ទីក្រុងប្រ៊ុចសែល៖ ញាក់សាច់ ដោយសារសភាពការណ៍ពិភពលោកហាក់ដូចជាមិនសូវស្រួល អាមេរិកត្រៀមវាយអ៊ីរ៉ង់ ចិនគំរាមតៃវ៉ាន់ ត្រាំដំឡើងពន្ធទៅលើទំនិញនានាទូទាំងពិភពលោក។ ដូច្នេះឃើញថាពិភពលោកនេះរកភាពស្ងប់សុខមិនទាន់ឃើញសោះ។ ស៊ុយអែតថ្មីៗនេះ ចាប់ផ្ដើមដើរពិនិត្យមើលរណ្ដៅត្រង់សេដែលជីកទុកបង្ការខ្លួនតាំងពីសម័យសង្គ្រាមត្រជាក់ និងទុកចោលរាប់សិបឆ្នាំដើម្បីជួសជុលប្រើការឡើងវិញ។
ស៊ុយអែតក៏កំពុងត្រៀមជួសជុលរណ្ដៅក្រោមដីខ្នាតធំដែលអាចដាក់មនុស្សបានច្រើននាក់ឱ្យស្នាក់នៅក្នុងគ្រាអាសន្ន ឬនៅពេលផ្ទុះសង្គ្រាមពិភពលោក។ នេះបើយោងតាមការបង្ហើបឱ្យដឹងពីអាជ្ញាធរស៊ុយអែត។ តាមពិត ស៊ុយអែតជាប្រទេសសន្សំសុខ មិនចង់មានជម្លោះជាមួយនឹងជាតិសាសន៍ណាទេ សូម្បីតែសម័យសង្គ្រាមត្រជាក់ក៏ប្រទេសនេះមិនចូលបក្សសម្ព័ន្ធណាទាំងអស់។
ប៉ុន្តែចាប់តាំងពីសង្គ្រាមអ៊ុយក្រែនផ្ទុះឡើង ស៊ុយអែតដឹងច្បាស់ថាការប្រកាន់មាគ៌ាកណ្ដាល ឬមជ្ឈិមបដិប្បទាមិនប្រាកដជាបានសេចក្ដីសុខឡើយ។ ដូច្នេះ ស៊ុយអែតសម្រេចចិត្តថាលែងដើរនយោបាយកណ្ដាលតទៅទៀតហើយ ហើយដាក់ពាក្យសូមចូលជាសមាជិកអង្គការណាតូតែម្ដង។ ស៊ុយអែត និងប្រទេសជិតខាងរបស់ខ្លួនចង់ផ្ដោតសំខាន់ទៅលើការបង្កើតកងប្រជាការពារ មានន័យថាប្រើប្រាស់ជនស៊ីវិលដើម្បីការពារជនស៊ីវិល និងហេដ្ឋារចនាសម្ព័ន្ធនៅពេលមានសង្គ្រាម ឬមានគ្រោះមហន្តរាយអ្វីមួយ។
អាជ្ញាធរស៊ុយអែតប្រាប់ថាឥឡូវនេះ ខ្លួនកំពុងតែធ្វើការយ៉ាងញាប់ដៃញាប់ជើងដើម្បីបង្កើតប្រព័ន្ធប្រជាការពារ។ កាលពីខែវិច្ឆិកា ឆ្នាំ២០២៤ ស៊ុយអែតបានធ្វើបច្ចុប្បន្នភាពទៅលើគោលការណ៍ណែនាំរបស់ខ្លួនដែលមានចំណងជើងថា «ពេលជាតិមានអាសន្ន ឬសង្គ្រាម»។ សភាពការណ៍ពិភពលោកកាន់តែឡើងកម្ដៅដែលអាចនឹងឈានដល់ការផ្ទុះសង្គ្រាមនុយក្លេអ៊ែរ។ ស៊ុយអែតយល់ថាមានតែទីជម្រកក្រោមដីប៉ុណ្ណោះអាចការពារអាយុជីវិតរបស់មនុស្សពីការវាយប្រហារដោយនុយក្លេអ៊ែរ អាវុធគីមី ឬជីវសាស្ត្រ។
ស៊ុយអែតថ្លែងថាខ្លួនចាប់ផ្ដើមកែលម្អដើម្បីប្រើប្រាស់ឡើងវិញនូវទីជម្រកក្រោមដីចន្លោះពី២៥-៨០កន្លែង។ នេះជាផ្នែកមួយនៃគម្រោងកែលម្អជម្រកក្រោមដីដ៏ធំជាងនេះដែលត្រូវការប្រើប្រាស់វេលារហូតដល់បីឆ្នាំទើបអាចជួសជុល និងបំពាក់គ្រឿងបរិក្ខារចប់សព្វគ្រប់។ នៅក្នុងទីជម្រកនីមួយៗអាចដាក់មនុស្សរាប់ពាន់នាក់សម្រាប់ស្នាក់នៅបណ្ដោះអាសន្ន។
សព្វថ្ងៃនេះ ស៊ុយអែតមានទីជម្រកក្រោមដីប្រហែល៦,៤ម៉ឺនទីតាំងនៅទូទាំងប្រទេស។ ភាគច្រើនសាងសង់នៅក្រោមដីជ្រៅៗនៃទីក្រុងតូចធំនានា និងតំបន់ដែលមានមនុស្សរស់នៅច្រើន។ ជាសរុប អាចដាក់បានមនុស្ស៧លាននាក់។ នៅឆ្នាំ២០២៥នេះ ស៊ុយអែតត្រៀមប្រើប្រាស់ថវិកាជាតិជាងដប់លានដុល្លារដើម្បីដើរត្រួតពិនិត្យទីជម្រកចាស់ៗ និងជួសជុលឡើងវិញ។ ប៉ុន្តែទីជម្រកទាំងនោះភាគច្រើននៅស្អាតល្អ។ ដូច្នេះ គ្រាន់តែជួសជុលត្រឹមតែបន្តិចបន្តួចប៉ុណ្ណោះក៏អាចប្រើការបានដែរ។
ប្រទេសន័រវេក៏បានចេញសេចក្ដីណែនាំស្ដីពីការបង្ការខ្លួនពីគ្រោះអាសន្នដូចជាអាកាសធាតុប្រែប្រួល, ជំងឺរាតត្បាត និងសង្គ្រាមជាដើម។ ន័រវេមានទីជម្រកក្រោមដីពីរម៉ឺនកន្លែងអាចដាក់មនុស្សឱ្យស្នាក់នៅបាន២,៥លាននាក់។ ហ្វាំងឡង់ក៏កំពុងត្រៀមលក្ខណៈជាបណ្ដើរៗផងដែរ។ ហ្វាំងឡង់មានទីជម្រកក្រោមដីជាង៥ម៉ឺនកន្លែងអាចដាក់មនុស្សបាន៤,៨លាននាក់។
សេចក្ដីណែនាំរបស់រដ្ឋាភិបាលស៊ុយអែតចង់ក្រើនរំលឹកប្រជាជនថាពួកគេត្រូវតែត្រៀមខ្លួនទទួលយកសេណារីយោដ៏ អាក្រក់បំផុត។ នោះគឺការវាយប្រហារពីសំណាក់ប្រទេសដទៃទៅលើស៊ុយអែត។ នាយករដ្ឋមន្ត្រីស៊ុយអែតថ្លែងកាលពីខែមករាថាប្រទេសរបស់លោកមិនទាន់ធ្លាក់ទៅក្នុងសង្គ្រាមទេ។ ប៉ុន្តែក៏មិនប្រាកដជារស់នៅមានសន្តិភាពជានិច្ចនោះដែរ។
តាមពិតប្រទេសស៊ុយអែតមានទីជម្រកក្រោមដីប៉ុណ្ណឹងមិនទាន់ច្រើនណាស់ណាទេ។ ប្រទេសដែលមានទីជម្រកក្រោមដីច្រើនបំផុតគឺអាល់បានី មានរហូតដល់ជាង៧សែនកន្លែង។ កាលពីសម័យសង្គ្រាមត្រជាក់ មេដឹកនាំអាល់បានីបារម្ភថាអាចនឹងផ្ទុះសង្គ្រាមរវាងអង្គការណាតូ និងវ៉ាសូវី។ ដូច្នេះ អាល់បានីគិតតែពីជីករណ្ដៅក្រោមដីដើម្បីបង្ការខ្លួនទុកជាមុន។ មិនឥតប្រយោជន៍ទេ។ ទោះបីសង្គ្រាមត្រជាក់បានផុតរលត់ទៅហើយក្ដី ទីជម្រកទាំងនេះអាចប្រើប្រាស់សម្រាប់ការស្នាក់នៅរបស់ជនអនាថា និងជនគ្មានទីជម្រក។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ