ទីក្រុងបាងកក ៖ យោងតាមសមាគមសណ្ឋាគារថៃ ហៅកាត់ថា THA កាលពីពេលថ្មីៗនេះបានប៉ាន់ប្រមាណថា ភ្ញៀវទេសចរប្រហែល ៦៨៩,០០០នាក់ ឬតិចជាងនេះត្រូវបានគេរំពឹងទុកអំឡុងពេលពិធីបុណ្យសង្ក្រាន្តឆ្នាំនេះ ខណៈដែលការកក់សណ្ឋាគារសម្រាប់ពិធីបុណ្យរយៈពេល៧ថ្ងៃ…
ទីក្រុងបាងកក ៖ យោងតាមសមាគមសណ្ឋាគារថៃ ហៅកាត់ថា THA កាលពីពេលថ្មីៗនេះបានប៉ាន់ប្រមាណថា ភ្ញៀវទេសចរប្រហែល ៦៨៩,០០០នាក់ ឬតិចជាងនេះត្រូវបានគេរំពឹងទុកអំឡុងពេលពិធីបុណ្យសង្ក្រាន្តឆ្នាំនេះ ខណៈដែលការកក់សណ្ឋាគារសម្រាប់ពិធីបុណ្យរយៈពេល៧ថ្ងៃ ពោលពីថ្ងៃទី១១ដល់១៧ ខែមេសា នៅក្នុងទីក្រុងទាក់ទាញទេសចរណ៍សំខាន់ៗចំនួន ៧ បានធ្លាក់ចុះ ២៥% បើធៀបនឹងឆ្នាំមុន។
ប្រភពពីសារព័ត៌មានថៃ The Nation បានឱ្យដឹងថា ការធ្លាក់ចុះការកក់សណ្ឋាគារនេះ គឺដោយសារការព្រួយបារម្ភអំពីសុវត្ថិភាពក្នុងចំណោមភ្ញៀវថៃ និងភ្ញៀវបរទេស បន្ទាប់ពីការរញ្ជួយដីនៅប្រទេសមីយ៉ាន់ម៉ាកាលពីថ្ងៃទី២៨ ខែមីនា បណ្តាលឱ្យមានការរញ្ជួយយ៉ាងខ្លាំងក្នុងតំបន់ភាគខាងជើង និងកណ្តាលប្រទេសថៃ។
លោក ធានប្រាសិទ្ធ ឆៃយ៉ាផាត្រាណាន (Thienprasit Chaiyaphatranan) ប្រធាន THA បានបង្ហាញថា សមាគមបានធ្វើការស្ទង់មតិលើសណ្ឋាគារចំនួន ៥២ ក្នុងតំបន់ទេសចរណ៍ពេញនិយមចំនួន ៧ រួមមាន ទីក្រុងបាងកក ខេត្តក្រាប៊ី ឈុនបុរី ឈៀងរ៉ៃ ឈៀងម៉ៃ ភូកេត និងស៊ូរ៉ាត់ថានី ជាលទ្ធផលបានបង្ហាញពីការធ្លាក់ចុះ ២៥% នៃការកក់សណ្ឋាគារសម្រាប់ថ្ងៃទី ១១ដល់១៧ ខែមេសា ឆ្នាំនេះ ធៀបនឹងរយៈពេលដូចគ្នាកាលពីក្នុងឆ្នាំមុន។ ការកក់ទុករបស់ភ្ញៀវទេសចរបរទេសក៏មានការថយចុះដែរ សរុបមានចំនួន ៣២,២៤៤បន្ទប់ត្រូវបានកក់ទុកសម្រាប់ពិធីសង្ក្រាន្តឆ្នាំថ្មី បើធៀបនឹង ៤២,៧៦១បន្ទប់អំឡុងពេលដូចគ្នា កាលពីឆ្នាំមុន។
THA បានបន្ថែមទៀតថា ភ្ញៀវទេសចរបរទេសចំនួន ២,០៦៧,៨៤៦នាក់ត្រូវបានរំពឹងថា នឹងមកលេងប្រទេសថៃក្នុងខែមេសា ឆ្នាំនេះ ជាការថយចុះពីចំនួន ២,៧៥៧,១២៨នាក់ក្នុងខែមេសា កាលពីឆ្នាំមុន។ ប្រធាន THA បាននិយាយថា ការរំពឹងទុកមួយបានបង្ហាញថា សង្ក្រាន្តឆ្នាំនេះ នឹងមិនមានភាពរស់រវើកដូចឆ្នាំមុនទេ ដែលនេះជារយៈពេលក្រោយការបើកប្រទេសឡើងវិញ បន្ទាប់ពីជំងឺរាតត្បាតកូវីដ១៩។
ជាមួយគ្នានោះ លោកបានជំរុញឱ្យរដ្ឋាភិបាលជំរុញវិស័យទេសចរណ៍ឱ្យបានឆាប់រហ័ស ជាពិសេសទីផ្សារក្នុងស្រុក និងពន្លឿនកម្មវិធីឧបត្ថម្ភធនទេសចរណ៍ឱ្យបានលទ្ធផលជាក់ស្តែង ដើម្បីដោះស្រាយកង្វល់សុវត្ថិភាពរបស់អ្នកទេសចរទាក់ទងនឹងសណ្ឋាគារ ជាពិសេសបន្ទាប់ពីការរញ្ជួយដី។ THA ក៏កំពុងស្នើសុំផ្ទាំងវិញ្ញាបនប័ត្របញ្ពាក់អំពីសុវត្ថិភាពសម្រាប់សណ្ឋាគារ ដែលឆ្លងកាត់ការត្រួតពិនិត្យដោយអាជ្ញាធរពាក់ព័ន្ធផងដែរ ដែលស្រដៀងទៅនឹងស្ទីគ័រ SHA+ ដែលចេញឱ្យប្រើប្រាស់អំឡុងពេលជំងឺកូវីដ១៩ សម្រាប់គ្រឹះស្ថានដែលបំពេញតាមស្តង់ដារសុខភាពសាធារណៈ។
លើសពីនេះទៀត លោកក៏បានកត់សម្គាល់ផងដែរថា ការដំឡើងពន្ធកាលពីពេលថ្មីៗនេះរបស់រដ្ឋាភិបាលសហរដ្ឋអាមេរិក អាចកាត់បន្ថយការធ្វើដំណើររបស់អ្នកទេសចរអាមេរិកទៅកាន់ប្រទេសថៃ ដោយសារជនជាតិអាមេរិកទំនងជាចំណាយកាន់តែច្រើនលើទំនិញសំខាន់ៗ ដែលនាំឱ្យការធ្វើដំណើរទៅក្រៅប្រទេសតិចជាងមុន។ គោលនយោបាយនេះនឹងមិនត្រឹមតែប៉ះពាល់ដល់វិស័យទេសចរណ៍របស់ប្រទេសថៃប៉ុណ្ណោះទេ ប៉ុន្តែក៏នឹងប៉ះពាល់ដល់ប្រទេសដ៏ទៃទៀតដែលពេញនិយមដោយអ្នកទេសចរអាមេរិកផងដែរ ខណៈផលប៉ះពាល់ពេញលេញអាចនឹងមិនត្រូវបានដឹងភ្លាមៗនោះទេ វាអាចនឹងកាន់តែច្បាស់ក្នុងរយៈពេល៥ទៅ៦ខែខាងមុខ៕ ប្រភព ៖ Nation Thailand
ចែករំលែកព័តមាននេះ