រាជធានីភ្នំពេញ ៖ ក្រសួងធម្មការ និងសាសនា បានឱ្យលោក ថោង សុខុម ហៅលោកគ្រូភ្នំគូលេន បញ្ឈប់ការបង្ហោះនិងលុបវីដេអូសកម្មភាពនានារបស់ខ្លួនលើបណ្តាញសង្គមបន្ទាប់ពីមន្ទីរក្រសួងមន្ទីធម្មការ និងសាសនារាជធានីភ្នំពេញចុះណែនាំ…
រាជធានីភ្នំពេញ ៖ ក្រសួងធម្មការ និងសាសនា បានឱ្យលោក ថោង សុខុម ហៅលោកគ្រូភ្នំគូលេន បញ្ឈប់ការបង្ហោះនិងលុបវីដេអូសកម្មភាពនានារបស់ខ្លួនលើបណ្តាញសង្គមបន្ទាប់ពីមន្ទីរក្រសួងមន្ទីធម្មការ និងសាសនារាជធានីភ្នំពេញចុះណែនាំ ។
យោងតាមបណ្តាញសង្គមហ្វេសប៊ុករបស់ក្រសួងធម្មការ និងសាសនា នៅថ្ងៃទី២៥ ខែឧសភា ឆ្នាំ២០២៥ បានឲ្យដឹងថា លោក ទេព គង្គា ប្រធានមន្ទីរធម្មការ និងសាសនា រាជធានីភ្នំពេញ បានសហការជាមួយស្ថាប័ពាក់ព័ន្ធ និងអាជ្ញាធរមូលដ្ឋានខណ្ឌសែនសុខ ចុះធ្វើការណែនាំលោកថោង សុខុម ហៅលោកគ្រូភ្នំគូលេន ជុំវិញការបង្ហោះវីដេអូសកម្មភាព និងរូបភាព ធ្វើឱ្យប៉ះពាល់ដល់សង្គម នៅតាមបណ្ដាញសង្គមនានា ដោយបានធ្វើកិច្ចសន្យាបញ្ឈប់ការបង្ហោះ និងលុបវីដេអូ រូបថតសកម្មភាពផ្សេងៗ មានការប្រោះព្រំ ស្រោចទឹកព្យាបាលជំងឺប្រសិទ្ធីមន្តគាថា ការដើរបិណ្ឌបាត ដោយស្លៀកដណ្ដប់ គ្រងសំពត់បែបអ្នកបួសព្រះពុទ្ធសាសនាជាដើមទាំងចាស់ទាំងថ្មីចេញពីប្រព័ន្ធបណ្ដាញសង្គមទាំងអស់។
លោក ទេព គន្ធា ប្រធានមន្ទីរធម្មការ និងសាសនារាជធានីភ្នំពេញ ដោយមានកិច្ចសហការពីអាជ្ញាធរមូលដ្ឋានខណ្ឌសែនសុខ និងស្ថាប័នពាក់ព័ន្ធ បានដឹកនាំក្រុមការងារចុះធ្វើ ការសម្របសម្រួលណែនាំដល់លោក ថោង សុខុម ហៅលោកគ្រូភ្នំគូលេន ស្ថិតនៅភូមិ វិមានទ្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
លោកប្រធានមន្ទីរធម្មការ និងសាសនារាជធានីភ្នំពេញ បានធ្វើការណែនាំដោយយោងទៅលើច្បាប់ស្តីអំពីសិទ្ធិសេរីភាព និងការធ្វើសកម្មភាពគោរពប្រតិបត្តិជំនឿសាសនានៅព្រះ រាជាណាចក្រកម្ពុជា គោលការណ៍ណែនាំរបស់ក្រសួងធម្មការនិងសាសនា ជាពិសេសប្រសាសន៍ណែនាំដោយផ្ទាល់ពីឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនាដល់លោកថោង សុខុម ហៅលោកគ្រូភ្នំគូលេន ការធ្វើសកម្មភាពគោរព ជំនឿកុំឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ តថភាពសង្គម និងសាសនាដទៃ ។
បន្ទាប់មក លោក ថោង សុខុម បានឆ្លើយតប និងបញ្ជាក់ដោយលោកពិតជាបានបង្ហោះវីដេអូ និងរូបភាពសកម្មភាពព្យាបាលជំងឺប្រោះព្រំ ស្រោចទឹក ប្រសិទ្ធីមន្ត គាថាជាដើម លើប្រព័ន្ធ បណ្តាញសង្គមពិតមែន ដោយរូបភាពសកម្មភាពទាំងអស់នោះ ភាគច្រើនជារូបភាពចាស់ៗ ដែលកូនសិស្ស និងអ្នកលេងបណ្តាញ សង្គមបានចែករំលែកតៗគ្នា និងខ្លះទៀតបានយកទៅផុសឡើងវិញក្នុងន័យវាយប្រហារថែមទៀត ។
លោកថោង សុខុម បានឯកភាពយល់ព្រម តាមការណែនាំរបស់លោកប្រធានមន្ទីរធម្មការនិងសាសនារាជធានីភ្នំពេញ និងអាជ្ញាធរពាក់ព័ន្ធគ្រប់លំដាប់ថ្នាក់ និងលុបវីដេអូ និងរូបភាពដែលបានបង្ហោះលើបណ្តាញសង្គមទាំងអស់ចេញ។ បញ្ឈប់ការបង្ហោះវីដេអូ រូបភាពសកម្មភាពនៅលើប្រព័ន្ធបណ្តាញសង្គម (Facebook, Instagram, TikTok, Telegram, Whatsup, Cool App ។ល។) ចាប់ពីពេលនេះតទៅ។
សូមអំពាវនាវដល់បង ប្អូនអ្នកគាំទ្រ និងអ្នកលេងបណ្តាញសង្គមទាំងអស់ សូមបញ្ឈប់យករូបភាព របស់ខ្ញុំបាទ ទាំងចាស់ ទាំងថ្មី ទៅបង្ហោះចែកចាយតាមបណ្តាញសង្គមបន្តតទៅទៀត និងសូមបងប្អូនអ្នកលេងបណ្តាញសង្គមទាំងអស់ លុបវីដេអូ និងរូបភាពដែលបានបង្ហោះទាំងចាស់ទាំងថ្មីចេញ ។ ប្រសិនបើបងប្អូនអ្នកលេងបណ្តាញសង្គម នៅតែបន្តចែកចាយ និងបង្ហោះវីដេអូ រូបភាពរបស់ខ្ញុំ បាទបន្តទៅទៀតនោះ ខ្ញុំបាទមិនទទួលខុសត្រូវនោះទេ ហើយបងប្អូននឹងត្រូវប្រឈមមុខចំពោះមុខច្បាប់ជាធរមានដោយខ្លួនឯង៕
ចែករំលែកព័តមាននេះ