ខេត្តបន្ទាយមានជ័យ ៖ នៅវេលាម៉ោង២០និង៣០នាទី ថ្ងៃទី១៥ ខែឧសភា ឆ្នាំ២០២៥ មូលដ្ឋានកងរាជអាវុធហត្ថក្រុងប៉ោយប៉ែត បានឃាត់ខ្លួនជនសង្ស័យ ចំនួន០១នាក់ ពាក់ព័ន្ធករណីខ្ចីម៉ូតូយកទៅលក់…
ខេត្តបន្ទាយមានជ័យ ៖ នៅវេលាម៉ោង២០និង៣០នាទី ថ្ងៃទី១៥ ខែឧសភា ឆ្នាំ២០២៥ មូលដ្ឋានកងរាជអាវុធហត្ថក្រុងប៉ោយប៉ែត បានឃាត់ខ្លួនជនសង្ស័យ ចំនួន០១នាក់ ពាក់ព័ន្ធករណីខ្ចីម៉ូតូយកទៅលក់ នៅចំណុចកាស៊ីណូហ្គោដវើល ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
ជនសង្ស័យឈ្មោះ បូ ចាន់ឌី ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបណ្ដោះអាសន្នភូមិបាលិលេយ្យ១ សង្កាត់ប៉ោយប៉ែត ក្រុងក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងថា ករណីនេះ ធ្វើឡើងតាមពាក្យបណ្ដឹងរបស់ជនរងគ្រោះ ចំនួន២នាក់ រួមមាន ៖ ១. ឈ្មោះ វិន ឆវ័ន្ត ភេទស្រី អាយុ២២ឆ្នាំ ស្នាក់នៅបន្ទប់ជួលភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។ និង២. ឈ្មោះនាង ចាន់ថា ភេទប្រុស អាយុ២៤ឆ្នាំ ស្នាក់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ត្រី នួន នីណារ៉ូ បានឱ្យដឹងទៀតថា តាមការរៀបរាប់របស់ដើមបណ្ដឹងថា កាលពីវេលាម៉ោង១០និង៣០នាទី ថ្ងៃទី១៣ ខែឧសភា ឆ្នាំ២០២៥ នៅចំណុចបន្ទប់ជួល ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ជនសង្ស័យបានខ្ចីម៉ូតូរបស់ខ្លួន ចំនួន០១គ្រឿង ម៉ាកស្កូពី ពណ៌ស ឆ្នាំផលិត២០២១។ ចំណែកដើមបណ្ដឹងម្នាក់ទៀតបានរៀបរាប់ថា នៅវេលាម៉ោង១៧ និង៣០នាទី ថ្ងៃទី១៤ ខែឧសភា ឆ្នាំ២០២៥ នៅចំណុចអគារម្ដុំច្រកទ្វារអន្តរជាតិប៉ោយប៉ែត ស្ថិតក្នុងភូមិប៉ោយប៉ែត សង្កាត់អូរជ្រៅ ក្រុងប៉ោយប៉ែត ជនសង្ស័យខាងលើ បានខ្ចីម៉ូតូរបស់ខ្លួន ម៉ាកហុងដាឌ្រីម ពណ៌ខ្មៅ ឆ្នាំផលិត២០២៥ ហើយមិនឃើញយកមកសងវិញ ទើបពួកខ្លួនទៅដាក់ពាក្យពាក្យបណ្ដឹងតែម្ដង ។
ជនសង្ស័យក្រោយឃាត់ខ្លួន និងសាកសួរ បានឆ្លើយសារភាពថា ខ្លួនពិតជាបានខ្ចីម៉ូតូរបស់ដើមបណ្ដឹងទាំងពីរនាក់ ហើយយកទៅលក់យកលុយ ដើរស៊ីចាយអស់ ពិតប្រាកដមែន ។
ដោយផ្អែកតាមពាក្យបណ្ដឹង និងចម្លើយរបស់ជនសង្ស័យ កម្លាំងជំនាញបានកសាងសំណុណរឿងបញ្ជូនមកទីបញ្ជាការកងរាជអាវុធហត្ថខេត្ត ដើម្បីអនុវត្តបន្តទៅតាមនីតិវិធី ចំណែកម៉ូតូ កម្លាំងជំនាញកំពុងស្រាវជ្រាវបន្ត ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីព្រះរាជអាជ្ញា អមសាលាដំបូងខេត្ត ផងដែរ ។
បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្តហើយ នៅរសៀលថ្ងៃសុក្រ ទី១៦ ខែឧសភា ឆ្នាំ២០២៥ ដើម្បីអនុវត្តតាមនីតិវិធី ៕
ចែករំលែកព័តមាននេះ