ទីក្រុងប៉េកាំង៖ បន្ទាប់ពីលោកត្រាំប្រកាសផែនការដំឡើងពន្ធដ៏ខ្ពស់កប់ពពកទៅលើទំនិញនាំចូលពីប្រទេសនានាទូទាំងពិភពលោក ថ្ងៃនេះប្រទេសចិនដាក់ចេញវិធានការឆ្លើយតបដោយត្រៀមដំឡើងពន្ធ៣៤%ទៅលើទំនិញនាំចូលពីអាមេរិក។ វិធានការរបស់ចិននឹងអនុវត្តចាប់ពីថ្ងៃទី១០ ខែមេសាតទៅ។ អត្រាពន្ធនេះដាក់ចេញឡើងដើម្បីទូទាត់ឱ្យបានសមាមាត្រគ្នាទៅនឹងអត្រាដំឡើងពន្ធរបស់លោកត្រាំទៅលើប្រទេសចិន។
ក្រសួងពាណិជ្ជកម្មចិនប្រកាសនៅក្នុងសេចក្ដីថ្លែងការណ៍របស់ខ្លួនថាខ្លួននឹងចាត់វិធានការរឹតត្បិតកាន់តែខ្លាំងទៅលើការនាំចេញរ៉ែកម្ររបស់ខ្លួន។ នេះជារូបធាតុដ៏សំខាន់សម្រាប់ផលិតគ្រឿងបរិក្ខារដែលបំពាក់បច្ចេកវិទ្យាទំនើបដូចជាបន្ទះឈីបកុំព្យូទ័រ និងធុងអាគុយបំពាក់នៅក្នុងរថយន្តអគ្គិសនីជាដើម។ នៅក្នុងចំណោមរូបធាតុកម្រទាំងនោះមានដូចជាសាម៉ារីញ៉ូម, កាដូលីនីញ៉ូម, តេប៊ីយ៉ូម, ឌីសប្រូស្យូម លូតេត្យូម និងអ៊ីតទ្រីយ៉ូម (samarium, gadolinium, terbium, dysprosium, lutetium, scandium & yttrium)។
ការដំឡើងពន្ធរបស់ចិនទៅលើរូបធាតុទាំងនេះនឹងអនុវត្តចាប់ពីថ្ងៃទី៤ ខែមេសាតទៅ។ ក្រសួងពាណិជ្ជកម្មចិនថ្លែងថារដ្ឋាភិបាលចិនដាក់កំហិតទៅលើការនាំចេញរូបធាតុទាំងនេះធ្វើឡើងស្របទៅតាមផ្លូវច្បាប់ដើម្បីការពារផលប្រយោជន៍ និងសន្តិសុខជាតិរបស់ប្រទេសចិនផង និងដើម្បីបំពេញកាតព្វកិច្ចជាអន្តរជាតិដែលមិនត្រូវរីកសាយភាយសារធាតុទាំងនេះផង។
នៅថ្ងៃនេះដដែល ប្រទេសចិនបានដាក់ស្ថាប័នចំនួន១១ទៅក្នុងបញ្ជីខ្មៅរបស់ខ្លួន និងចាត់ទុកជាអង្គភាពដែលមិនអាចជឿទុកចិត្តបានតទៅទៀតទេ។ តាមរយៈនេះ ចិនអាចចាត់វិធានការក្ដៅប្រឆាំងនឹងអង្គភាពរបស់រដ្ឋបរទេសដែលបើកប្រតិបត្តិការនៅប្រទេសចិន។ នៅពេលសភាពការណ៍កំពុងឡើងកម្ដៅដោយសារការដំឡើងពន្ធដ៏ខ្ពស់ ត្រាំថាលោកបើកទូលាយជានិច្ចសម្រាប់ការចរចា និងសម្រុះសម្រួលគ្នាឱ្យមានកិច្ចព្រមព្រៀងពិសេសណាមួយដើម្បីដោះស្រាយបញ្ហាប្រទាំងប្រទើសគ្នា។
នៅពេលលោកត្រាំគ្រាន់តែប្រកាសតែមាត់ទទេ មិនទាន់ចាប់អនុវត្តពន្ធផង សភាពការណ៍សេដ្ឋកិច្ចពិភពលោកចាប់ផ្ដើមបង្ហាញសញ្ញាមិនស្រួលជាបណ្ដើរៗហើយ។ ពួកអឺរ៉ុបកំពុងពិគ្រោះគ្នាថាត្រូវឈប់ទិញផលិតផលរបស់អាមេរិក។ ចំណែកក្រុមអ្នកវិនិយោគនៅទីផ្សារមូលប័ត្រក៏កំពុងមានអារម្មណ៍មិនស្រណុកខ្លួនប៉ុន្មានដែរ។ តម្លៃភាគហ៊ុននៅផ្សារមូលប័ត្រវ៉លស្ទ្រីត (Wall Street) របស់អាមេរិកនៅថ្ងៃសុក្រនេះធ្លាក់ដាំក្បាលចុះទាបបំផុតមិនធ្លាប់មានចាប់តាំងពីឆ្នាំ២០២០។
អ្នកខ្លះបារម្ភថាហេងស៊យពិភពលោកជួបនឹងវិបត្តិសេដ្ឋកិច្ចដូចកាលឆ្នាំ១៩២៩។ កាលនោះ ទីផ្សារមូលប័ត្ររបស់អាមេរិកដួលរលំ ហើយធ្វើឱ្យសេដ្ឋកិច្ចអាមេរិកធ្លាក់ចុះ។ បន្ទាប់មក វិបត្តិនេះរីករាលដាលទៅដល់ប្រទេសដទៃទៀតទូទាំងពិភពលោក។ ទម្រាំស្ដារឡើងវិញប្រើពេលមិនតិចឆ្នាំនោះទេ។ ខាងលើជាការដកស្រង់ប្រភពពីទីភ្នាក់ងារព័ត៌មានអេភី, រ៉យទ័រ និងប្រភពដទៃទៀត៕
ចែករំលែកព័តមាននេះ