អភិបាលខេត្តព្រៃវែង ដើរចម្ងាយ១៦គីឡូម៉ែត្រ ត្រួតពិនិត្យបណ្តាប៉ុស្តិ៍នគរបាលការពារព្រំដែន ក្នុងស្រុកពាមជរ
ខេត្តព្រៃវែង ៖ នៅព្រឹកថ្ងៃទី៣១ មីនា ២០២៥ លោក សួន សុម៉ាលីន អភិបាលខេត្តព្រៃវែង បានដឹកនាំក្រុមការងារធ្វើដំណើរដោយថ្មើរជើង…
ខេត្តព្រៃវែង ៖ នៅព្រឹកថ្ងៃទី៣១ មីនា ២០២៥ លោក សួន សុម៉ាលីន អភិបាលខេត្តព្រៃវែង បានដឹកនាំក្រុមការងារធ្វើដំណើរដោយថ្មើរជើង ចុះត្រួតពិនិត្យតាមបណ្តាប៉ុស្តិ៍នគរបាលការពារព្រំដែន ក្នុងស្រុកពាមជរ ខេត្តព្រៃវែង និងសួរសុខទុក្ខកងកម្លាំងទាំងអស់ ដែលឈរជើងការពារនៅតាមខ្សែបន្ទាត់ព្រំដែននោះផងដែរ ។
ក្នុងសកម្មភាពចុះត្រួតពិនិត្យនេះ លោកអភិបាលខេត្ត និងក្រុមការងារបានធ្វើដំណើរដោយថ្មើរជើងតាមខ្សែបន្ទាត់ព្រំដែន ក្នុងចំងាយដីប្រមាណ ១៦គីឡូម៉ែ ដោយផ្ដើមចេញពីប៉ុស្តិ៍នគរបាលការពារព្រំដែនកោះរកា ក្នុងឃុំកោះរកា រហូតដល់ដំណាក់ល្បាតកោះស្កូ ក្នុងឃុំកោះសំពៅ នៃស្រុកពាមជរ ដោយបានត្រួតពិនិត្យតាមបណ្ដាប៉ុស្តិ៍គោលដៅសំខាន់ៗ ចំនួន ៧គោលដៅ ។
ក្នុងពេលចុះត្រួតពិនិត្យនេះ លោក សួន សុម៉ាលីន អភិបាលខេត្តព្រៃវែង បានសម្តែងនូវការកោតសរសើរ និងដឹងគុណដល់បងប្អូនកងទ័ពទាំងអស់ ដែលបានលះបង់កម្លាំងកាយ-ចិត្ត បំពេញតួនាទីភារកិច្ចរបស់ខ្លួន ក្នុងបុព្វហេតុការពារជាតិ អធិបតេយ្យភាព បូរណភាពទឹកដីជាពិសេស ការងារទប់ស្កាត់ បង្ការ បង្ក្រាបបទល្មើសឆ្លងដែនខុសច្បាប់គ្រប់ប្រភេទប្រកបដោយប្រសិទ្ធភាព ។
ក្នុងឱកាសនោះផងដែរ លោកអភិបាលខេត្ត ក៏បាននាំយកអំណាយមួយចំនួន រួមមាន ៖ អង្ករ ទឹកសុទ្ធ ភេសជ្ជៈ មី ត្រីខ និងថវិកាជូនដល់កងកម្លាំង១៥៨នាក់ ក្នុងម្នាក់ៗទទួលបានថវិកា ១០ម៉ឺនរៀល និងឧបត្ថម្ភអង្គភាពការពារព្រំដែន ក្នុងមួយអង្គភាព ១លានរៀលផងដែរ ៕
ចែករំលែកព័តមាននេះ