រាជធានីភ្នំពេញ ៖ ប្រធានក្រុមសហគមន៍ចាប៉ីអមតៈ លោក ពេជ្រ សារ៉ាត បានគូសបញ្ជាក់ថា ការសម្តែងទង្រង់សិល្បៈចាប៉ីដងវែងនៅលើផ្លូវ Walk Street…
រាជធានីភ្នំពេញ ៖ ប្រធានក្រុមសហគមន៍ចាប៉ីអមតៈ លោក ពេជ្រ សារ៉ាត បានគូសបញ្ជាក់ថា ការសម្តែងទង្រង់សិល្បៈចាប៉ីដងវែងនៅលើផ្លូវ Walk Street រាជធានីភ្នំពេញ គឺជាការចូលរួមផ្សព្វ ផ្សាយ នូវទម្រង់សិល្បៈបុរាណខ្មែរដ៏ចំណាស់មួយនេះឲ្យកាន់តែទូលំទូលាយ ជាពិសេសនោះ ក៏ជាការផ្តល់ឱកាសសម្រាប់សិល្បករជំនាន់ក្រោយបញ្ចេញសមត្ថភាពរបស់ខ្លួនផងដែរ ។
ថ្លែងប្រាប់កោះសន្តិភាព លោក ពេជ្រ សារ៉ាត បានអះអាងថា សម្រាប់ការសម្តែងចាប៉ីរបស់ក្រុមលោកនៅផ្លូវថ្មើរជើង លោកសង្កេតឃើញប្រជាពលរដ្ឋមានការចាប់អារម្មណ៍ខ្លាំង ហើយតាមរយៈផ្លូវថ្មើជើងនេះដែរ ក៏ជាកម្លាំងចលករមួយនៅក្នុងការចូលរួមផ្សព្វផ្សាយពីចាប៉ីដងវែងទៅកាន់ភ្ញៀវជាតិ អន្តរជាតិបានឃើញ និងបានយល់កាន់តែច្បាស់ ។
លោកថា យើងបានពន្យល់ និងប្រាប់ពួកគាត់ថា ចាប៉ីដងវែងនេះ បានចូលជាបេតិកភណ្ឌរបស់ពិភពលោកតាំងពីឆ្នាំ២០១៦ ដែល រហូតមកទល់នាពេលនេះ មានរយៈពេលប្រមាណ៩ឆ្នាំហើយ ពេលនោះ ពួកគាត់សប្បាយចិត្ត និងបានសុំថតរូបជាមួយយើងនោះគឺពិសេសមែនទែន ដែលជាសេចក្តីរំភើបក្នុងនាមជាសិល្បៈករ និងជាប្រធានក្រុមនៃចាប៉ីដងវែង ។
លោកថា ដំបូងពេលខ្ញុំចុះទៅសម្តែង គឺខ្ញុំមានអារម្មណ៍ថា អៀនខ្មាស់ប្រជាពលរដ្ឋ ប៉ុន្តែពេលមានប្រជាពលរដ្ឋសួរនាំច្រើនទៅមួយម៉ៅង ឬពីរម៉ោងក្រោយមក យើងលែងអៀន ហើយក៏ក្លាយទៅជាការបណ្តុះស្មារតីស្រឡាញ់ ស្នេហាវប្បធម៌រួបរួម និងលើកស្ទួយ ។ ប្រជាពលរដ្ឋលោកបានមកសុំថតរូប ហើយអ្នកខ្លះក៏បានផ្តល់ជាបច្ច័យ ដើម្បីរួមចំណែកលើកស្ទួយសិល្បៈចាប៉ី ដែលសកម្មភាពមួយនេះ ស្តែងឲ្យឃើញពីការចូលចិត្ត និងស្រឡាញ់លើសិល្បៈចាប៉ីដងវែង ។
លោកបញ្ជាក់ថា ពេលខ្លះ ពួកគាត់មិនដឹងថា ទៅមើល និងស្តាប់ ស្វែងយល់ពីចាប៉ីដងវែងនៅឯណា តែដល់ពេលយើងដាក់ការសម្តែងជាសាធារណៈ និងតាំងបង្ហាញចាប៉ីនៅតាមផ្លូវថ្មើជើងនាពេលនេះ គឺធ្វើឲ្យមានភាពត្រចះត្រចង់នេះកើតឡើង និងងាយស្រួលសម្រាប់ពួកគាត់ ។
លោកបន្ថែមថា អ្វីដែលលោកកាន់តែរំភើបថែមទៀតនោះ គឺលោកបានមើលឃើញកុមារក៏មានការចាប់អារម្មណ៍ ដោយពួកគេបានកាន់ និងថតរូបជាមួយចាប៉ីដងវែង ដែលនេះជាស្មារតីយ៉ាងត្រចះត្រចង់ និងល្អប្រសើរយ៉ាងខ្លាំង ។
លោក ពេជ្រ សារ៉ាត បានអះអាងបន្ថែមថា សម្រាប់ការសម្តែងនៅផ្លូវថ្មើជើងនេះដែរ វាក៏ជាឱកាសសម្រាប់ប្អូនៗសិល្បៈជំនាន់ក្រោយ ដែលមានបំណងចង់បញ្ចេញទឹកដៃនោះគឺអាចមកចូលរួមជាមួយលោកផ្ទាល់ ខណៈពេលដែលការជួបជុំនេះក៏ជាការកសាងទំនាក់ទំនងល្អជាមួយគ្នាផងដែរ ។
យ៉ាងណា បើតាមលោក ពេជ្រ សារ៉ាត លោកបានសម្តែងការអរគុណទៅដល់សាលារាជធានីភ្នំពេញ និងមន្ទីរវប្បធម៌រាជធានីភ្នំពេញដែលបានរៀបចំ និងផ្តល់ឱកាសឲ្យក្រុមរបស់លោកចូលរួមសម្តែងនៅតាមផ្លូវថ្មើរជើងដែលកំពុងក្លាយជាទីចាប់អារម្មណ៍យ៉ាងខ្លាំងពីភ្ញៀវជាតិ និងអន្តរជាតិនាពេលបច្ចុប្បន្ននេះ ៕
ចែករំលែកព័តមាននេះ