រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ថា រាជរដ្ឋាភិបាលកម្ពុជា នឹងចរចាជាមួយសហរដ្ឋអាមេរិក ដើម្បីរកដំណោះស្រាយសមស្របណាមួយ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ថា រាជរដ្ឋាភិបាលកម្ពុជា នឹងចរចាជាមួយសហរដ្ឋអាមេរិក ដើម្បីរកដំណោះស្រាយសមស្របណាមួយ បន្ទាប់ពីអាមេរិកដំឡើងពន្ធ ៤៩% លើទំនិញនាំចូលពីកម្ពុជា នេះបើសេចក្តីប្រកាសព័ត៌មាន ស្តីពីលទ្ធផលរបស់ទីស្ដីការគណៈរដ្ឋមន្ត្រី នៅថ្ងៃទី៤ ខែមេសា ឆ្នាំ២០២៥ ។
សម្តេចបវរធិបតី បន្តថា បញ្ហានេះ អាចបង្កផលប៉ះពាល់មួយចំនួន ដោយចៀសមិនរួចមកលើកម្ពុជា ប៉ុន្តែវាមិនអាក្រក់ដូចអ្វី ដែលអ្នកលេងបណ្តាញសង្គមមួយចំនួន ខំប្រឹងស្រែកបំភ័យនោះឡើយ ។
ក្នុងន័យនេះ សម្តេចបានអំពាវនាវសូមឱ្យប្រជាពលរដ្ឋស្ងប់ចិត្ត ហើយជឿជាក់លើរាជរដ្ឋាភិបាល ក្នុងការដោះស្រាយបញ្ហានេះ ។
សម្តេចធិបតី បានគូសបញ្ជាក់ថា គណៈកម្មការចំពោះកិច្ច ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា គឺជាយន្តការបំពេញបន្ថែម និងមិនជំនួសយន្តការ ដែលមានស្រាប់នោះទេ ប៉ុន្តែវា គឺជាសហថាមពល ដែលយើងត្រូវបន្តអនុវត្តជាមួយគ្នា ដោយរួមគ្នាទប់ស្កាត់ និងបោសសម្អាតសកម្មភាពខុសច្បាប់ និងអ្នកប្រព្រឹត្តខុសច្បាប់ ក្នុងស្មារតីសហការគ្នាជានិច្ច ។
សម្តេចបវរធិបតី មានប្រសាសន៍ថា កន្លងទៅនេះ សម្តេចបានដាក់ចេញ នូវអនុសាសន៍ណែនាំមួយចំនួន ពាក់ព័ន្ធនឹងការផ្សព្វផ្សាយពាណិជ្ជកម្មផលិតផលគ្រឿងស្រវឹង តាមផ្ទាំងប៉ាណូ នៅតាមទីសាធារណៈ ដោយត្រូវកាត់បន្ថយការផ្សព្វផ្សាយពាណិជ្ជកម្ម តាមរយៈផ្ទាំងប៉ាណូធំៗ ឱ្យមកនៅត្រឹមតែ ៥០% នៃចំនួនផ្ទាំងប៉ាណូផ្សព្វផ្សាយ ផលិតផលគ្រឿងស្រវឹងសរុប នៅទូទាំងប្រទេស។ ជាមួយគ្នានេះ សម្តេចបវរធិបតី បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ក្រសួង-ស្ថាប័នពាក់ព័ន្ធ និងរដ្ឋបាលរាជធានី-ខេត្ត ដែលមានក្រុមការងារអន្តរក្រសួងគ្រប់គ្រង ការផ្សព្វផ្សាយផលិតផលគ្រឿងស្រវឹងដឹកនាំដោយក្រសួងព័ត៌មាន និងដោយអនុវត្តតាមសេចក្តីណែនាំរបស់ក្រសួងមហាផ្ទៃ ស្តីពីការលើកកម្ពស់ការគ្រប់គ្រងការផ្សព្វផ្សាយពាណិជ្ជកម្ម គ្រប់ប្រភេទ នៅរដ្ឋបាលថ្នាក់ក្រោមជាតិ ដែលបានសម្របសម្រួល និងដោះស្រាយ ដោយទទួលបានលទ្ធផលល្អប្រសើរ ។
ជាមួយគ្នានោះដែរ សម្តេចបវរធិបតី បានកត់សម្គាល់ថា សហរដ្ឋអាមេរិក បាននិងកំពុងខាតបង់ច្រើនលើការចំណាយនាំចូលទំនិញ ពីបណ្តាប្រទេសលើពិភពលោក ដែលឆ្លុះបញ្ចាំងតាមរយៈឱនភាពជញ្ជីងពាណិជ្ជកម្ម (Trade Deficits) ដូច្នេះហើយ បានជារដ្ឋបាលប្រធានាធិបតីលោក ដូណាល់ ត្រាំ បានប្រកាសដាក់ចេញ នូវអត្រាពន្ធនាំចូលឆ្លើយតប (Reciprocal Tariffs) លើបណ្តាប្រទេសដែលសហរដ្ឋអាមេរិក មានឱនភាពជញ្ជីងពាណិជ្ជកម្ម។ ជាក់ស្តែង កម្ពុជា ឡាវ និងវៀតណាម ត្រូវទទួលរង នូវអត្រាពន្ធនាំចូលក្នុងកម្រិត ៤៩%, ៤៨%, និង៤៦% រៀងគ្នា ដោយសារសហរដ្ឋ អាមេរិកមានឱនភាពជញ្ជីងពាណិជ្ជកម្មក្នុងកម្រិត ៩៧% ជាមួយកម្ពុជា ៩៥% ជាមួយឡាវ និង ៩០% ជាមួយ វៀតណាម។ ដូច្នេះ ការដាក់អត្រាពន្ធនាំចូលឆ្លើយតបនេះ មិនមែនជាការឆ្លើយតបទៅនឹងអត្រាពន្ធនាំចូល ដែលប្រទេសទាំងនោះ បានដាក់លើទំនិញនាំចូលពីសហរដ្ឋអាមេរិកនោះទេ ហើយការដាក់អត្រាពន្ធនាំចូលឆ្លើយតបនេះ ទៀតសោតមានតែ ៥០% នៃអត្រា ដែលសហរដ្ឋអាមេរិកមានឱនភាពជញ្ជីងពាណិជ្ជកម្ម ជាមួយប្រទេសទាំងនោះ តែប៉ុណ្ណោះ ៕
ចែករំលែកព័តមាននេះ