ខេត្តបាត់ដំបង ៖ ចាត់ទុកថា យីអ៊ុនធ្លាក់ស្រុតដល់កំរិត សម្រាប់យុវជន០៣នាក់ ដែលជិះម៉ូតូឌុបគ្នាចេញពីផ្ទះ ក្នុងចម្ងាយរាប់សិបគីឡូម៉ែត្រ មិនជួបបញ្ហាអ្វីបន្តិចសោះ ស្រាប់តែជិះមកដល់ខាងមុខសាលាឃុំមួយកន្លែង ក៏ត្រូវដើមក្ងោកដ៏ធំ០១ដើមរលំសង្កត់លើ…
ខេត្តបាត់ដំបង ៖ ចាត់ទុកថា យីអ៊ុនធ្លាក់ស្រុតដល់កំរិត សម្រាប់យុវជន០៣នាក់ ដែលជិះម៉ូតូឌុបគ្នាចេញពីផ្ទះ ក្នុងចម្ងាយរាប់សិបគីឡូម៉ែត្រ មិនជួបបញ្ហាអ្វីបន្តិចសោះ ស្រាប់តែជិះមកដល់ខាងមុខសាលាឃុំមួយកន្លែង ក៏ត្រូវដើមក្ងោកដ៏ធំ០១ដើមរលំសង្កត់លើ កាលពីវេលាម៉ោង៨និង១០នាទីព្រឹកថ្ងៃទី ០៨ មីនា នៅក្នុងភូមិបាយដំរាំ ឃុំឈើទាន ស្រុកបាណន់ តែសំណាងល្អ ពុំមានអ្នករងរបួសធ្ងន់។
តាមរយៈរបាយការណ៍ នាយប៉ុស្តិ៍រដ្ឋបាលឃុំឈើទាល លោក ស៊ីម ពីទូ បានឲ្យដឹងថា ដើមក្ងោកដ៏ធំ០១ដើមនោះ បានរលើងទាំងឬសរលំសង្កត់លើអ្នកដំណើរ ដោយសារតែដើមឈើចាស់ ឬសពុកផុយ ហើយពេលត្រូវភ្លៀងទៀត ទើបរលំរលើងទាំងឬសតែម្ដង។ លោកបានប្រាប់ថា ដើមក្ងោកនោះ បានរលំមកលើដងផ្លូវ ហើយបានសង្កត់អ្នកដំណើរចំនួន០៣នាក់ ដែលកំពុងជិះម៉ូតូឌុបគ្នា តែមិនបណ្ដាលឲ្យរងរបួសធ្ងន់ធ្ងរទេ។
របាយការណ៍ដដែលបានឲ្យដឹងថា ជនរងគ្រោះទាំង០៣នាក់មាន៖ ១-ឈ្មោះ លី ចន្ទ្រា ភេទប្រុសអាយុ២០ឆ្នាំ ២-ឈ្មោះ ផាន់ណា ទិត្យា ភេទប្រុស អាយុ១៩ឆ្នាំ និង៣-ឈ្មោះ វុធ ធីនី ភេទប្រុសអាយុ២០ឆ្នាំ ពួកគេរស់នៅភូមិវត្តកន្ទឺ ឃុំកន្ទឺ១ ស្រុកបាណន់ ។
បើតាមជនរងគ្រោះទាំង០៣នាក់ បានប្រាប់សមត្ថកិច្ចថា ពួកគេទាំង០៣នាក់ បានជិះម៉ូតូចេញពីផ្ទះ ឆ្ពោះមកកាន់ក្រុងបាត់ដំបង ដើម្បីមកធ្វើការ តែពេលជិះមកដល់ចំណុចខាងមុខសាលាឃុំឈើទាល ក៏ត្រូវដើមក្ងោករលំសង្កត់លើល្មម ធ្វើឲ្យពួកគេរងរបួសទាំងអស់គ្នា តែមិនធ្ងន់ធ្ងរទេ ។
លោក ស៊ីម ពីទូ បាននិយាយថា ពេលត្រូវដើមឈើសង្កត់លើដំបូង ជនរងគ្រោះខ្លះ ហាក់បាត់ស្មារតី ព្រោះភ័យរន្ធត់។ ប៉ុន្តែនៅពេលសមត្ថកិច្ចនិងអ្នកភូមិផង បានព្យាយាមសង្គ្រោះ និង បញ្ជូនដល់មណ្ឌលសុខភាព ដើម្បីសង្គ្រោះបឋម បន្តិចក្រោយមក ជនរងគ្រោះទាំងអស់ក៏បានដឹងខ្លួនវិញ មិនមានរបួសធ្ងន់ទេ។ ពេលនេះពួកគេបានវិលត្រឡប់ទៅកាន់លំនៅឋានវិញហើយ៕
ចែករំលែកព័តមាននេះ