ទីក្រុងអ៊ីស្តាន់ប៊ូល៖ រុស្ស៊ី និងអ៊ុយក្រែនយល់ព្រមដូរឈ្លើយសឹកគ្នាមួយពាន់នាក់ម្ខាងៗ។ ដូច្នេះ ការជួបគ្នារវាងក្រុមការងារប្រទេសទាំង២នៅតួកគីពិតជាមិនឥតប្រយោជន៍ទេ។ គ្រាន់តែថាមិនទាន់អាចសម្រេចបានកិច្ចការធំៗតែប៉ុណ្ណោះ។ ប្រធានក្រុមអ្នកចរចាខាងភាគីរុស្ស៊ីបានបង្ហើបឱ្យដឹងអំពីការត្រៀមដូរឈ្លើយសឹកបន្ទាប់ពីបិទបញ្ចប់កិច្ចជំនួបដោយផ្ទាល់នៅថ្ងៃនេះ។
បើដូច្នេះមែន វានឹងក្លាយជាការដូរឈ្លើយសឹកដ៏ច្រើនបំផុតចាប់តាំងពីក្រោយសង្គ្រាមអ៊ុយក្រែនឆ្នាំ២០២២។ រុស្ស៊ីថ្លែងថាភាគីទាំង២ក៏បានឯកភាពគ្នាថានឹងបញ្ជូនលក្ខខណ្ឌ និងសំណើឱ្យបានលម្អិតឱ្យគ្នាទៅវិញទៅមកដើម្បីយកទៅពិចារណាបង្កើតជាបទឈប់បាញ់។ តបទៅនឹងសំណើរបស់អ៊ុយក្រែនដែលចង់ឱ្យមានជំនួបកំពូលរវាងលោកហ្សេឡិនស្គី និងលោកពូទីន ខាងភាគីរុស្ស៊ីថានឹងយកសំណើនេះទៅពិចារណា។ ប៉ុន្តែរុស្ស៊ីសន្យាថាខ្លួននឹងបន្តការជួបគ្នានៅពេលក្រោយៗទៀត។
ក្រសួងការបរទេសតួកគី និងមន្ត្រីជាន់ខ្ពស់អ៊ុយក្រែនថ្លែងថាគណៈប្រតិភូប្រទេសទាំង២ជួបគ្នាមិនដល់២ម៉ោងទេ។ អ៊ុយក្រែនចោទប្រកាន់ថារុស្ស៊ីបានទាមទារឱ្យអ៊ុយក្រែនដកកងទ័ពទាំងអស់ចេញពីទឹកដីរបស់ខ្លួន (អ៊ុយក្រែន) ១ផ្នែកធំ។ ដូច្នេះ អ៊ុយក្រែនយល់ថានេះជាការទាមទារដែលមិនអាចទទួលយកបានឡើយ។ ម៉្យាងទៀត ការទាមទារនេះជារឿងថ្មីព្រោះកាលពីពេលកន្លងមក រុស្ស៊ីពុំដែលទាមទាររបៀបនេះទេ។ នេះបើតាមមន្ត្រីជាន់ខ្ពស់អ៊ុយក្រែនដែលស្នើសុំមិនបញ្ចេញឈ្មោះ។
មន្ត្រីដដែលនេះប្រាប់ថាអ៊ុយក្រែនចង់ផ្ដោតសំខាន់ទៅលើការចរចាគ្នាឱ្យមានដំណើរការរីកចម្រើនទៅមុខ។ នោះគឺការធ្វើឱ្យមានបទឈប់បាញ់ជាបន្ទាន់ និងដោះស្រាយបញ្ហាតាមមធ្យោបាយការទូត។ ពោលគឺដូចអ្វីដែលអាមេរិក និងអឺរ៉ុបធ្លាប់បានស្នើសុំ។ ប៉ុន្តែសំណើនៃបទឈប់បាញ់ត្រូវលោកពូទីនច្រានចោលព្រោះលោកចង់ដោះស្រាយឫសគល់នៃសង្គ្រាមជាមុនសិន។
បន្ទាប់ពីលោកត្រាំប្រកាសចង់ជួបលោកពូទីនទោះបីតាមទូរស័ព្ទក្ដី ឬជួបគ្នាដោយផ្ទាល់ក្ដី វិមានក្រឹមឡាំងឆ្លើយតបថារុស្ស៊ីក៏កំពុងគិតគូរអំពីបញ្ហានេះផងដែរ។ អ្នកនាំពាក្យវិមានក្រឹមឡាំង លោកប៉េស្កូស (Peskov) ទទួលស្គាល់ថាដើម្បីដោះស្រាយបញ្ហានេះជាស្ថាពរលុះត្រាតែជួបគ្នាកម្រិតកំពូលពិតមែនហើយ។ ក៏ប៉ុន្តែទន្ទឹមនឹងនោះ គេត្រូវការពេលវេលាជាច្រើនទៀតដើម្បីរៀបចំខ្លួន។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី និងប្រភពដទៃទៀត៕
ចែករំលែកព័តមាននេះ