រថយន្តដឹកគ្រឿងចក្រ កៀរបង្គោលភ្លើងបំភ្លឺផ្លូវ បាក់អស់២ដើម
រាជធានីភ្នំពេញ ៖ រថយន្តប្លាដឺហ្វ័ម ១គ្រឿង ដឹកគ្រឿងចក្រឈូសដី (អាប៊ុល) ១គ្រឿង ពីលើហើយ បានបើកបរកៀកនឹងទ្រូងផ្លូវ ជាហេតុធ្វើឲ្យប៉ែលអាប៊ុលដែក…
រាជធានីភ្នំពេញ ៖ រថយន្តប្លាដឺហ្វ័ម ១គ្រឿង ដឹកគ្រឿងចក្រឈូសដី (អាប៊ុល) ១គ្រឿង ពីលើហើយ បានបើកបរកៀកនឹងទ្រូងផ្លូវ ជាហេតុធ្វើឲ្យប៉ែលអាប៊ុលដែក លៀនចេញពីរថយន្តម្ខាងខាងប្រមាណកន្លះម៉ែត្រ កៀរបង្គោលភ្លើងបំភ្លឺផ្លូវ ដែលស្ថិតនៅចន្លោះរបាំងថ្មពុះចែកទ្រូងផ្លូវ បណ្ដាលឲ្យបាក់អស់ ២ដើម ។
ហេតុការណ៍នោះ បានកើតឡើងកាលពីវេលាម៉ោង២និង៥០នាទីរសៀលថ្ងៃទី២ ខែឧសភា ឆ្នាំ២០២៥ នៅតាមផ្លូវជាតិលេខ២ ស្ថិតនៅក្នុងភូមិព្រែកថ្លឹង សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
រថយន្តប្លាដឺហ្វ័មខាងលើនោះ ម៉ាក DEAWOO ពណ៍លឿងទុំ ពាក់ស្លាកលេខភ្នំពេញ 2F-7473 បើកបរដោយបុរសមិនស្គាល់អត្តសញ្ញាណម្នាក់ ហើយក្រោយពេលកើតហេតុ ត្រូវបាននគរបាលឃាត់ទាំងរថយន្ត និងអ្នកបើកបរ ។
សមត្ថកិច្ច បានប្រាប់ឲ្យដឹងថា នៅមុនពេលកើតហេតុ រថយន្តនោះបានដឹកគ្រឿងចក្រឈូសដី (អាប៊ុល) ១គ្រឿងម៉ាក SHANTUI ពណ៍លឿង បើកបរធ្វើដំណើរក្នុងទិសដៅពីលិចទៅកើត តាមផ្លូវជាតិលេខ២ និងក្នុងល្បឿនលឿនថែមទៀតផង។ ដោយខណៈនោះ បានបើកកៀកនឹងទ្រូងផ្លូវ ហើយដោយសារតែគ្រឿងចក្រនោះធំជាងរថយន្ត បានធ្វើឲ្យប៉ែលលៀនចេញពីរថយន្តម្ខាងៗ ប្រវែងប្រមាណកន្លះម៉ែត្រ ហើយប៉ែលអាប៊ុលនោះ ក៏បានកៀរបង្គោលភ្លើងបំភ្លឺផ្លូវ ដែលស្ថិតនៅចន្លោះរបាំងថ្មពុះចែកទ្រូងផ្លូវ បណ្ដាលឲ្យបាក់អស់២ដើមជាបន្តបន្ទាប់តែម្ដង ។
សមត្ថកិច្ចបានបញ្ជាក់ថា នេះគឺជាការធ្វើប្រហែសរបស់អ្នកបើកបរ និងក្រុមការងារគ្រឿងចក្រខាងលើ ហើយក្រោយពេលកើតហេតុនគរបាលប៉ុស្តិ៍ព្រែកកំពឹស បានចុះទៅឃាត់ទាំងអ្នកបើកបរ និងរថយន្តរួចប្រគល់ជូននគរបាលការិយាល័យចរាចរផ្លូវគោក នៃស្នងការដ្ឋាននគរបសលរាជធានីភ្នំពេញ ដើម្បីចាត់ការបន្ត ៕
ចែករំលែកព័តមាននេះ