រាជធានីភ្នំពេញៈ បុរសជាជនអនាថាម្នាក់ត្រូវបានជនមិនស្គាល់មុខមួយក្រុមនាំគ្នាវាយបណ្ដាលឲ្យរងរបួសធ្ងន់ហើយស្លាប់នៅពេលបញ្ជូនទៅកាន់មន្ទីរពេទ្យមិត្តភាពកម្ពុជាចិនព្រះកុសុមៈ ។
ហេតុការណ៍នេះបានកើតឡើងកាលពីវេលាម៉ោង០១និង១៧នាទីយប់រំលងអាធ្រាត្រចូល ថ្ងៃទី២៧ ខែមិនា ឆ្នាំ២០២៥ (ម៉ោងក្នុងកាមេរ៉ាសុវត្តិភាព)នៅចំណុចស្ពានអាកាស៧មករា មហាវិថីសហព័ទ្ធរុស្ស៊ី មុខឃ្លាំងលក់រថយន្តលីហេង ក្នុងភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ជនរងគ្រោះ ឈ្មោះ ទិត្យ ប៊ុនថា ភេទប្រុស អាយុ៤៨ឆ្នាំ ជាជនអនាថា ស្នាក់នៅក្នុងខ្ទម ក្នុង ភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញហើយបានស្លាប់បាត់បង់ជីវិតនៅវេលាម៉ោង៣ទាបភ្លឺនៅពេលបញ្ជូនទៅកាន់មន្ទីរពេទ្យមិត្តភាពកម្ពុជាចិនព្រះកុសុមៈ ។
តាមសាក្សីបានឲ្យដឹងថា នៅមុនពេលកើតហេតុ គេឃើញបុរសស្លៀកពាក់ជាសន្តិសុខម្នាក់មានទំនាស់និងវាយទៅលើនារីជាជនអនាថាម្នាក់ ។ ខណៈនោះគេឃើញជនរងគ្រោះបានទៅសួរនាំហើយត្រូវបុរសជាសន្តិសុខរូបរួមនឹងបក្សពួកបាននាំគ្នាវាយតប់ទៅលើជនរងគ្រោះបណ្ដាឲ្យរងរបួសធ្ងន់រួចគេចខ្លួនបាត់ ។ ក្រោយមកជនរងគ្រោះត្រូវបានគេបញ្ជូនទៅកាន់មន្ទីរពេទ្យហើយក៏បានស្លាប់បាត់បង់ជីវិត។
តាមព័ត៌មានឲ្យដឹងទៀតថា នៅយប់នោះខណៈពេលដែលស្ត្រីអាយុ៣៥ឆ្នាំម្នាក់ ជនអនាថា រស់នៅក្រោមស្ពានអាកាស៧មករា ស្រាប់តែមានបុរសម្នាក់ស្លៀកពាក់ឯកសណ្ឋានសន្តិសុខមកសួររកថ្នាំញៀនប្រើប្រាស់តែនាងប្រាប់ថាពុំមាន ។ លុះក្រោយមកបុរសរូបនេះបានបបួលនាងរួមភេទដោយត្រូវរ៉ូវគ្នាក្នុងតម្លៃ២ម៉ឺនរៀល ។ បន្ទាប់ពីរួមភេទរួច ជននោះបានឲ្យប្រាក់ក្រដាស់៥ម៉ឺនរៀល តែនាងអត់មានលុយអាប់ ក៏បានដើរទៅដូរហើយជនដៃដល់បានទៅតាមទារលុយវិញ ក៏កើតទៅជាទំនាស់វាយទៅលើនារីជាជនអនាថារូបនោះ ខណៈនោះជនរងគ្រោះក៏បានទៅសួរនាំក៏ត្រូវក្រុមជននោះព្រួតគ្នាវាយរហូតដល់ដួលដេកនៅលើដី រួចនាំគ្នាគេចបាត់ ។ ជនរងគ្រោះត្រូវបានគេបញ្ជូនទៅកាន់មន្ទីរពេទ្យក្រោយមកក៏បានស្លាប់បាត់បង់ជីវិតនៅវេលាម៉ោងម៉ោង៣ទៀបភ្លឺថ្ងៃទី២៧ ខែមីនានេះ។
ជនរងគ្រោះត្រូវបានជនដៃដល់វាយរងរបួសធ្ងន់ធ្ងរ បើតាមការត្រួតពិនិត្យសព មានស្នាមជាំនៅក្បាលចំហៀងខាងស្ដាំនិងស្នាមជាំហើមពោរនៅក្បាលផ្នែកខាងក្រោយនិងដៃជើងដងខ្លួន។
តាមការពិនិត្យលោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា សពជនរងគ្រោះស្លាប់ដោយប៉ះទង្គិចក្បាល និងខ្លួនប្រាណធ្ងន់ធ្ងរដោយការប្រើហិង្សា ៕
ចែករំលែកព័តមាននេះ