ទីក្រុងប៊ែឡាំង៖ ដំណឹងល្អ, នៅទីបំផុត លោកហ្វ្រីតរីចមើស (Friedrich Merz) ទទួលបានសំឡេងគាំទ្រគ្រប់គ្រាន់ពីរដ្ឋសភាដើម្បីក្លាយជាអធិការបតីអាល្លឺម៉ង់នៅអាណត្តិថ្មីហើយ។ ការទទួលជោគជ័យលើកនេះកើតឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីលោកត្រូវបានបោះឆ្នោតជំទាស់កាលពីពេលស្នើបេក្ខភាពលើកទី១។ លទ្ធផលឆ្នោតលើកទី២បង្ហាញថា អ្នកតំណាងរាស្ត្រ២៣៥រូបបានបោះឆ្នោតផ្ដល់សេចក្ដីទុកចិត្តទៅលើលោកមើស។ ដូច្នេះលើសពីចំនួនកំណត់ទៅទៀត។
ជាគោលការណ៍ លោកមើសត្រូវការសំឡេងគាំទ្រ៣១៦នៅក្នុងចំណោមអ្នកតំណាងរាស្ត្រសរុប៣៦០រូបដើម្បីក្លាយជាអធិការបតីអាល្លឺម៉ង់នៅអាណត្តិថ្មី។ ដោយសារលើកទី១ជាការបោះឆ្នោតសម្ងាត់ ដូច្នេះគេមិនបានដឹងថាតើអ្នកតំណាងរាស្ត្ររូបណានៅក្នុងគណបក្សសម្ព័ន្ធភាពជាមួយគ្នាបានបោះឆ្នោតប្រឆាំងនឹងលោកមើសទេ។ នៅក្នុងសម័យអន្តរកាលនេះ លោកអូឡាហ្វសូលត្រូវកាន់តំណែងជាអធិការបតីចាំផ្ទះជាបណ្ដោះអាសន្នរហូតដល់លោកមើសស្បថចូលកាន់តំណែង។
រដ្ឋាភិបាលចម្រុះរបស់លោកមើសដែលត្រៀមបង្កើតនាពេលខាងមុខនេះដឹកនាំដោយគណបក្សស្ដាំនិយមកណ្ដាល សម្ព័ន្ធប្រជាធិបតេយ្យគ្រីស្ទាន (right Christan Democratic Union) រួមជាមួយគណបក្សសម្ព័ន្ធសង្គមនិយមគ្រីស្ទាន (Christian Social Union) និងគណបក្សប្រជាធិបតេយ្យសង្គមនិយមរបស់លោកអូឡាហ្វសូលដែលជាបក្សឆ្វេងនិយមកណ្ដាល។
បន្ទាប់ពីប្រកាសរៀបចំការបោះឆ្នោតផ្ដល់សេចក្ដីទុកចិត្តពីសភានៅវគ្គទី២ ប្រធានរដ្ឋសភាប្រកាសថាទ្វីបអឺរ៉ុប ឬអាចពិភពលោកទាំងមូលកំពុងតាមតាមដានលទ្ធផលឆ្នោតនេះ។ ក្រៅពីមានប្រជាជនច្រើនជាងគេ និងមានសេដ្ឋកិច្ចធំជាងគេនៅសហភាពអឺរ៉ុប ប្រទេសអាល្លឺម៉ង់ក៏ជាប្រទេសធំមួយដែរនៅលើពិភពលោក។ គ្រាន់តែមិនមែនមហាអំណាចធំដល់កម្រិតរុស្ស៊ី និងអាមេរិក។
កិច្ចការនៅចំពោះមុខរបស់អធិការបតីថ្មីគឺការចូលរួមដោះស្រាយបញ្ហាសង្គ្រាមអ៊ុយក្រែន និងការទប់ទល់នឹងនយោបាយដំឡើងពន្ធរបស់លោកត្រាំ។ ចំណែកនយោបាយផ្ទៃក្នុងជាតិគឺការទប់ទល់នឹងនយោបាយជាតិនិយមចង្អៀតចង្អល់របស់គណបក្សស្ដាំនិយមជ្រុលដែលប្រឆាំងនឹងជនអន្តោប្រវេសន៍។ នេះបើយោងតាមការដកស្រង់ប្រភពពីអេភី និងប្រភពដទៃទៀត៕
ចែករំលែកព័តមាននេះ