ខេត្តកណ្តាល ៖ នគរបាលស្រុកកៀនស្វាយបានចាប់ឃាត់ខ្លួនកូនអកតញ្ញូម្នាក់ដែលបានយកកាំបិតបុ័ងតោគំរាម និងយកឆ្នាំងបាយវាយក្បាលម្ដាយឲ្យរងរបួស ព្រោះតែខឹងសុំលុយ៥០០០រៀល យកទៅទិញស្រាផឹកមិនបាន ។ហេតុការណ៍នេះ កើតឡើងកាលពីវេលាម៉ោងប្រមាណ៣និង៣០នាទីទៀបភ្លឺថ្ងៃទី៣១ ខែមីនា ឆ្នាំ២០២៥កន្លងទៅ…
ខេត្តកណ្តាល ៖ នគរបាលស្រុកកៀនស្វាយបានចាប់ឃាត់ខ្លួនកូនអកតញ្ញូម្នាក់ដែលបានយកកាំបិតបុ័ងតោគំរាម និងយកឆ្នាំងបាយវាយក្បាលម្ដាយឲ្យរងរបួស ព្រោះតែខឹងសុំលុយ៥០០០រៀល យកទៅទិញស្រាផឹកមិនបាន ។ហេតុការណ៍នេះ កើតឡើងកាលពីវេលាម៉ោងប្រមាណ៣និង៣០នាទីទៀបភ្លឺថ្ងៃទី៣១ ខែមីនា ឆ្នាំ២០២៥កន្លងទៅ នៅភូមិស្លាបតាអោន ឃុំគគីរ ស្រុកកៀនស្វាយ ។
លោកវរសេនីយ៍ឯក ព្រុំ សំណាង អធិការនគរបាលស្រុកកៀនស្វាយ បានឲ្យដឹងថា កូនប្រុសអកតញ្ញូរូបនេះឈ្មោះ កុយ ចំណាន ហៅ ពៅ អាយុ២៨ឆ្នាំ ពុំមានមុខរបរពិតប្រាកដទេ និងមានទីលំនៅក្នុងភូមិ ឃុំ ខាងលើ ។ ជាមួយនឹងការចាប់ឃាត់ខ្លួន សមត្ថកិច្ចបានដកហូត ឆ្នាំងបាយអុីណុក ១ និងកាំបិតប៉័ងតោ ១ ។
ចំណែកជនរងគ្រោះជាម្តាយឈ្មោះ អុក វណ្ណា អាយុ៧៣ឆ្នាំ ។លោកអធិការ ព្រុំ សំណាង បានឲ្យដឹងទៀតថា មុនពេលកើតហេតុ កូនប្រុសរូបនេះបានដើរលេងមិនចូលផ្ទះចំនួន៣ថ្ងៃមកហើយ ។ លុះនៅថ្ងៃទី៣១ ខែមីនា ឆ្នាំ២០២៥ វេលាម៉ោង៣និង៣០នាទីទៀបភ្លឺ ខណៈម្ដាយកំពុងសម្រាកនៅក្នុងផ្ទះ ប់តែជននេះដើរចូលមកក្នុងផ្ទះ ហើយស្រែកសុំប្រាក់ម្ដាយចំនួន៥០០០រៀល ដើម្បីយកទៅទិញស្រាផឹក ។ ប៉ុន្តែ ម្ដាយមិនមានប្រាក់ឲ្យទេ និងបាននិយាយថា«កូនចូលដេកទៅយប់ហើយ» ។ ផ្ទុយទៅវិញ កូនប្រុសរូបនេះនិយាយតបវិញថា «អញមិនដេកទេ» និងបានយកកាំបិតប៉័ងតោនៅលើគ្រែមកកាន់នៅនឹងដៃ តែមិនបានកាប់ម្តាយទេ ។
បន្ទាប់មក ទម្លាក់កាំបិតចោល រួចដើរទៅយកឆ្នាំងបាយអុីណុក ពីចង្ក្រានបាយមកវាយម្តាយចំក្បាលខាងស្តាំ បណ្ដាលឲ្យរងរបួសគ្រូពេទ្យដេរ២ថ្នេរ ព្រមទាំងបោកចានបាយអស់៤ទៀត ។ក្រោយពីធ្វើសកម្មភាពរួច ជននេះក៏បានចូលទៅសម្រាក ចំណែកម្តាយដែលរងរបួស ត្រូវបានជិតខាងដឹកតាមម៉ូតូទៅមណ្ឌលសុខភាពគគីរដើម្បីព្យាបាល ។
សមត្ថកិច្ចបន្តថា លុះនៅថ្ងៃទី៣១ ខែមីនា ឆ្នាំ២០២៥ វេលាម៉ោង៧ព្រឹក ជនរងគ្រោះជាម្ដាយបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលគគីរ ។ ក្រោយពីទទួលបានពាក្យបណ្តឹងនេះ គរបាលប៉ុស្តិ៍គគីរ សហការជាមួយនគរបាលស្រុកកៀនស្វាយ បានទៅដល់កន្លែងកើតហេតុ ធ្វើការចាប់ឃាត់ខ្លួនកូនប្រុសអកតញ្ញូនាំមកសាកសួរ ។
នៅចំពោះមុខសមត្ថកិច្ច ជននេះឆ្លើយថា ខ្លួនពិតជាបានប្រើអំពើហិង្សាទៅលើម្តាយមែន ព្រោះតែចង់បានប្រាក់ពីម្តាយយកទៅទិញស្រាផឹក ហើយសមត្ថកិច្ចក៏បានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ៕
ចែករំលែកព័តមាននេះ