ទីក្រុងបាងកក៖ ថ្ងៃនេះ កងទ័ពថៃបញ្ជូនយន្តហោះចម្បាំងម៉ាកអែហ្វ១៦ (F-16) របស់អាមេរិកដែលផលិតតាំងពីទសវត្សទី៩០ដើម្បីចេញប្រតិបត្តិការស្ទាក់ដំណើររបស់យន្តហោះទម្លាក់គ្រាប់បែកនៃរបបសឹកមីយ៉ាន់ម៉ា។ សាក្សីនិយាយថាមុនពេលកើតហេតុ គេឃើញយន្តហោះមីយ៉ាន់ម៉ាម៉ាកយក្ស១៣០ (Yak-130) បើកទៅកៀកនឹងខេត្តតាករបស់ថៃ (Tak)។…
ទីក្រុងបាងកក៖ ថ្ងៃនេះ កងទ័ពថៃបញ្ជូនយន្តហោះចម្បាំងម៉ាកអែហ្វ១៦ (F-16) របស់អាមេរិកដែលផលិតតាំងពីទសវត្សទី៩០ដើម្បីចេញប្រតិបត្តិការស្ទាក់ដំណើររបស់យន្តហោះទម្លាក់គ្រាប់បែកនៃរបបសឹកមីយ៉ាន់ម៉ា។ សាក្សីនិយាយថាមុនពេលកើតហេតុ គេឃើញយន្តហោះមីយ៉ាន់ម៉ាម៉ាកយក្ស១៣០ (Yak-130) បើកទៅកៀកនឹងខេត្តតាករបស់ថៃ (Tak)។
ឧបទ្ទវហេតុនេះកើតឡើងចំពេលដែលមនុស្ស៣៧៧នាក់រត់ភៀសខ្លួនចេញពីប្រទេសយ៉ាន់ម៉ាចូលទឹកដីថៃដើម្បីគេចចេញពីការទម្លាក់គ្រាប់បែក។ កងទ័ពអាកាសភូមិន្ទថៃបានបញ្ជូនយន្តហោះ២គ្រឿងដើម្បីផ្ដល់សញ្ញាព្រមានទៅយន្តហោះទម្លាក់គ្រាប់បែករបស់មីយ៉ាន់ម៉ាថាមិនត្រូវហោះចូលមកជាបន្តទៀតទេព្រោះជាការរំលោភអធិបតេយ្យភាពជាតិរបស់ថៃ។
មុនដំបូង ថៃចាប់បានរូបភាពយន្តហោះទម្លាក់គ្រាប់បែករបស់មីយ៉ាន់ម៉ានោះ។ ថៃក៏បញ្ជូនយន្តហោះអែហ្វ១៦ចេញធ្វើអន្តរាគមន៍ជាបន្ទាន់។ ប្រភពពីខាងសន្តិសុខជាតិថៃឱ្យដឹងថាយន្តហោះរបស់មីយ៉ាន់ម៉ានោះបានទម្លាក់គ្រាប់បែក៤គ្រាប់ទៅលើមូលដ្ឋានរបស់កងទ័ពកុលសម្ព័ន្ធជាតិការ៉េន (Karen) នៅទីក្រុងមីយ៉ាវ៉ាឌី (Myawaddy) ដែលស្ថិតនៅជាប់នឹងព្រំដែនថៃ។
ទីតាំងទម្លាក់គ្រាប់បែកនោះស្ថិតនៅចម្ងាយ១គីឡូម៉ែត្រប៉ុណ្ណោះពីព្រំដែន។ ដូច្នេះឃើញថាកៀកខ្លាំងមែនទែននឹងព្រំដែន។ ដូច្នេះ ស្រួលមិនស្រួលយន្តហោះរបស់របបសឹកមីយ៉ាន់ម៉ាអាចនឹងជ្រុលដំណើរចូលទឹកដីថៃមែនបើគ្មានការធ្វើអន្តរាគមន៍ពីកងទ័ពអាកាសថៃ។ នៅក្នុងស្ថានភាពច្របូកច្របល់ និងភ័យខ្លាចបែបនេះ ជនភៀសខ្លួនទាំងជាង៣រយនាក់ក៏រត់ចូលទឹកដីថៃព្រឹបៗដូចទឹកបាក់ទំនប់។
មិនយូរប៉ុន្មាន ទាហានថៃបានចុះពង្រឹងកម្លាំងនៅតាមព្រំដែនដើម្បីទប់ស្កាត់ការជ្រៀតចូលព្រំដែនរបស់ខ្លួនពីសំណាក់ទាហាននៃរបបសឹក ឬពីសំណាក់ពួកឧទ្ទាមដែលប្រឆាំងនឹងរបបសឹក។ សារព័ត៌មានថៃផ្សាយថាជនភៀសខ្លួនដែលរត់ចេញពីមីយ៉ាន់ម៉ាចូលទឹកដីថៃនោះត្រូវទាហានថៃយកចិត្តទុកដាក់ណាស់។ ពួកគេជួយយកអាសា និងផ្ដល់ជំនួយមនុស្សធម៌ដូចជាបាយ-ទឹក និងទីជម្រកជាដើម។ ខាងលើនេះជាការដកស្រង់ប្រភពពីគេហទំព័រដឹណេសឹន (The Nation Thailand) និងប្រភពដទៃទៀត៕
ចែករំលែកព័តមាននេះ