុងបើកបរក្នុងទិសដៅស្របគ្នានៅខាងមុខខ្លួន។ ខណៈនោះ…
រាជធានីភ្នំពេញ ៖ បុរសអ្នកបើករថយន្តក្រុងម្នាក់ បានចុចស៊ីផ្លេ ជាច្រើនដង ស៊ីញ៉ូទៅកាន់អ្នកបើកបររថយន្តក្រុង ១គ្រឿងទៀត ដែលជាអ្នកស្គាល់គ្នា ដែលកំពុងបើកបរក្នុងទិសដៅស្របគ្នានៅខាងមុខខ្លួន។ ខណៈនោះ បានធ្វើឲ្យបុរសស្រវឹងស្រា ៣នាក់ ដែលកំពុងជិះម៉ូតូតាមផ្លូវនោះដែរ បានចោទថា ស៊ីផ្លេ ឌឺដាក់ពួកខ្លួន ក៏បានផ្ទុះកំហឹងយ៉ាងខ្លាំង រួចជិះតាមរករឿងរហូតទាស់ពាក្យសម្ដីគ្នា។ ខណៈពេលរថយន្តក្រុងនោះ កំពុងឈប់ត្រង់ចំណុចភ្លើងស្តុប អ្នកស្រវឹង៣នាក់នោះ ក៏បានរើសដុំថ្មគប់ បណ្ដាលឲ្យបែកកញ្ចក់មុខរថយន្តខាងលើ បន្ទាប់មកបុរសទាំង៣នាក់នោះ បានជិះម៉ូតូគេចខ្លួនបាត់ស្រមោល ។
ហេតុការណ៍នោះបានកើតឡើងកាលពីវេលាម៉ោង១និង៥០នាទីយប់រំលងអធ្រាត្រឈានចូលថ្ងៃទី២៩ ខែឧសភា ឆ្នាំ២០២៥ នៅតាមមហាវិថីសហព័ន្ធរុស្សី ត្រង់ចំណុចភ្លើងស្តុប២០០៤ ស្ថិតនៅក្នុងភូមិតាងួន សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
សាក្សីម្នាក់ បាននិយាយប្រាប់ថា នៅមុនពេលកើតហេតុ មានបុរស៣នាក់ ស្រវឹងស្រាជោកជាំ ហើយបានជិះម៉ូតូ ១គ្រឿ ម៉ាកហុងដាឌ្រីមសេ១២៥ ពណ៍ខ្មៅ (មិនចាំស៊េរី និងស្លាកលេខ) ធ្វើដំណើរតាមមហាវិថីសហព័ន្ធរុស្សី ក្នុងទិសដៅពីកើតទៅលិច។ លុះពេលទៅដល់ត្រង់ចំណុចភ្លើងស្តុបក្តាន់២ សង្កាត់ស្រះចក ខណ្ឌដូនពេញ រាជធានីភ្នំពេញ ។ រថយន្តក្រុងខាងលើ បានបើកទៅដល់តាមក្រោយដែរ បន្ទាប់មក អ្នកបើកបររថយន្ត បានចុចស៊ីផ្លេជាច្រើនដង ទៅកាន់រថយន្តក្រុង ១គ្រឿង ផ្សេងទៀត ដែលជាអ្នកស្គាល់គ្នា កំពុងបើកបរនៅមុខ ។
សាក្សីដដែល បាននិយាយបន្តទៀតថា ខណៈនោះ បុរសស្រវឹងស្រាទាំង៣នាក់ បានចោទថា អ្នកបើរថយន្តក្រុងចុចស៊ីផ្លេ ឌឺដាក់ពួកខ្លួន ក៏បានផ្ទុះកំហឹងយ៉ាងខ្លាំង និងបានតាមរករឿងអ្នកបើករថយន្តក្រុង រហូតទាស់ពាក្យសម្តីគ្នា ។ ប៉ុន្តែពេលនោះ មិនបានឈប់ឈ្លោះគ្នានោះទេ គឹទាំងរថយន្ត និងម៉ូតូ បានបើកបរបណ្ដើរ ជជែកឈ្លោះគ្នាបណ្ដើរ រហូតទៅដល់ត្រង់ចំណុចភ្លើងស្តុប២០០៤ រថយន្តក្រុង បានឈប់រង់ចាំភ្លើងស្តុបលោតពណ៍ខៀវ ។
ប្រភពខាងលើ បានប្រាប់ទៀតថា ពេលនោះ ស្រាប់តែអ្នកស្រវឹងទាំង៣នាក់ បានឈប់ម៉ូតូ ហើយអ្នកជិះក្រោយគេ បានចុះរើសដុំថ្មគុបកញ្ចក់មុខរថយន្ត បណ្តាលឲ្យបែករងការខូចខាត រួចនាំគ្នាជិះម៉ូតូត្រក្រោយវិញគេចខ្លួនបាត់ស្រមោល ។ បន្ទាប់មក អ្នកបររថយន្តក្រុង បានទៅដាក់ពាក្យបណ្តឹង ដើម្បីឲ្យសមត្ថកិច្ចជួយអន្តរាគមន៍ ស្វែងរកឃាត់ខ្លួនគូទំនាស់របស់ខ្លួនទាំងនោះ ចាត់ការតាមច្បាប់ ៕
ចែករំលែកព័តមាននេះ