រាជធានីភ្នំពេញ ៖ ជនសង្ស័យម្នាក់ជំនាញខាងលួចទូរស័ព្ទដៃ និងកាបូបលុយ របស់អ្នកជំងឺ និងក្រុមគ្រួសារ សាច់ញាតិដែលទៅមើលថែអ្នកជំងឺនៅតាមមន្ទីរពេទ្យនានា ហើយកន្លងមកតែងតែធ្វើសកម្មភាពបានសម្រេចព្រមទាំងគេចខ្លួនរួចជាបន្តបន្ទាប់រហូតមក ។ ស្រាប់តែលើកចុងក្រោយនេះញ៉ាមបានចូលទៅធ្វើសកម្មភាពលួចនៅក្នុងមន្ទីរពេទ្យបង្អែកដង្កោទៀត…
រាជធានីភ្នំពេញ ៖ ជនសង្ស័យម្នាក់ជំនាញខាងលួចទូរស័ព្ទដៃ និងកាបូបលុយ របស់អ្នកជំងឺ និងក្រុមគ្រួសារ សាច់ញាតិដែលទៅមើលថែអ្នកជំងឺនៅតាមមន្ទីរពេទ្យនានា ហើយកន្លងមកតែងតែធ្វើសកម្មភាពបានសម្រេចព្រមទាំងគេចខ្លួនរួចជាបន្តបន្ទាប់រហូតមក ។ ស្រាប់តែលើកចុងក្រោយនេះញ៉ាមបានចូលទៅធ្វើសកម្មភាពលួចនៅក្នុងមន្ទីរពេទ្យបង្អែកដង្កោទៀត ហើយលួចបានទូរស័ព្ទចំនួន៣គ្រឿងតែចិត្តលោភលន់មិនស្កប់ បានបន្តទៅលួចកាបូបលុយទៀត ក៏ត្រូវបានម្ចាស់ទាន់ចាប់ដៃជាប់រួចប្រគល់ជូននគរបាលនាំទៅសាកសួរនិងចាត់ការតាមច្បាប់តែម្ដង ។
ហេតុការណ៍នេះបានកើតឡើងបង្កឲ្យមានការភ្ញាក់ផ្អេីល កាលពីវេលាម៉ោង០៣និង៣០នាទីទៀបភ្លឺថ្ងៃទី២៨ ខែឧសភា ឆ្នាំ២០២៥ នៅមន្ទីរពេទ្យបង្អែកដង្កោ ស្ថិតនៅតមផ្លូវលេខ២១៧ ចំការដូងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យខាងលើនោះឈ្មោះ មោក និត អាយុ៤២ឆ្នាំ មុខរបរមិនពិតប្រាកដ ស្នាក់បន្ទប់ជួលស្ថិតនៅតាមផ្លូវបេតុង សង្កាត់កំបូល ខណ្ឌកំបូល ។ ចំណែកជនរងគ្រោះទី១,ឈ្មោះ រ៉េត ចាន់រ៉ា ភេទប្រុស អាយុ៤១ឆ្នាំ មុខរបរកម្មករសំណង់ ស្នាក់នៅបន្ទប់ជួល ផ្លូវលំ ភូមិជើងឯក សង្កាត់ជើងឯក ខណ្ឌដង្កោ ។ ត្រូវជនសង្ស័យលួចយកទូរស័ព្ទម៉ាក IPHONE 12Pro Max ១គ្រឿង និងម៉ាកOPPO ១គ្រឿងដែលទុកសាកថ្មនៅលើក្បាលដំណេក ។ ទី ២,ឈ្មោះ ផង់ សារឹម ភេទស្រី អាយុ៥៦ឆ្នាំ ស្នាក់នៅបន្ទប់ជួល ផ្លូវបេតុង ភូមិម័ល សង្កាត់ដង្កោ ខណ្ឌដង្កោ ត្រូវជនសង្ស័យលួចយកទូរស័ព្ទដៃម៉ាក OPPO ១គ្រឿងដែលគាត់ទុកក្នុងថង់ដាក់ខោអាវក្បែរគ្រែអ្នកជំងឺ ។
នគរបាលបានប្រាប់ឲ្យដឹងថា នៅវេលាយប់ថ្ងៃកើតហេតុនោះ ជនសង្ស័យខាងលើបានចូលទៅធ្វើសកម្មភាពលួចនៅក្នុងមន្ទីរពេទ្យនោះ ហើយលួចបានទូរស័ព្ទចំនួន៣គ្រឿង ដែលជារបស់ជនរងគ្រោះទាំង២ខាងលើ ប៉ុន្តែដោយចិត្តលោភលន់ ជនសង្ស័យរូបនោះមិនស្កប់ ហើយគេចខ្លួននោះឡើយ ។ ជននេះបានដើរលួចបន្តទៀត ហើយបានប្រទះឃើញកាបូបលុយ១ដែលម្នាស់ទុកនៅលើក្បាលដំណេក ដេកថែទាំកូនស្រីរបស់គាត់ដែលកំពុងមានជំងឺសម្រាកព្យាបាលនៅក្នុងបន្ទប់ថែទាំអ្នកជំងឺខាងលើនោះដែរ ។
នគរបាលបានប្រាប់ឲ្យដឹងបន្ថែមទៀតថា បុរសម្ចាស់កាបូបម្នាក់នោះឈ្មោះម៉ែន ចំណាន អាយុ៤៨ឆ្នាំ ហើយនៅពេលជនសង្ស័យលូកដៃយកកាបូប គាត់បានភ្ញាក់ឃើញទាន់ ក៏រួចចាប់ដៃជននោះជាប់ព្រមទាំងស្រែកឆោឡោថា «ចោរៗ »បង្កឲ្យមានការភ្ឫាក់ផ្អើលពេញមន្ទីរពេទ្យ ។
ពេលនោះជនរងគ្រោះ ឈ្មោះ រ៉េត ចាន់រ៉ា និងឈ្មោះ ផង់ សារឹម ក៏បានភ្ញាក់ឡើងជួយឃាត់ខ្លួនជនសង្ស័យដែរ ប៉ុន្តែជនរងគ្រោះទាំង២នាក់ពុំបានដឹងថាជនសង្ស័យលួចយកទូរស័ព្ទរបស់ខ្លួននៅឡើយទេ ។
នគរបាលបានបញ្ជាក់ប្រាប់ថា ក្រោយពីឃាត់ខ្លួនជនសង្ស័យបានជនរងគ្រោះឈ្មោះ រ៉េត ចាន់រ៉ា និងឈ្មោះ ផង់ សារឹម ក៏ទៅមើលទូរស័ព្ទរបស់ខ្លួនស្រាប់តែបាត់អស់ ទើបនាំគ្នាឆែកខ្លួនជនសង្ស័យ ហើយរកឃើញទូរស័ព្ទនៅក្នុងហោប៉ៅខោរបស់ជនសង្ស័យ រួចក៏បានដកហូតយកមកវិញ ។ បន្ទាប់មកបានទូរស័ព្ទរាយការណ៍ប្រាប់នគរបាលប៉ុស្តិ៍នដង្កោ ឲ្យជួយអន្តរាគមន៍ ហើយនគរបាលក៏បានចុះនាំខ្លួនជនសង្ស័យទៅសួរនាំនិងចាត់ការតាមច្បាប់ ព្រមទាំងដកហូតម៉ូតូម៉ាក HONDA DREAM C125 ពណ៌ខ្មៅ ១គ្រឿងដែលជនសង្ស័យជិះដើរធ្វើសកម្មភាពលួចតាមមន្ទីរពេទ្យផងដែរ ៕
ចែករំលែកព័តមាននេះ