រាជធានីភ្នំពេញ ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានគូសបញ្ជាក់ថា កម្ពុជាក៏ជាប្រទេសមួយដែលរងគ្រោះ ដោយការគំរាមកំហែងពីបទល្មើសឆ្លងដែនមានជាអាទិ៍…
រាជធានីភ្នំពេញ ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានគូសបញ្ជាក់ថា កម្ពុជាក៏ជាប្រទេសមួយដែលរងគ្រោះ ដោយការគំរាមកំហែងពីបទល្មើសឆ្លងដែនមានជាអាទិ៍ បទល្មើសជួញដូរមនុស្ស បទល្មើសជួញដូរ និងចែកចាយគ្រឿងញៀន និងបទល្មើសឆបោកតាមប្រព័ន្ធបច្ចេកវិទ្យាជាដើម ដែលក្រុមឧក្រឹដ្ឋជនបាន និងកំពុងពង្វក់ស្មារតីប្រជាពលរដ្ឋក្មេង ចាស់ ប្រុសស្រី ឱ្យឆ្កួត វង្វេង និងរងគ្រោះផ្លូវកាយ ផ្លូវចិត្ត បញ្ញាស្មារតី ទ្រព្យធន និងផ្លូវភេទយ៉ាងធ្ងន់ធ្ងររហូតដល់មានរបួស ពិការ វីបល្លាសស្មារតី ឬបាត់បង់អាយុជីវិតថែមទៀតផង ។
ការលើកឡើងរបស់ឯកឧត្តមអភិសន្តិបណ្ឌិត ស សុខា ដូចនេះធ្វើឡើងក្នុងពិធីផ្សព្វផ្សាយ របាយការណ៍ជាតិស្តីពីការប្រយុទ្ធប្រឆាំងអំពើជួញដូរមនុស្ស ឆ្នាំ២០២៤ និងលើកទិសដៅការងារ ឆ្នាំ២០២៥ របស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅទីស្តីការក្រសួង នាព្រឹកថ្ងៃទី២៧ ខែមីនា ឆ្នាំ២០២៥ ។
ឯកឧត្តមអភិសន្តិបណ្ឌិត ឧបនាយករដ្ឋមន្ត្រីបានគូសបញ្ជាក់ថា បញ្ហាភាពរងគ្រោះ និងងាយរងគ្រោះរបស់ប្រជាជនកម្ពុជា ដែលធ្វើទេសន្តរប្រវេសន៍ នៅប្រទេសគោលដៅមួយចំនួន ជាពិសេសក្នុងវិស័យនេសាទសមុទ្រមិនទាន់ត្រូវអាចដោះស្រាយបាននៅឡើយផង ក៏មានប្រជាជន នៃបណ្តាប្រទេសក្នុងតំបន់ និងក្រៅតំបន់ហូរចូលមកប្រទេសកម្ពុជា ទាំងដោយស្របច្បាប់ ទាំងមិនស្របច្បាប់ និងបានបង្កើតមូលដ្ឋានប្រព្រឹត្តបទល្មើសដោយសម្ងាត់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ដែលបង្កប់នូវបទល្មើសពាក់ព័ន្ធដទៃទៀត រួមទាំងអំពើបង្ខិតបង្ខំដោយគម្រាមកំហែង កេងប្រវ័ញ្ច ជួញដូរ រំលោភ បំពានលើរាងកាយ ផ្លូវភេទជាដើម និងអូសទាញឱ្យមានការចូលរួមក្នុងបណ្តាញបទល្មើសយ៉ាងច្រើនកុះករ ដោយមានទាំងជនល្មើស និងមានទាំងជនរងគ្រោះ ។
ឯកឧត្តមឧបនាយករដ្ឋមន្ត្រី បានបន្តថា សមត្ថកិច្ចកម្ពុជាទទួលបានសេចក្តីរាយការណ៍ និងធ្វើប្រតិបត្តិការបង្ក្រាបទីតាំងដែលសង្ស័យថា ប្រព្រឹត្តបទល្មើសជាបន្តបន្ទាប់ ហើយបានសហការជាមួយស្ថានទូត ឬស្ថានតំណាងបេសកកម្ម នៃបណ្តាប្រទេសពាក់ព័ន្ធ ដើម្បីដោះស្រាយបញ្ហាប្រជាពលរដ្ឋខ្លួន ដែលត្រូវបានរកឃើញនៅកម្ពុជា និងចាប់ខ្លួនជនសង្ស័យបញ្ជូនទៅតុលាការ ។
បើតាមរបាយការណ៍របស់អគ្គលេខាធិការដ្ឋានគណៈកម្មាធិការជាតិ ដែលបានបង្ហាញដោយលោកជំទាវ ជូ ប៊ុនអេង អនុប្រធានអចិន្ត្រៃយ៍គណៈកម្មាធិការជាតិប្រឆាំងអំពើជួញដូរមនុស្សបានឱ្យដឹងថា ក្នុងឆ្នាំ២០២៤ កន្លងទៅនេះ អំពើជួញដូរមនុស្ស និងអំពើធ្វើអាជីវកម្មផ្លូវភេទ មិនបានថយចុះឡើយ ថែមទាំង បានកើនឡើងដែលជារួម លទ្ធផលនៃការបង្ក្រាបបានរហូតដល់ ១៩៧ករណី គឺកើនចំនួន ៣៣ករណី ស្មើនឹង២០.១៥ភាគរយ បើប្រៀបធៀបទៅនឹងលទ្ធផល នៃការបង្ក្រាបឆ្នាំ២០២៣។ សមត្ថកិច្ចបានកំណត់អត្តសញ្ញាណរកឃើញជនរងគ្រោះចំនួន ៥២៣នាក់ និងឃាត់ខ្លួនជនសង្ស័យបញ្ជូនទៅតុលាការ ២៧៣នាក់ ក្នុងនោះមានជនបរទេស ៣០នាក់ផងដែរ ហើយអ្វីដែលគួរឲ្យកត់សម្គាល់ គឺមានការកើនឡើង នូវអំពើជួញដូរ ឬធ្វើអាជីវកម្មផ្លូវភេទលើកុមារដោយផ្ទាល់ និងតាមប្រព័ន្ធអនឡាញ មានអនីតិជនរងគ្រោះអាយុក្រោម១៨ឆ្នាំ រហូតដល់ទៅ ២៣០នាក់ ស្មើនឹង ៤៣.៩៧ភាគរយ នៃចំនួនជនរងគ្រោះសរុប ៕
ចែករំលែកព័តមាននេះ