ខេត្តព្រៃវែង ៖ នៅព្រឹកថ្ងៃទី២៦ ខែកុម្ភៈ អាជ្ញាធរខេត្តព្រៃវែង បានដឹកនាំមន្ត្រីជំនាញមន្ទីរសុខាភិបាលខេត្ត និងមន្ទីរកសិកម្មខេត្ត ចុះបាញ់ថ្នាំសម្លាប់មេរោគ ព្រមទាំងបានធ្វើការអប់រំណែនាំដល់ប្រជាពលរដ្ឋជាច្រើនគ្រួសារ ដែលរស់នៅក្នុងភូមិតាង៉ក…
ខេត្តព្រៃវែង ៖ នៅព្រឹកថ្ងៃទី២៦ ខែកុម្ភៈ អាជ្ញាធរខេត្តព្រៃវែង បានដឹកនាំមន្ត្រីជំនាញមន្ទីរសុខាភិបាលខេត្ត និងមន្ទីរកសិកម្មខេត្ត ចុះបាញ់ថ្នាំសម្លាប់មេរោគ ព្រមទាំងបានធ្វើការអប់រំណែនាំដល់ប្រជាពលរដ្ឋជាច្រើនគ្រួសារ ដែលរស់នៅក្នុងភូមិតាង៉ក ឃុំរំចេក ស្រុកព្រះស្ដេច ឲ្យពួកគាត់រស់នៅដោយមានការប្រុងប្រយ័ត្នខ្ពស់ ហើយហាមដាច់ខាតការប៉ះពាល់ជាមួយសត្វមាន់ទាដែលឈឺងាប់ ។
សកម្មភាពចុះអន្តរាគមន៍ដល់មូលដ្ឋាននេះ បានធ្វើឡើង គឺបន្ទាប់ពីក្រសួងសុខាភិបាល បានចេញ ប្រកាសព័ត៌មានថា បានរកឃើញកុមារាអាយុ ២ ឆ្នាំ ៧ខែ ម្នាក់ ដែលមានទីលំនៅក្នុងភូមិតាង៉ក ឃុំរំចេក ស្រុកព្រះស្ដេច ខេត្តព្រៃវែង បានឆ្លងជំងឺផ្ដាសាយបក្សី H5N1 និងបានស្លាប់ដោយសារតែជំងឺនេះកាលពីថ្ងៃទី ២៥ កុម្ភៈ ។
យោងតាមសេចក្តីប្រកាសព័ត៌មានរបស់ក្រសួងសុខាភិបាល បានបញ្ជាក់ថា ផ្ទះកុមារា ដែលបានឆ្លង និងស្លាប់ដោយជំងឺផ្តាសាយបក្សី មានសត្វមាន់ឈឺងាប់អស់ចំនួន ១៥ក្បាល ។ ហើយកុមារា រងគ្រោះបានដេក និងលេងនៅក្បែរសត្វមាន់ ដែលឈឺងាប់ទាំងនោះ ទើបបណ្ដាលឱ្យឆ្លងជំងឺហើយភ្លាមៗឪពុកម្ដាយខ្វះការយកចិត្តទុកដាក់មិនបានបញ្ជូនកូន មកកាន់មន្ទីរពេទ្យឲ្យបានទាន់ពេលវេលា ទើបធ្វើឲ្យអាកាសរបស់កូនមានសភាពធ្ងន់ធ្ងរ រហូតក្រុមគ្រូពេទ្យជួយសង្គ្រោះមិនបាន ។
ដោយឡែកលោក ភុន សម្ផស្ស អភិបាលស្រុកព្រះស្ដេច បានអោយដឹងថា យោងតាមការចុះសួរព័ត៌មានពីក្រុមគ្រួសារកុមាររងគ្រោះ បានបញ្ជាក់ថា ក្នុងអំឡុងពេលឆ្លងជំងឺ កុមារារងគ្រោះមិនបានរស់នៅក្នុងស្រុកព្រះស្តេចនោះទេ គឺត្រូវបានឪពុកម្ដាយនាំទៅលេងផ្ទះសាច់ញាតិបងប្អូន នៅឯខេត្តត្បូងឃ្មុំ រហូតឆ្លងជំងឺ និងស្លា.ប់បាត់បង់ ជីវិត គឺមិនបានរស់នៅក្នុងផ្ទះរបស់ខ្លួន ក្នុងភូមិតាង៉ក ឃុំរំចេក ស្រុកព្រះស្ដេច នោះទេ ។
ទោះជាយ៉ាងណាក៏ដោយ ក្រោយពីររកឃើញថា កុមារារងគ្រោះ បានស្លា.ប់បាត់បង់ជីវិត ដោយសារជំងឺផ្តាសាយបក្សី អាជ្ញាធរខេត្តនិងស្រុក ក៏ដូចជាក្រុមគ្រូពេទ្យពាក់ព័ន្ធ បានចុះទៅពិនិត្យដោយផ្ទាល់នៅជុំវិញលំនៅឋានរបស់កុមារារងគ្រោះ ធ្វើការតាមដានស្រាវជ្រាវរកប្រភពកំណើត នៃមេរោគ ប្រមូលមនុស្ស ដែលពាក់ព័ន្ធទាំងអស់មកត្រួតពិនិត្យសុខភាព បាញ់ថ្នាំសម្លាប់មេរោគនៅតាមទីតាំងសំខាន់ៗ និងបានអប់រំណែនាំឲ្យប្រជាពលរដ្ឋទាំងអស់ មានការប្រុងប្រយ័ត្នឱ្យបានខ្ពស់ ប្រសិនបើនៅក្នុងផ្ទះមានសត្វមាន់ទាឈឺ ឬងាប់ ហាមដាច់ខាតមិនឱ្យប៉ះពាល់ ឬបរិភោគ ហើយត្រូវរាយការណ៍ទៅមន្ត្រីពាក់ព័ន្ធនៅក្នុងភូមិជាបន្ទាន់ ។
បើតាមសេចក្ដីជូនដំណឹងរបស់ក្រសួងសុខាភិបាល នៅថ្ងៃ២៥ ខែកុម្ភៈ ឆ្នាំ២០២៥ បានឱ្យដឹងថា «មានអ្នកជំងឺផ្តាសាយបក្សីចំនួន ១ករណី កើតលើកុមារាអាយុ ២ឆ្នាំ៧ខែ និងត្រូវបានបញ្ជាក់ថា វិជ្ជមានវីរុសផ្តាសាយ បក្សីប្រភេទហាស់៥ អ៊ុន១ (H5N1) ពីវិទ្យាស្ថានជាតិសុខភាពសាធារណៈ នៅថ្ងៃទី២៥ ខែកុម្ភៈ ឆ្នាំ២០២៥ ដែលមាន ទីលំនៅក្នុងភូមិតាង៉ក ឃុំរំចេក ស្រុកព្រះស្តេច ខេត្តព្រៃវែង។ ទោះជាមានការយកចិត្តទុកដាក់ថែទាំ និងជួយសង្គ្រោះ ពីសំណាក់ក្រុមគ្រូពេទ្យក៏ដោយ កុមារបានស្លាប់នៅថ្ងៃទី២៥ ខែកុម្ភៈ ឆ្នាំ២០២៥ ដោយសារឪពុកម្តាយទើបតែបាន នាំកុមារមកដល់មន្ទីរពេទ្យ បណ្តាលឱ្យកុមារមានស្ថានភាពធ្ងន់ធ្ងរពេក រួមមានគ្រុនក្តៅ ក្អក ហត់ និងពិបាកដក ដង្ហើមធ្ងន់ធ្ងរ» ។
តាមការសាកសួរបង្ហាញថា ផ្ទះអ្នកជំងឺមានចិញ្ចឹមមាន់ជាលក្ខណៈគ្រួសារ និងមានមាន់ងាប់ ប្រហែល១៥ក្បាល និងខ្លះទៀតកំពុងឈឺ ហើយកុមារបានដេក និងលេងនៅក្រោមផ្ទះជិតទ្រុងមាន់ ។
ក្រុមឆ្លើយតបបន្ទាន់របស់ក្រសួងសុខាភិបាលថ្នាក់ជាតិ និងថ្នាក់ក្រោមជាតិ បាននិងកំពុងសហការ ជាមួយក្រុមការងារនៃមន្ទីរកសិកម្មខេត្ត និងអាជ្ញាធរមូលដ្ឋានគ្រប់លំដាប់ថ្នាក់ ធ្វើការអង្កេតស្រាវជ្រាវយ៉ាងសកម្ម លើការកើតឡើងនូវជំងឺផ្តាសាយបក្សី និងធ្វើការឆ្លើយតបទៅតាមវិធីសាស្ត្រ និងពិធីសារបច្ចេកទេស បន្តការស្វែង រកប្រភពចម្លង ទាំងលើសត្វ និងមនុស្ស និងបន្តស្វែងរកករណីសង្ស័យ និងអ្នកប៉ះពាល់ ដើម្បីទប់ស្កាត់ការឆ្លងបន្ត ទៅអ្នកដទៃទៀតក្នុងសហគមន៍ ព្រមទាំងចែកជូនឱសថតាមីហ្គូ (Tamiflu) ដល់អ្នកប៉ះពាល់ជិតស្និទ្ធ និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិដែលកើតហេតុខាងលើ ។
ក្រសួងសុខាភិបាល ក៏បានក្រើនរំលឹកសារជាថ្មីម្តងទៀត ដល់ប្រជាពលរដ្ឋទាំងអស់ សូមយកចិត្ត ទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ពីព្រោះជំងឺផ្តាសាយបក្សី H5N1 នៅតែបន្តគំរាមកំហែងដល់ សុខភាពប្រជាពលរដ្ឋ ហើយក៏សូមជម្រាបដល់បងប្អូន ប្រសិនបើមានអាការៈក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬងាប់ក្នុងអំឡុង១៤ថ្ងៃមុនថ្ងៃចាប់ផ្តើម មានរោគសញ្ញា សូមកុំទៅជួបជុំ ឬទីប្រជុំជនដែលមានមនុស្សច្រើន និងត្រូវស្វែងរកការពិគ្រោះយោបល់ និងការ ពិនិត្យព្យាបាលនៅមណ្ឌលសុខភាព ឬមន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេល ធ្វើឱ្យប្រឈមនឹង ហានិភ័យខ្ពស់នៃការស្លាប់ជាយថាហេតុ ៕
ចែករំលែកព័តមាននេះ