ខេត្តកណ្តាល ៖ ជនសង្ស័យម្នាក់ ដើរកាន់ជំពាមផង កាំបិតផ្គាក់ផង បាញ់ទៅផ្ទះគេបែកកញ្ចក់ រួចដើរបន្តមកដល់ឃើញឆ្កែកំពុងដេកមុខផ្ទះ ក៏កាប់ឆ្កែគេងាប់១ក្បាលទៀត រួចដើរមកវិញ កាន់ផ្គាក់…
ខេត្តកណ្តាល ៖ ជនសង្ស័យម្នាក់ ដើរកាន់ជំពាមផង កាំបិតផ្គាក់ផង បាញ់ទៅផ្ទះគេបែកកញ្ចក់ រួចដើរបន្តមកដល់ឃើញឆ្កែកំពុងដេកមុខផ្ទះ ក៏កាប់ឆ្កែគេងាប់១ក្បាលទៀត រួចដើរមកវិញ កាន់ផ្គាក់ ឈរជេរគំរាមកាប់សម្លា.ប់ម្ចាស់ផ្ទះទៀត ដោយចោទថា ចេះធ្វើអំពើអាបធ្មប់ ត្រូវសមត្ថកិច្ចចុះទៅធ្វើការចាប់ឃាត់ខ្លួន ។
ហេតុការណ៍នេះ បានកើតឡើងកាលពីវេលាម៉ោង៣រសៀលថ្ងៃទី១៩ ខែឧសភា ឆ្នាំ២០២៥ នៅចំណុចមុខផ្ទះជនរងគ្រោះ ភូមិព្រែកតាអុងទី០១ សង្កាត់ពាមឧកញ៉ាអុង ក្រុងអរិយក្សត្រ ខេត្តកណ្ដាល ។
សមត្ថកិច្ចបានឲ្យដឹងថា ជនរងគ្រោះមានចំនួន០២នាក់ រួមមាន ៖
១-ឈ្មោះ ភឿន សំណាង ភេទស្រី អាយុ៤៦ ឆ្នាំ ជនជាតិខ្មែរ មុខរបរ លក់ដូរ រស់នៅ ភូមិព្រែកតាអុងទី១ សង្កាត់ពាមឧកញ៉ាអុង ក្រុងអរិយក្សត្រ ខេត្តកណ្ដាល ។
២-ឈ្មោះ សូ វិត ភេទ ប្រុស អាយុ ៣៩ឆ្នាំ មុខរបរ កម្មករសំណង់ រស់នៅភូមិព្រែកតាអុងទី១ សង្កាត់ ពាមឧកញ៉ាអុង ក្រុង អរិយក្សត្រ ខេត្ដកណ្ដាល ។
ចំណែកជនសង្ស័យមាន ឈ្មោះ ឃៀង រស្មី ហៅរស្មី ភេទប្រុស អាយុ ៣៩ឆ្នាំមុខរបរ មិនពិតប្រាកដ រស់នៅភូមិពាមឧកញ៉ាអុងទី១ សង្កាត់ពាមឧកញ៉ាអុង ក្រុងអរិយក្សត្រ ខេត្តកណ្តាល ។
ក្នុងនោះសម្ភារៈខូចខាត បង្អួចកញ្ចក់ ចំនួន ០១ផ្ទាំង និង សត្វឆ្កែងាប់ចំនួន០១ក្បាល ។ សមត្ថកិច្ចដកហូតបាន ចំពាមកៅស៊ូចំនួន ០១, ពូថៅផ្លែដែកដងឈើចំនួន០១, កាំបិតផ្កាក់ផ្លែដែកដងឫស្សី ចំនួន០១ ,(ចាប់យកពីជនសង្ស័យឈ្មោះ ឃៀង រស្មី ) ។
សូមបញ្ជាក់ថា នៅថ្ងៃទី១៩ ខែ ឧសភា ឆ្នាំ២០២៥ វេលាម៉ោង៣រសៀល ជនរងគ្រោះ នៅក្នុងផ្ទះ បានឃើញជនសង្ស័យ ដើរជេរឡូឡានៅមុខផ្ទះរបស់គាត់ ក្នុងដៃជនសង្ស័យបានកាន់ចំពាមកៅស៊ូ និងកាំបិតផ្កាក់ បន្ទាប់មកជនសង្ស័យបានយកចំពាមកៅស៊ូបាញ់ទៅលើផ្ទះឈ្មោះ ភឿន សំណាង ត្រូវបង្អួចកញ្ចក់បណ្ដាលអោយបែកចំនួនមួយផ្ទាំង ។ ក្រោយមកជនសង្ស័យ បានដើរកាន់កាំបិតផ្កាក់កាត់ផ្ទះជនរងគ្រោះម្នាក់ទៀតឈ្មោះ សូ វិត ហើយជនសង្ស័យក៏បានឃើញឆ្កែដេកនៅមុខផ្ទះ មកដល់កាប់ឆ្កែរបស់គាត់បណ្ដាលអោយងាប់ភ្លាមៗនៅនឹងកន្លែង ហើយដើរទៅផ្ទះវិញ បានបន្តិចជនសង្ស័យ បានមកឈរលើកកាំបិតផ្កាក់កាត់មុខផ្ទះរបស់ជនរងគ្រោះឈ្មោះ សូ វិត ម្តងទៀត រួចបាននិយាយថា អ្ហែងជាអ្នកធ្វើអំពើ ប្រយត្ន័អញកាប់ងាប់ ពេលនិយាយរួច ជនសង្ស័យឈ្មោះ រស្មី ក៏បានដើរទៅបាត់ទៅ ។
បន្ទាប់ពីទទួលបានពាក្យបណ្ដឹងភ្លាម សមត្ថកិច្ចបានចុះមកដល់កន្លែងកើតហេតុ បាននាំខ្លួនជនសង្ស័យឈ្មោះ ឃៀង រស្មី មកធ្វើការសាកសួរតែម្ដង ។
នៅចំពោះមុខសមត្ថកិច្ចជនសង្ស័យឈ្មោះ ឃៀង រស្មី បានសារភាពថា ខ្លួនពិតជាបានធ្វើសកម្មភាពសម្លាប់ឆ្កែ, បាញ់បង្អួចផ្ទះរបស់ជនរងគ្រោះ ចំនួន០៣លើក និងគំរាមកំហែងថា នឹងសម្លាប់ ពិតប្រាកដមែន ។
បច្ចុប្បន្ន ជនសង្ស័យ រួមជាមួយវត្ថុតាង ត្រូវបានសមត្ថកិច្ចជំនាញ នៃអធិការដ្ឋាននគរបាលក្រុងអរិយក្សត្រ កំពុងកសាងសំណុំរឿងទៅកាន់តុលាការ ចាត់ការតាមនីតិវិធីផ្លូវច្បាប់ ៕
ចែករំលែកព័តមាននេះ