ខេត្តកំពង់ឆ្នាំង ៖ បុរសម្នាក់បានសង្ស័យថា ត្រូវថ្នាំសណ្ដំហើយត្រូវបានគេវាយបន្ថែម ដើម្បីយកម៉ូតូមួយគ្រឿង លុយ ទូរសព្ទ និងសម្ភារជាប់ខ្លួនមួយចំនួនអស់ពីខ្លួន ដែលហេតុការណ៍ខាងលើនេះ បានឡើងនៅវេលាម៉ោងជាង៩យប់ថ្ងៃទី…
ខេត្តកំពង់ឆ្នាំង ៖ បុរសម្នាក់បានសង្ស័យថា ត្រូវថ្នាំសណ្ដំហើយត្រូវបានគេវាយបន្ថែម ដើម្បីយកម៉ូតូមួយគ្រឿង លុយ ទូរសព្ទ និងសម្ភារជាប់ខ្លួនមួយចំនួនអស់ពីខ្លួន ដែលហេតុការណ៍ខាងលើនេះ បានឡើងនៅវេលាម៉ោងជាង៩យប់ថ្ងៃទី ១៤ ឧសភា ឆ្នាំ២០២៥ នៅ ម្ដុំសួនឆ្នាំង ក្នុងភូមិទួលក្រឡាញ់ សង្កាត់ផ្សារឆ្នាំង ក្រុងកំពង់ឆ្នាំង ។
តាមការរៀបរាប់របស់ស្ត្រីឈ្មោះ ខុង រ៉ាឌីន អាយុ៣៩ឆ្នាំ មានទីលំនៅ ភូមិក្បាលដំរី ឃុំត្រពាំងចាន់ ស្រុកបរិបូរណ៍ ត្រូវជាភរិយាជនរងគ្រោះបានឱ្យដឹងថា ប្ដីរបស់គាត់មានឈ្មោះ នុត វ៉ាន់ណេត អាយុ៤២ឆ្នាំ ជាមន្ត្រីរាជការ នៅស្រុកបរិបូណ៌ ។
នៅថ្ងៃកើតហេតុ ប្ដីគាត់បានមកប្រចាំការនៅខេត្តកំពង់ឆ្នាំង ។ លុះម៉ោងប្រមាណជាង១១យប់ គាត់បានទទួលព័ត៌មានពីក្រុមការងារប្រាប់ថា ប្ដីគាត់ត្រូវគេវ៉ៃប្លន់យកម៉ូតូ និងសម្ភារៈអស់ពីខ្លួន និងត្រូវបានគេដឹកបញ្ជូនទៅសង្គ្រោះនៅមន្ទីរពេទ្យខេត្តកំពង់ឆ្នាំង ។ ក្រោយពេលមក ដល់ជួបប្ដីគាត់គឺឃើញមានរងរបួសពេញផ្ទៃមុខ និងនិយាយរវើរវាយ ថែមទាំងមិនស្គាល់គាត់ជាប្រពន្ធទៀតផង ដែលគ្រូពេទ្យបញ្ជាក់ថា ត្រូវថ្នាំសណ្ដំខ្លាំងណាស់ ។
នៅព្រឹកថ្ងៃទី១៥ ឧសភា ឆ្នាំ២០២៥ ប្ដីគាត់ហាក់មានអារម្មណ៍ដឹងខ្លួនខ្លះៗប្រាប់ថា នៅល្ងាចថ្ងៃកើតហេតុ ក្រោយពីហូបបាយរួចសម្រាកបន្តិច លុះម៉ោង៩យប់ ហាក់អស់កម្លាំងគាត់ក៏បានជិះម៉ូតូ១គ្រឿងទៅហូបបាយឆានៅសួនឆ្នាំង ក្នុងភូមិទួលស្រលាញ់ ។ លុះពេលកំពុងហូបបាយឆាក៏បានជួបនារីម្នាក់ដែលធ្លាប់ស្គាល់គ្នា ព្រោះនាងតែងតែទៅហូបសាច់គោអាំង បុកល្ហុង នៅផ្ទះរបស់គាត់ ឯភូមិក្បាលដំរី ឃុំត្រពាំងចាន់ (ផ្ទះគាត់ជាអ្នកលក់បុកល្ហុងសាច់គោអាំងនិងភេសជ្ជៈ) ។
ពេលស្គាល់គ្នាជាមួយប្ដីគាត់ នាងបានប្រាប់ថា នាងជាអ្នកបម្រើការងារនៅហាងផឹកស៊ីយីហោ សម្រស់កំពង់ឆ្នាំង ។ ប្រភពពីស្ត្រីជាភរិយាបន្តដោយស្រង់សម្ដីរបស់ប្ដីគាត់ថា នៅពេលជួបគ្នានារីដែលអះអាងថា ជាបម្រើការនៅហាងផឹកស៊ីយីហោ សម្រស់កំពង់ឆ្នាំង បានបបួលប្ដីគាត់ផឹកស្រាបៀមួយយួរ ។
ពេលផឹកស៊ីមានតែពីរនាក់ទេ ស្រាប់តែប្តីគាត់ផឹកបានបន្តិច ប្ដីគាត់មានអាការៈដូចជាត្រូវថ្នាំ រំពេចនោះ ស្រាប់តែមានម៉ូតូ២ ទៅ៣គ្រឿង បានមកព័ទ្ធនិងចាប់វាយប្ដីគាត់ យករបស់របរពីប្ដីគាត់អស់រលីងពីខ្លួន ។ ពេលអស់របស់ពីខ្លួន ប្ដីគាត់បានដើរមកដល់មុខស្ថានីយប្រេងសូគីមិច នៅភូមិទួលក្រឡាញ់ ហើយត្រូវក្រុមល្បាតឃើញនិងស្គាល់បុរសរងគ្រោះក៏បានដឹកយកមកសង្គ្រោះនៅមន្ទីរពេទ្យខេត្ត ហើយក៏ផ្ដល់ដំណឹងទៅគាត់ជាភរិយា។
ចំពោះសម្ភារបាត់បង់មានលុយខ្មែរ៨០ម៉ឺនរៀល, ទូរស័ព្ទម៉ាក oppo តម្លៃ៣២០មួយគ្រឿង អាយកូម១គ្រឿង និងម៉ូតូម៉ាកហុងដាទ្រីម ពាក់ស្លាកលេខពោធិ៍សាត់ 1M.7512 មួយគ្រឿង ។ ប្រភពពីសមត្ថកិច្ចនៅកន្លែងកើតហេតុបានឲ្យដឹងថា រហូតមកដល់វេលាម៉ោង១២ថ្ងៃត្រង់នេះ នៅមិនទាន់បានទទួលព័ត៌មានជាក់លាក់ពីកន្លែងកើតហេតុនៅឡើយទេ តែមុនពេលកើតហេតុ គេបានឃើញជនរងគ្រោះអង្គុយផឹកស៊ីជាមួយនារីម្នាក់នៅសួនច្បារនិមិត្តសញ្ញាឆ្នាំងពិតមែន ។
ទោះយ៉ាងនេះក្តី សមត្ថកិច្ចបានសុំពេលវេលា ដើម្បីពិនិត្យកាមេរ៉ាសុវត្ថិភាពសិន ព្រោះតាមការសង្ស័យរបស់សមត្ថកិច្ច សកម្មភាពវាយកម៉ូតូនិងរបស់របរពីជនរងគ្រោះ មិនអាចធ្វើនៅកន្លែងផឹកស៊ីនោះបានទេ ព្រោះមានមនុស្សច្រើន ។ តែអាចសង្ស័យថា ជនរងគ្រោះ ក្នុងពេលផឹកស៊ីអាចនឹងត្រូវថ្នាំសណ្ដំរបស់ក្រុមជនសង្ស័យដាក់ក្នុងស្រាបៀរ ឬ(អាចដល់ការមឹមទឹកដោះគោស្រស់) ហើយនៅពេលដឹងថា ត្រូវថ្នាំហើយ ពួកគេដឹកជនរងគ្រោះទៅធ្វើកម្មភាពនៅកន្លែងផ្សេង ។
មានព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ