រាជធានីភ្នំពេញ ៖ លោក ឃួង ស្រេង អភិបាលរាជធានី និងជាប្រធានគណៈបញ្ជាការឯកភាពរាជធានីភ្នំពេញ មានប្រសាសន៌ថា ការពង្រឹងសន្តិសុខ សណ្តាប់ធ្នាប់…
រាជធានីភ្នំពេញ ៖ លោក ឃួង ស្រេង អភិបាលរាជធានី និងជាប្រធានគណៈបញ្ជាការឯកភាពរាជធានីភ្នំពេញ មានប្រសាសន៌ថា ការពង្រឹងសន្តិសុខ សណ្តាប់ធ្នាប់ របៀបរៀបរយសាធារណៈ ក្នុងរាជធានីភ្នំពេញ ឱ្យបានល្អប្រសើរបំផុត នាឱកាសបុណ្យចូលឆ្នាំថ្មីប្រពៃណីជាតិខ្មែរ ជាការសំខាន់ និងអាទិភាព ដែលអាជ្ញាធរខណ្ឌទាំង១៤ ត្រូវតែគិតគួរ និងយកចិត្តទុកដាក់ឱ្យបានខ្ពស់បំផុត ដើម្បីឱ្យពិធីបុណ្យចូលឆ្នាំថ្មី ប្រព្រឹត្តទៅដោយរលូន និងធានាថា មិនមានបញ្ហាកើតឡើង។ ក្នុងនោះដែរ លោកអភិបាល ក៏បានណែនាំដល់គណៈបញ្ជាការឯភាពខណ្ឌ ក៏ដូចកម្លាំងសមត្ថកិច្ចជំនាញ ត្រូវយកចិត្តទុកដាក់ លើការល្បាតត្រួតពិនិត្យអាវុធជាតិផ្ទុះ ការត្រួតពិនិត្យជាតិអាល់កុល និងអប់រំណែនាំដល់ប្រជាពលរដ្ឋក្នុងមូលដ្ឋានរបស់ខ្លួន ឲ្យមានការប្រុងប្រយ័ត្ន និងបង្ការគ្រោះអគ្កិភ័យ កុំមានការធ្វេសប្រហែស ។
លោក ឃួង ស្រេង អភិបាលរាជធានីភ្នំពេញ បានណែនាំបែបនេះ ក្នុងឱកាសដឹកនាំកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ បានបើកកិច្ចប្រជុំនៅរសៀលថ្ងៃទី៤ ខែមេសា ឆ្នាំ២០២៥នេះ ដើម្បីបន្តត្រួតពិនិត្យវឌ្ឍនភាពលើការងារសន្តិសុខ សណ្តាប់ធ្នាប់របៀបរៀបរយសាធារណៈ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៥ ដែលនឹងចូលមកដល់នាពេលឆាប់ៗខាងមុខនៅសាលារាជធានីភ្នំពេញ ។
លោកអភិបាលរាជធានីភ្នំពេញ ក៏បានជំរុញឲ្យមានការធ្វើការរួមគ្នារវាងអាជ្ញាធរ និងសមត្ថកិច្ច ដោយបែងចែកកម្លាំងសមត្ថកិច្ចល្បាតទាំងថ្ងៃ ទាំងយប់ ដើម្បីធានាថា ពិធីបុណ្យចូលឆ្នាំថ្មីឆ្នាំនេះ ប្រព្រឹត្តទៅប្រកបដោយភាពសប្បាយរីករាយ ខណៈដែលអាជ្ញាធររំពឹងថា សង្គ្រាន្តវត្តភ្នំឆ្នាំនេះ នឹងមានប្រជាពលរដ្ឋមកលេងកម្សាន្តសប្បាយយ៉ាងច្រើនកុះករជាងឆ្នាំមុខៗ ហើយត្រូវយកបទពិសោធន៍ នាឆ្នាំកន្លងទៅ ធ្វើជាបទពិសោធន៍ និងធ្វើឲ្យបានល្អប្រសើរ ។
ពាក់ព័ន្ធនឹងការដាក់កងកម្លាំងសន្តិសុខនេះ លោកអភិបាលណែនាំឲ្យរៀបចំទីបញ្ជាការស្រាលមួយចំនួន ដូចជាការដាក់ឧបករណ៍បំពងសំឡេងដោយសហការជាមួយវិទ្យុជាតិកម្ពុជា ដើម្បីងាយស្រួលជួនដំណឹងដល់ប្រជាពលរដ្ឋ ដែលមកលេងកម្សាន្ត នៅរមណីយដ្ឋានប្រវត្តិសាស្ត្រវត្តភ្នំ នៅពេលដែលមានបញ្ហាកើតឡើង ឬត្រូវធ្វើការណែនាំដល់ពួកគាត់អំពីដំណឹងផ្សេងៗ។ ក្រៅពីនេះ ត្រូវរៀបចំចំណតរថយន្តក្រុង ឲ្យបានសមរម្យ សម្រាប់ដឹកជញ្ជូនប្រជាពលរដ្ឋ មកលេងកម្សាន្តក្នុងឱកាសបុណ្យចូលឆ្នាំថ្មី ត្រូវពង្វាងចរាចរណ៍កុំឲ្យកកស្ទះនៅកន្លែងសប្បាយភាព, ត្រូវគិតគួរអំពីបរិស្ថាន ដោយត្រូវមានការសម្អាត ការទុកដាក់សំរាមឲ្យបានត្រឹមត្រូវ ដើម្បីឲ្យទីក្រុងស្អាត ជាពិសេសកន្លែង ដែលប្រជាពលរដ្ឋមកលេងកម្សាន្តសប្បាយ, ត្រូវតុបតែងភ្លើងពណ៌តាមដងផ្លូវ តាមដើមឈើ លាបថ្នាំឲ្យស្រស់ស្អាត និងត្រូវត្រួតពិនិត្យចរន្តអគ្គិសនីផងដែរ កុំឱ្យចរន្តអគ្គិនីឆ្លង ឬឆក់ពលរដ្ឋ ដែលមកលេងច្រើន ។
ម្យ៉ាងវិញទៀត លោកអភិបាលបានណែនាំជាពិសេស ត្រូវធានាបាននូវសុវត្ថិភាពផ្ទះ និងទ្រព្យសម្បត្តិរបស់ប្រជាពលរដ្ឋ ខណៈពួកគាត់ទៅលេងស្រុកកំណើតអស់ ដោយត្រូវដាក់កម្លាំងល្បាតជាប្រចាំ។ ចំពោះទីតាំង ដែលមានពលរដ្ឋទៅលេងកម្សាន្តច្រើន កងកម្លាំងសមត្ថកិច្ច ត្រូវបង្កើនឲ្យកាន់តែច្រើនផងដែរ ដើម្បីធានា កុំមានបញ្ហាកើតឡើង ។
លោកបានណែនាំដល់អាជ្ញាធរខណ្ឌទាំង១៤ ត្រូវធ្វើការផ្សព្វផ្សាយដល់ប្រជាពលរដ្ឋ ឲ្យមានការប្រុងប្រយ័ត្ន ចំពោះភ្លើងទៀន ធូប ចរន្តអគ្គិសនី ដែលនាំឱ្យកើតជាជាអគ្គិភ័យ ជាយថាហេតុ ។
លោកបានណែនាំទៀតថា ចំពោះយុវជនមួយចំនួនដែលលេងប៉ាតម្សៅ ជះទឹក បាញ់ទឹក ខុសទំនង ឬហួសហេតុ ដែលបង្កផលប៉ះពាល់ដល់អ្នកដំណើរតាមម៉ូតូ តាមរថយន្ត តាមផ្លូវជាដើម អាជ្ញាធរ ក៏ត្រូវពនិត្យមើលផងដែរ ។
ក្រោយចប់កិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ លោក ឃួង ស្រេង អភិបាលរាជធានីភ្នំពេញ បានអញ្ជើញចុះពិនិត្យទីតាំងព្រឹត្តិការណ៌រៀបចំសង្គ្រាន្តវត្តភ្នំ ឆ្នាំ២០២៥ នៅជុំវិញរមណីយដ្ឋានវប្បធម៌ ប្រវត្តិសាស្ត្រវត្តភ្នំ និងបានណែនាំផ្នែកជំនាញឱ្យរៀបចំបានល្អបំផុត ពិសេសណែនាំដល់ក្រុមវឌ្ឍនះ ឱ្យសរសេរអក្សជាតិឱ្យធំ ហើយអក្សរអន្តជាតិឱ្យតូចជាង ហើយអក្សរជាតិ នៅខាងលើហើយដកខ្លោងទ្វាររបស់ក្រុមហ៊ុន ឱ្យឆ្ងាយពីវត្តភ្នំបន្តិច ឱ្យទៅជាប់ខាងមុខក្រសួងរ៉ែ និងឋាមពុល លើមហាវិថីព្រះនរោត្តមវិញ ៕
ចែករំលែកព័តមាននេះ