រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌ៧មករា បានចុះត្រួតពិនិត្យដល់ក្រុមអាជីវកលក់ទុរេន នៅកំណាត់ផ្លូវព្រះសីហនុ ក្បែរនឹងស្តុបអាគារ៤២ជាន់ មូលដ្ឋានខណ្ឌ៧មករា មិនអនុញ្ញាតឲ្យបន្តលក់នៅមុខអាគារទូរគមនាគមន៍កម្ពុជា ទៀតឡើយ ។…
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌ៧មករា បានចុះត្រួតពិនិត្យដល់ក្រុមអាជីវកលក់ទុរេន នៅកំណាត់ផ្លូវព្រះសីហនុ ក្បែរនឹងស្តុបអាគារ៤២ជាន់ មូលដ្ឋានខណ្ឌ៧មករា មិនអនុញ្ញាតឲ្យបន្តលក់នៅមុខអាគារទូរគមនាគមន៍កម្ពុជា ទៀតឡើយ ។
នាល្ងាចថ្ងៃទី១០ ខែឧសភា ឆ្នាំ២០២៥នេះ ជាថ្ងៃផុតឱសានវាទ កំណត់ត្រឹមតែ០៣ថ្ងៃ និងមានការណែនាំពីសំណាក់លោក ថេង សុថុល អភិបាលខណ្ឌ៧មករា អនុញ្ញាតឲ្យលោក ណុប ផា អភិបាលរង ដឹកនាំកម្លាំងគណៈបញ្ជាការឯកភាពខណ្ឌ៧មករា ចុះត្រួតពិនិត្យ និងមិនអនុញ្ញាតដល់អាជីវកលក់ទុរេន នៅកំណាត់វិថីព្រះសីហនុ បន្តការធ្វើអាជីវកម្មយ៉ាងអនាធិបតេយ្យ បង្កភាពរញ៉េរញ៉ៃ ធ្វើឱ្យខូចសណ្តាប់ធ្នាប់សាធារណៈ និងប៉ះពាល់ដល់សោភ័ណភាពទីតាំងអគារទូរគមនាគមន៍កម្ពុជា ទៀតទេ ។
លោក ណុប ផា អភិបាលរងខណ្ឌ៧មករា បានឲ្យដឹងថា កម្លាំងគណៈបញ្ជាការឯកភាពខណ្ឌ នឹងចុះត្រួតពិនិត្យមើលជាប់ជាប្រចាំ តាមកំណាត់វិថីព្រះសីហនុ ទាំងអាជីវកលក់ទុរេន អាជីវករលក់គុយទាវ បាយឆា និងអាជីវលក់ម៉ូតូជាដើម ដើម្បីរក្សាសណ្ដាប់ធ្នាប់សាធារណៈ បរិស្ថានអនាម័យ ឲ្យមានភាពល្អប្រសើរ សូមឲ្យក្រុមអាជីវក ទាំងអស់ ប្រកបអាជីវកម្មតាមការអនុញ្ញាតរបស់អាជ្ញាធរ ជាពិសេស តាមការ៉ូឡាពណ៌លឿន កំណត់ព្រំ មានស្រាប់ ។
គួរបញ្ជាក់ផងដែរ វេលាម៉ោង៦និង៣០នាទីល្ងាចថ្ងៃទី០៧ ខែឧសភា ឆ្នាំ២០២៥ រដ្ឋបាលខណ្ឌ៧មករា បានចុះអប់រំ និងធ្វើកិច្ចសន្យានេះ ទុករយៈពេល០៣ថ្ងៃ ដល់ក្រុមអាជីវករលក់ទុរេន ឲ្យបញ្ឈប់ការធ្វើអាជីវកម្មលក់នៅកំណាត់វិថីព្រះសីហនុនេះ ។
លោកអភិបាលរងខណ្ឌ៧មករា បានបញ្ជាក់ថា ដោយមានការសំណូមពរពីអគ្គាធិការដ្ឋាន នៃទូរគមនាគមន៍កម្ពុជា ដល់អាជ្ញាធរមូលដ្ឋាន ពីបញ្ហាក្រុមអាជីវកលក់ធុរេន ធ្វើអាជីវកម្មការចតរថយន្ត ឬរទេះ និងតាំងលក់ដូរ យ៉ាងអនាធិបតេយ្យ បង្កភាពរញ៉េរញ៉ៃ ធ្វើឱ្យខូចសណ្តាប់ធ្នាប់សាធារណៈ និងប៉ះពាល់ដល់សោភ័ណភាពទីតាំងអគារ សុំឲ្យបញ្ឈប់ការលក់ដូរបែបនេះ និងសំណូមពរឲ្យទៅរកទីតាំងផ្សេង ។
សូមបញ្ជាក់ថា ទីតាំងដែលក្រុមអាជីវកលក់ធុរេននោះ ស្ថិតនៅមុខអគារទូរគមនាគមន៍កម្ពុជា ជាសហគ្រាសសាធារណៈរបស់រដ្ឋ មានអាសយដ្ឋានលេខ ៩៥-៩៧ វិថីព្រះសីហនុ កែងផ្លូវ១០៥ ភូមិ០១ សង្កាត់បឹងព្រលឹត ខណ្ឌ៧មករា រាជធានីភ្នំពេញ ៕
ចែករំលែកព័តមាននេះ