ទីក្រុងកៀវ៖ បន្ទាប់ពីដូរឈ្លើយសឹកគ្នាចប់មិនទាន់បានប៉ុន្មានផង រុស្ស៊ីវាយប្រហារអ៊ុយក្រែនដ៏ខ្លាំងក្លាបំផុតជាបន្តទៀតដោយប្រើប្រាស់យន្តហោះដ្រូន និងមីស៊ីលផ្គួបគ្នាទៅលើទីក្រុងតូច-ធំទាំងអស់រួមទាំងរដ្ឋធានីកៀវផងដែរ។ មន្ត្រីរដ្ឋាភិបាលអ៊ុយក្រែនអះអាងថាមនុស្សយ៉ាងតិច១២នាក់បានស្លាប់បន្ទាប់ពីរុស្ស៊ីបញ្ជូនដ្រូន និងមីស៊ីល៣៦៧គ្រឿងទៅវាយប្រហារ។
មន្ត្រីថ្នាក់មូលដ្ឋានអះអាងថានៅក្នុងចំណោមអ្នកស្លាប់ទាំងនោះក៏មានកុមារបីនាក់ផងដែររស់នៅតំបន់ស៊ីតូមៀ (Zhytomyr)។ ប្រមុខដឹកនាំអ៊ុយក្រែន លោកហ្សេឡិនស្គី បានអំពាវនាវឱ្យប្រទេសអាមេរិកដែលមិនសូវហ៊ានប្រើប្រាស់សម្ដីខ្លាំងដាក់ប្រទេសរុស្ស៊ីនោះសូមកុំនៅស្ងៀមដូច្នេះតទៅទៀត។ ត្រូវតែមានសារនយោបាយអ្វីមួយនិយាយទៅកាន់រុស្ស៊ី និងលោកពូទីន។
ហ្សេឡិនស្គីបង្ហោះសារនៅលើបណ្ដាញតេឡេក្រាមថានៅពេលអាមេរិក និងពិភពលោករក្សាភាពស្ងៀមស្ងាត់ដូច្នេះនឹងធ្វើឱ្យលោកពូទីនកាន់តែបានចិត្ត។ ហ្សេឡិនស្គីយល់ថាការវាយប្រហារកម្រិតនេះអាចមានហេតុផលគ្រប់គ្រាន់ដើម្បីឱ្យក្រុមសម្ព័ន្ធមិត្តដាក់ទណ្ឌកម្មបន្ថែមទៀតទៅលើរុស្ស៊ី។ នេះជាការវាយប្រហារដ៏ខ្លាំងក្លាបំផុតទៅលើអ៊ុយក្រែន។ ទោះបីមនុស្សស្លាប់អាចតិចជាងការវាយប្រហារកាលពីពេលមុនៗ ប៉ុន្តែគ្រាប់កាំភ្លើងដែលបាញ់ចេញទៅច្រើនជាងពេលណាៗទាំងអស់។
រដ្ឋមន្ត្រីមហាផ្ទៃអ៊ុយក្រែនថ្លែងថាមនុស្ស១២នាក់ស្លាប់ និង៦០នាក់ទៀតរងរបួស។ លោកចាត់ទុកថានេះជាការវាយប្រហារដ៏ឃោរឃៅប្រឆាំងនឹងជនស៊ីវិល។ ជាថ្មីម្ដងទៀត ពួកសត្រូវបានបង្ហាញពីគោលដៅរបស់ពួកគេដែលចង់បំភិតបំភ័យ និងទាមទារជីវិតរបស់យើង។ ការវាយប្រហារលើកនេះកើតឡើងចំពេលដែលប្រទេសទាំង២កំពុងត្រៀមដូរឈ្លើយសឹកគ្នាជាលើកទីបីតបតាមកិច្ចព្រមព្រៀងនៅទីក្រុងអ៊ីស្តាន់ប៊ូល។
បទឈប់បាញ់ប្រហែលជាគ្មានផ្លូវអាចទៅរួចនោះទេ។ លោកពូទីនមិនទទួលយកបទឈប់បាញ់ទេនៅក្នុងការសន្ទនាគ្នាតាមទូរស័ព្ទជាមួយលោកត្រាំ។ ហេតុនេះ អឺរ៉ុបក៏ប្រកាសដាក់ទណ្ឌកម្មសេដ្ឋកិច្ចជាថ្មីលើរុស្ស៊ី។ ប៉ុន្តែទណ្ឌកម្មនេះមិនសូវមានទម្ងន់ប៉ុន្មានទេព្រោះលោកត្រាំមិនព្រមដាក់ទណ្ឌកម្ម។ ត្រាំថាបើអាមេរិកធ្វើដូច្នេះ រុស្ស៊ីនឹងដើរចេញពីការចរចាគ្នា។
កាលពីយប់មិញ កងទ័ពអាកាសអ៊ុយក្រែនថ្លែថារុស្ស៊ីបញ្ជូនដ្រូន២៩៨គ្រឿង និងមីស៊ីល៦៩គ្រាប់វាយប្រហារអ៊ុយក្រែន។ ខែលការពារដែនអាកាសអ៊ុយក្រែនអាចបាញ់ទម្លាក់ដ្រូនបាន២៦៦គ្រឿង និងមីស៊ីលបាន៤៥គ្រាប់។ ទីក្រុងធំៗមួយចំនួនដូចជាខាគីវ (Kharkiv), មីកូឡាយ (Mykolaiv) និងថេណូពីល (Ternopil) សុទ្ធតែរងការវាយប្រហារទាំងអស់។ នៅរដ្ឋធានីកៀវ អាជ្ញាធរអះអាងថាមនុស្ស១១នាក់រងរបួសដោយសារការវាយឆ្មក់ពីយន្តហោះដ្រូន។ ប៉ុន្តែនៅកៀវគ្មានមនុស្សស្លាប់ទេ៕
ចែករំលែកព័តមាននេះ