ទីក្រុងកៀវ៖ កងទ័ពអ៊ុយក្រែនបន្តគ្រប់គ្រងទឹកដីមួយចំណែកនៃតំបន់ខឺសរបស់រុស្ស៊ីទោះបីរុស្ស៊ីវាយសម្រុកខ្លាំងដើម្បីរំដោះទឹកដីរបស់ខ្លួនមកវិញក៏ដោយ។ អ៊ុយក្រែនអាចនឹងដកថយពីតំបន់ខឺសខ្លះៗមែន ប៉ុន្តែពួកគេងាកទៅវាយយកតំបន់បែលហ្គោរ៉ូតដែលស្ថិតនៅក្បែរនោះ។ នេះបើតាមសេចក្ដីរាយការណ៍របស់មេបញ្ជាការកងទ័ពអាមេរិកដែលប្រចាំការនៅអឺរ៉ុប។
ឧត្ដមសេនីយ៍គ្រីសស្តូហ្វឺ ខាវ៉ូលី (Christopher Cavoli) ឡើងរាយការណ៍នៅចំពោះសភាខង់ហ្ក្រែសអាមេរិកថាកងទ័ពអ៊ុយក្រែននៅបន្តគ្រប់គ្រងទឹកដីមួយផ្នែកនៃតំបន់ខឺស។ ពួកគេក៏កំពុងការពារទីតាំងឈរជើងរបស់ខ្លួនបានមាំទាំគ្រាន់បើផងដែរនៅតំបន់បែលហ្គោរ៉ូត (Belgorod)។ លោកថាកាលពី២អាទិត្យមុន កងទ័ពអ៊ុយក្រែនវាយបកទៅលើកងទ័ពរុស្ស៊ីនៅបែលហ្គោរ៉ូត។ ដូច្នេះ លោកអាចនិយាយបានថាភាគីទាំង២កំពុងតែវាយរុញច្រានគ្នាទៅវិញទៅមកនៅក្នុងតំបន់ទាំង២នេះ។
ឧត្ដមសេនីយ៍ខាវ៉ូលីជាមន្ត្រីយោធាអាមេរិកដំបូងបំផុតដែលទទួលស្គាល់ថាកងទ័ពអ៊ុយក្រែនពិតជាបានវាយលុកចូលទឹកដីបែលហ្គោរ៉ូតរបស់រុស្ស៊ី។ ចំណែកអ៊ុយក្រែនខ្លួនឯងពុំដែលប្រកាសថាខ្លួនមានកងទ័ពនៅបែលហ្គោរ៉ូតទេ។ អ៊ុយក្រែនទទួលស្គាល់ត្រឹមតែថាខ្លួនវាយប្រហារតាមអាកាសចូលបែលហ្គោរ៉ូត។ អាមេរិក និងអ៊ុយក្រែនក៏មិនដែលបង្ហាញថាអ៊ុយក្រែនកាន់កាប់ទឹកដីប៉ុន្មានគីឡូម៉ែត្រនៅខឺសនោះដែរ។
ក្រុមអ្នកតាមដានស្ថានការណ៍សឹកឈ្មោះឌីបស្ទេត (DeepState) ឱ្យដឹងថាអ៊ុយក្រែនកាន់កាប់ប្រហែល១៤០គីឡូម៉ែត្រការ៉េ។ មានន័យថាថយចុះខ្លាំងមែនទែនបើប្រៀបធៀបនឹងពេលដែលពួកគេវាយលុកចូលដំបូង និងកាន់កាប់ជាង១៣០០គីឡូម៉ែត្រការ៉េ។ កាលពីខែមីនា លោកហ្សេឡិនស្គីថ្លែងថាកងទ័ពរបស់លោកត្រៀមខ្លួនយ៉ាងសកម្មនៅតាមព្រំដែនដើម្បីទប់ទល់នឹងផែនការវាយលុកទ្រង់ទ្រាយធំរបស់រុស្ស៊ីនៅតំបន់ស៊ូមី និងខាគីវរបស់អ៊ុយក្រែននាពេលខាងមុខ ជាពិសេសនៅរដូវផ្ការីក។
អ៊ុយក្រែនមិនអាចបណ្ដោយឱ្យចាញ់សង្គ្រាមទេ
លោកខាវ៉ូលីថ្លែងថាទាហានអ៊ុយក្រែនកំពុងវាយការពារទីតាំងឈរជើងរបស់ខ្លួនបានយ៉ាងល្អ និងកំពុងពង្រឹងសមត្ថភាពរបស់ខ្លួនកាន់តែប្រសើរពីមួយសប្ដាហ៍ទៅមួយសប្ដាហ៍។ ពួកគេហ្វឹកហាត់កងទ័ពជ្រើសរើសថ្មី និងត្រៀមបញ្ជូនទៅសមរភូមិដើម្បីពង្រឹងសមត្ថភាពកងទ័ពដែលមានស្រាប់មុខ។ ឧត្ដមសេនីយ៍រូបនេះយល់ថាគេពិបាកប៉ាន់ស្មានថាអ៊ុយក្រែនអាចនឹងវាយប្រហារទ្រង់ទ្រាយធំដើម្បីបណ្ដេញកងទ័ពរុស្ស៊ីឱ្យអស់ពីទឹកដីខ្លួន។ ហើយគេក៏ពិបាកនឹងប៉ាន់ស្មានថាអ៊ុយក្រែនសុខចិត្តបណ្ដោយខ្លួនឱ្យចាញ់សង្គ្រាមនេះន។
អ៊ុយក្រែនធ្លាប់ជួបប្រទះបញ្ហាជ្រើសរើសកងទ័ពថ្មីដាក់ជំនួសកងទ័ពដែលស្លាប់ ឬរបួសកាលពីរដូវស្លឹកឈើជ្រុះឆ្នាំមុន។ ប៉ុន្តែឥឡូវនេះលែងចោទជាបញ្ហាទៀតហើយ។ នេះបើយោងតាមលោកខាវ៉ូលី។ ប៉ុន្តែរុស្ស៊ីទៅវិញទេដែលកំពុងខ្វះខាតរថពាសដែក និងកម្លាំងទ័ព។ ខាងលើនេះជាការដកស្រង់ប្រភពពីទស្សនាវដ្ដីប៉ូលីទីកូ (Politico) និងប្រភពដទៃទៀត៕
ចែករំលែកព័តមាននេះ