ខេត្តកំពង់ចាម ៖ បុរសជាអ្នករើសអេតចាយពីរនាក់ គេឧស្សាហ៍ឃើញដេកនៅចិញ្ចើមផ្លូវនិងបានបង្កហឹង្សា ដោយបុរសម្នាក់យកកាំបិតមុខសស្ងាចចាក់ត្រូវពោះបុរសម្នាក់ទៀត បណ្ដាលឱ្យស្លាប់ក្នុងថ្លុកឈាមនៅបរិវេណក្រៅរបងផ្សារបឹងកុក ក្រុងកំពង់ចាម ដែលហេតុការនេះបានកើតឡើងនៅវេលាម៉ោងជិត១១ព្រឹកថ្ងៃទី៤ ឧសភា ឆ្នាំ២០២៥…
ខេត្តកំពង់ចាម ៖ បុរសជាអ្នករើសអេតចាយពីរនាក់ គេឧស្សាហ៍ឃើញដេកនៅចិញ្ចើមផ្លូវនិង
បានបង្កហឹង្សា ដោយបុរសម្នាក់យកកាំបិតមុខសស្ងាចចាក់ត្រូវពោះបុរសម្នាក់ទៀត បណ្ដាលឱ្យស្លាប់ក្នុងថ្លុកឈាមនៅបរិវេណក្រៅរបងផ្សារបឹងកុក ក្រុងកំពង់ចាម ដែលហេតុការនេះបានកើតឡើងនៅវេលាម៉ោងជិត១១ព្រឹកថ្ងៃទី៤ ឧសភា ឆ្នាំ២០២៥ ។ ជុំវិញករណីនេះត្រូវបានគេសង្ស័យថាផ្តើមចេញពីរឿងស្នេហាត្រីកោណ ហើយទីបំផុតជនដែលចាក់គេស្លាប់នោះត្រូវបានសមត្ថកិច្ចតាមចាប់ខ្លួនបានភ្លាមៗ បញ្ជូនមកអធិការដ្ឋាននគរបាលក្រុងកំពង់ចាមដើម្បីសួរនាំ។
តាមសាក្សីនៅកន្លែងកើតហេតុបានឲ្យដឹងថា ជារឿយៗគេតែងតែឃើញបុរសជាអ្នករើសអេតចាយពីរនាក់តែងតែនាំគ្នាដេកនៅម្តុំផ្សារបឹងកុករួមជាមួយនឹងស្ត្រីម្នាក់ទៀត ដែលមានសតិមិនគ្រប់។ជាក់ស្ដែង នៅព្រឹកថ្ងៃកើតហេតុ បុរសជាអ្នករើសអេតចាយទាំងពីរនាក់ស្រវឹងស្រាបានឈ្លោះប្រកែកគ្នា និងវាយគ្នាទៅវាយមក ហើយត្រូវបានបុរសចំណាស់ម្នាក់ចូលទៅឃាត់ នៅចំណុចក្រៅរបងបរិវេណមន្ទីរសុរិយោដីខេត្តកំពង់ចាម។
តាមប្រភពដដែលបន្តឲ្យដឹងទៀតថា ដោយសារតែមិនអស់ចិត្តអស់ចង់ បុរសទាំងពីរនាក់នោះបានបន្តឈ្លោះគ្នាតាមដងផ្លូវប្រកែកទៅប្រកែកមក លុះដើរមកដល់មុខផ្ទះប្រជាពលរដ្ឋ ត្រូវម្ចាស់ផ្ទះគេឃើញក៏បានដេញ ហើយក៏នាំគ្នាដើរតម្រង់មកផ្សារបឹងកុក ក្រុងកំពង់ចាម ។ លុះមកដល់ត្រង់ផ្លូវកែងបំបែកជាបីឮសូរសំឡេងប្រកែកខ្លាំងទៅៗ ពេលនោះស្រាប់តែបុរសជាអ្នករើសអេតចាយម្នាក់ មានកាំបិតបានចាក់ទៅលើបុរសម្នាក់ទៀតត្រូវចំពោះបណ្ដាលឲ្យស្លាប់ក្នុងប្លុកឈាម ។
ជាមួយនោះ គេបានឃើញស្ត្រីដែលមានសតិមិនគ្រប់បានឃាត់កុំឲ្យឈ្លោះគ្នាក្នុងហេតុការណ៍នេះដែរ តែបុរសទាំងពីរនោះមិនយកត្រចៀកស្ដាប់។ ករណីជម្លោះបង្កហិង្សារហូតឈានដល់ការចាក់គ្នា បណ្តាលឱ្យស្លាប់ម្នាក់បែបនេះ ត្រូវបានគេសង្ស័យថាអាចផ្ដើមចេញពីបុរសដែលស្លាប់នោះបានស្រឡាញ់ស្រីកំណានចិត្តរបស់គេ ទើបមានរឿងហេតុបែបនេះកើតឡើងនេះ ។ នៅក្នុងហេតុការណ៍ពេលដែលកំពុងឈ្លោះគ្នានោះមិនមានអ្នកណាម្នាក់ហ៊ានចូលទៅឃាត់នោះទេ ។ ដោយសារតែឃើញបុរសម្នាក់កាន់កាំបិតមុខសស្ងាច បើហ៊ានចូលទៅឃាត់មិនស្រួលអាចគ្រោះថ្នាក់ដល់អ្នកចូលទៅជួយទៀត។
ចំណែកសមត្ថកិច្ចវិញបានប្រាប់ឲ្យដឹងដែរថា ក្រោយពីហេតុការណ៍អំពើហិង្សាឈានចាក់មនុស្សស្លាប់បែបនេះត្រូវបានកម្លាំងប៉ុស្តិ៍រដ្ឋបាលសង្កាត់កំពង់ចាមសហការជាមួយជំនាញព្រហ្មទណ្ឌនៃអធិការដ្ឋានក្រុងកំពង់ចាមចុះដល់កន្លែងកើតហេតុហើយតាមចាប់បុរសជនដៃដល់ក្លាយជាឃាតករឈ្មោះនេត ណាក់ អាយុ៣៨ឆ្នាំ ហើយបុរសរងគ្រោះដែលស្លាប់មិនត្រូវបានគេស្គាល់អត្តសញ្ញាណនោះទេហើយជារឿយៗតែងតែនាំគ្នាដេកនៅម្ដុំផ្សារបឹងកុកនិងដើររើសអេតចាយ។ដោយបានសួរនាំសាក្សីនិងតាមប្រមាញ់ចាប់បានឃាតករជាអ្នកចាក់នោះភ្លាមៗ រួចបញ្ជូនមកកាន់អធិការដ្ឋាននគរបាលក្រុងកំពង់ចាមដើម្បីសួរនាំបំពេញបែបបទតាមនីតិវិធី ៕
ចែករំលែកព័តមាននេះ