រាជធានីភ្នំពេញ ៖ បុរសជនជាតិកាមេរូនម្នាក់ បានត្រូវសមត្ថកិច្ចចាប់ខ្លួន ក្រោយពីជំរិតទារប្រាក់ពីស្ត្រីជនជាតិឡាវបានជិត២០ម៉ឺនដុល្លារ ឯបក្ខពួកមួយចំនួនទៀតកំពុងរត់គេចខ្លួន ។ យោងតាមរបាយការណ៍របស់នាយកដ្ឋាននគរបាលទេសចរណ៍បានឲ្យដឹងថា ករណីឆបោក និងចាប់បង្ខាំងជំរិតទារប្រាក់នេះ…
រាជធានីភ្នំពេញ ៖ បុរសជនជាតិកាមេរូនម្នាក់ បានត្រូវសមត្ថកិច្ចចាប់ខ្លួន ក្រោយពីជំរិតទារប្រាក់ពីស្ត្រីជនជាតិឡាវបានជិត២០ម៉ឺនដុល្លារ ឯបក្ខពួកមួយចំនួនទៀតកំពុងរត់គេចខ្លួន ។
យោងតាមរបាយការណ៍របស់នាយកដ្ឋាននគរបាលទេសចរណ៍បានឲ្យដឹងថា ករណីឆបោក និងចាប់បង្ខាំងជំរិតទារប្រាក់នេះ បានកើតឡើងកាលពីថ្ងៃទី២៦ ខែមីនា ឆ្នាំ២០២៥កន្លងទៅ នៅសង្កាត់ផ្សារថ្មីទី៣ ខណ្ឌដូនពេញ ក្នុងសណ្ឋាគារ Poulo Wai Hotel & Apartment ។
ស្ត្រីជនជាតិឡាវឈ្មោះ NOUTTHAVONG KHOUN អាយុ៣៧ឆ្នាំ ចំណែកជនល្មើសដែលត្រូវបានចាប់ខ្លួនឈ្មោះ ASHU GEORGE EBOT ។តាមរបាយការណ៍បានឲ្យដឹងទៀតថា កាលពីថ្ងៃទី២៤ ខែមីនា ឆ្នាំ២០២៥ ស្ត្រីជនជាតិឡាវរូបនេះ បានប្រគល់លុយសុទ្ធចំនួន ១០០ ០០០ដុល្លារ ឱ្យទៅបុរសជនជាតិស្បែកខ្មៅ ដែលស្ត្រីរងគ្រោះអះអាងថា ជាសង្សាររបស់ខ្លួន និងបក្ខពួក ដើម្បីយកទៅទិញរថយន្ត២គ្រឿង ។ ក្រោយពីបានទទួលប្រាក់ហើយ ស្ត្រីរងគ្រោះព្យាយាមទាក់ទងទៅបុរសជាសង្សាររបស់ខ្លួន ប៉ុន្តែមិនអាចទាក់ទងបានឡើយ ។
ក្រោយមក មានបុរសម្នាក់ឈ្មោះ MIMBANG ROMEO AYUK អាយុ៣៧ឆ្នាំ ជាជនជាតិកាមេរូនដែរ បានទាក់ទងមកស្ត្រីរងគ្រោះដោយប្រាប់ថា បុរសជាសង្សាររបស់ខ្លួនត្រូវនគរបាលចាប់ខ្លួន និងបានប្រាប់ឱ្យស្ត្រីរងគ្រោះរកលុយ ៧មុឺនដុល្លារ ដើម្បីមកលោះបុរសជាសង្សាររបស់ខ្លួនពីកន្លែងនគរបាល ។ ពេលនោះស្ត្រីរងគ្រោះបានឆ្លើយតបថា គ្មានប្រាក់ចំនួន ៧មុឺនដុល្លារទេ ស្រាប់តែជនសង្ស័យបានឱ្យស្ត្រីរងគ្រោះយកប្រាក់ចំនួន ៥មុឺនដុល្លារ និងផ្ញើរូបភាពសង្សារជាប់ខ្នោះតាមបណ្តាញទំនាក់ទំនងតេឡេក្រាម ។ ប៉ុន្តែតាមពិត ក្រុមជនល្មើសទាំងនេះបានប្រឌិតរឿងទាំងអស់ថា សង្សាររបស់នាងត្រូវចាប់ខ្លួន ដោយធ្វើជាដាក់ខ្នោះសង្សាររបស់នាង ដើម្បីភូតនាងជំរិតទារប្រាក់ប៉ុណ្ណោះ ។ បន្ទាប់មក ជនសង្ស័យឈ្មោះ MIMBANG ROMEO AYUK បានឱ្យស្ត្រីរងគ្រោះណាត់ជួប ដើម្បីប្រគល់ប្រាក់ឱ្យជនសង្ស័យឈ្មោះ ASHU GEORGE EBOT មកទទួលប្រាក់ជំនួសឈ្មោះ MIMBANG ROMEO AYUK នៅភោជនីយដ្ឋានតន្ត្រីភ្នំមាស៩៩ ផ្លូវលេខ៤៣០ កែងនឹងផ្លូវលេខ៥០២ សង្កាត់ផ្សារដើមថ្កូវ ខណ្ឌចំការមន ក៏ត្រូវបានកម្លាំងនគរបាលចាប់ខ្លួនតែម្តង ក្រោមការបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការសម្របសម្រួលពីឯកឧត្តម ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ ។
ជនល្មើសរូបនេះ ត្រូវបាននគរបាលនាយកដ្ឋានទេសចរណ៍បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ នៅថ្ងៃទី៣ ខែមេសា ឆ្នាំ២០២៥ ។
សូមបញ្ជាក់ថា ឧក្រិដ្ឋជនស្បែកខ្មៅរូបនេះ កាលពីថ្ងៃទី៣០ ខែវិច្ឆិកា ឆ្នាំ២០២០ ធ្លាប់ត្រូវបានកងរាជអាវុធហត្ថលើផ្ទៃប្រទេសឃាត់ខ្លួនម្តងហើយ បន្ទាប់ពីបានទទួលបណ្តឹងពីជនរងគ្រោះពីបទ «ឆបោក និងលួចមានស្ថានទម្ងន់ទោស និងកំហែងយកមានស្ថានទម្ងន់ទោស» នៅក្នុងខណ្ឌជ្រោយចង្វា នៅក្នុងទំហំទឹកប្រាក់ប្រមាណ៣៥ម៉ឺនដុល្លារ តែជនរងគ្រោះបានផ្ញើឲ្យពួកគេជិត៣០ម៉ឺនដុល្លារ ។
តាមប្រភពថា ក្រោយការជាប់ឃុំនៅក្នុងពន្ធនាគារបាន១ឆ្នាំ៦ខែ ព្រះរាជអាជ្ញារងអមសាលាដំបូងរាជធានីភ្នំពេញ ក៏បានចេញដីកាបង្គាប់ឲ្យដោះលែងវិញនៅថ្ងៃទី១៦ ខែមិថុនា ឆ្នាំ២០២២ ៕
ចែករំលែកព័តមាននេះ