ទីក្រុងកៀវ៖ កាលពីយប់មិញ រុស្ស៊ីវាយប្រហារមួយអស់ដៃទៅលើស្រុកកំណើតរបស់លោកហ្សេឡិនស្គីបណ្ដាលឱ្យស្លាប់មុស្ស១៨នាក់ និងរបួសរាប់សិបនាក់។ ប្រភពខ្លះថារុស្ស៊ីវាយប្រហារផ្គួបគ្នាដោយគ្រាប់មីស៊ីលផង និងយន្តហោះដ្រូនផង។ ក្រៅពីអ្នកស្លាប់ទាំងនេះ មនុស្ស៥០នាក់ទៀតរងរបួស។ ក្នុងនោះ ជាង៣០នាក់របួសធ្ងន់…
ទីក្រុងកៀវ៖ កាលពីយប់មិញ រុស្ស៊ីវាយប្រហារមួយអស់ដៃទៅលើស្រុកកំណើតរបស់លោកហ្សេឡិនស្គីបណ្ដាលឱ្យស្លាប់មុស្ស១៨នាក់ និងរបួសរាប់សិបនាក់។ ប្រភពខ្លះថារុស្ស៊ីវាយប្រហារផ្គួបគ្នាដោយគ្រាប់មីស៊ីលផង និងយន្តហោះដ្រូនផង។ ក្រៅពីអ្នកស្លាប់ទាំងនេះ មនុស្ស៥០នាក់ទៀតរងរបួស។ ក្នុងនោះ ជាង៣០នាក់របួសធ្ងន់ ត្រូវបញ្ជូនជាបន្ទាន់ទៅមន្ទីរពេទ្យ។
បើគិតឱ្យសព្វៗទៅ, សភាពការណ៍រវាងអ៊ុយក្រែន រុស្ស៊ី និងអាមេរិកចូលលក្ខណៈដូចចាប់ក្ដាមដាក់ចង្អេរ និយាយស្ដាប់គ្នាមិនសូវបានទេ។ ខាងលោកត្រាំឯណោះកំពុងខិតខំសម្រុះសម្រួលគ្នាដើម្បីបិទបញ្ចប់សង្គ្រាមឱ្យបានឆាប់ នឹងអាលងាកទៅគិតគូរបញ្ហាផ្សេង។ ចំណែករុស្ស៊ី និងអ៊ុយក្រែនឯណោះវិញហាក់ដូចជាមិនទាន់អាចបន្ធូរដៃបានទេ។ នៅពេលត្រៀមចរចាគ្នានេះជាឱកាសដែលពួកគេពឺតយកមួយឈ្នះដៃដើម្បីដាក់សម្ពាធគូបដិបក្សរបស់ខ្លួន និងដើម្បីមានប្រៀបក្នុងការចរចា។
ភាគីទាំង២វាយប្រហារគ្នាទៅវិញទៅមក។ ជាពិសេសគោលដៅរបស់អ៊ុយក្រែនគឺទីតាំងស្តុកទុកប្រេង និងឧស្ម័នរបស់រុស្ស៊ី។ គ្រាន់តែថាអ៊ុយវាយប្រហារមិនសូវស្លាប់មនុស្សច្រើនទេ។ ចំណែករុស្ស៊ីវាយប្រហារស្លាប់ជនស៊ីវិលរាល់ថ្ងៃ។ អ្នកខ្លះចាត់ទុកថាការវាយប្រហាររបស់រុស្ស៊ីកាលពីយប់មិញជាព្រឹត្តិការណ៍ដ៏ផ្ដាច់ផ្ដិលអាយុជីវិតមនុស្សបំផុតចាប់តាំងពីដើមឆ្នាំ២០២៥។
តាមរយៈវីឌីអូឃ្លីបដែលគេបង្ហោះនៅលើបណ្ដាញតេឡេក្រាមនៅកន្លែងកើតហេតុ គេឃើញសាកសពជនរងគ្រោះ និងអ្នករបួសរាយប៉ាយពាសពេញដី។ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងថាដំណើរការជួយសង្គ្រោះនៅតែបន្ត។ លោកសូមយកឱកាសនេះអំពាវនាវទៅប្រទេសលោកខាងលិចសូមបន្តដាក់សម្ពាធទៅលើប្រទេសរុស្ស៊ីឱ្យបានខ្លាំងក្លាបន្ថែមទៀត។
កាលពីសប្ដាហ៍មុន អាមេរិកប្រកាសថារុស្ស៊ី និងអ៊ុយក្រែនយល់ព្រមផ្អាកវាយប្រហារទីតាំងផលិតថាមពល។ នេះជាសមិទ្ធផលដំបូងបំផុតដែលលោកត្រាំខិតខំសម្រេចបានចាប់តាំងពីលោកឡើងកាន់អំណាច។ លោកធ្លាប់សន្យាថាប្រើពេលតែ២៤ម៉ោងប៉ុណ្ណោះត្រូវតែបញ្ចប់សង្គ្រាមនេះឱ្យបាន។ ប៉ុន្តែដោយសារមើលឃើញថាសង្គ្រាមនេះមិនមែនងាយស្រួលបញ្ចប់ទេ លោកថ្លែងថាសង្គ្រាមនេះអាចចប់ ហើយក៏អាចនឹងមិនចប់ផងដែរ។ ដូច្នេះ យើងត្រូវរង់ចាំតាមដានបញ្ហានេះទាំងអស់គ្នា៕
ចែករំលែកព័តមាននេះ