រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១៨ ខែកុម្ភៈ ឆ្នាំ២០២៥នេះ បានធ្វើសន្និសិទកាសែត បង្ហាញជនជនសង្ស័យ ជាជនជាតិចិន ចំនួន៥នាក់…
រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១៨ ខែកុម្ភៈ ឆ្នាំ២០២៥នេះ បានធ្វើសន្និសិទកាសែត បង្ហាញជនជនសង្ស័យ ជាជនជាតិចិន ចំនួន៥នាក់ ដែលបង្កហិ.ង្សាដោយចេតនាមានស្ថានទម្ងន់ទោស ដោយប្រើកាំបិតខ្លី ចាក់គូទំនាស់ បណ្តាលឲ្យរងរបួសកំបះគូថ និងត្រគៀក ចំនួន០៨កាំបិត និងប្រើប្រាស់អាវុធដោយគ្មានការអនុញ្ញាត ប្រើអាវុធខ្លីក្លែងក្លាយ ភ្លង់គំរាម និងអាវុធ AK47 ចំនួន០២ដើម បាញ់ចុះ ដីចំនួន០១គ្រាប់ ។
ជនសង្ស័យ ដែលបង្ហាញមុខ រួមមាន ៖
១-ឈ្មោះ HAN CHONG ភេទប្រុស អាយុ៣៤ឆ្នាំ ជនជាតិចិន (ជនដៃដល់កាន់អាវុធ AK47 បាញ់ ០១គ្រាប់) (មិនមាន លិខិតឆ្លងដែនតាមខ្លួន)
២-ឈ្មោះ LIU YONGJIE ភេទប្រុស អាយុ៣៤ឆ្នាំ ជនជាតិចិន (ជនដៃដល់កាន់អាវុធAK៤៧) (មិនមានលិខិតឆ្លងដែនតាមខ្លួន)
៣-ឈ្មោះ ZHU DACHUN ភេទប្រុស អាយុ៣៨ឆ្នាំ ជនជាតិចិន (ជនដៃដល់កាន់អាវុធខ្លីក្លែងក្លាយ ភួង់គំរាម) មានលិខិតឆ្លងដែន
៤-ឈ្មោះ DENG TIAN MING ហៅ អីមី ភេទប្រុស អាយុ៣០ឆ្នាំ ជនជាតិចិន (ជនដៃដល់ យកកាំបិតចាក់លើឈ្មោះ HAN CHONG) មានលិខិតឆ្លងដែន
និង៥-ឈ្មោះ LIZIYUAN ភេទប្រុស អាយុ២៩ឆ្នាំ ជនជាតិចិន (មិនមានលិខិតឆ្លងដែនតាមខ្លួន) ។
លោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានអោយដឹងថា ដោយអនុវត្តតាមបទបញ្ជា ឯកឧត្តម ស ថេត អគ្គស្នងការនគរបាលជាតិ និងមានការណែនាំពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ និង
បទបញ្ជាពីឧត្តមសេនីយ៍ឯក ជួន ណារិន្ទ អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ និងមានការដឹកនាំបញ្ជាផ្ទាល់ពីឧត្តមសេនីយ៍ត្រី ប៊ុន សត្យា ស្នងការរង នគរបាលរាជធានីភ្នំពេញ ទទួលផែននគរបាលព្រហ្មទណ្ឌ កម្លាំងជំនាញការិយាល័យព្រហ្មទណ្ឌកំរិតស្រាល និងការិយាល័យព្រហ្មទណ្ឌកំរិតធ្ងន់ និងនគរបាលខណ្ឌពោធិ៍សែនជ័យ បានសហការជាមួយកម្លាំងនគរបាលនាយកដ្ឋានក្រសួងមហាផ្ទៃ និងកម្លាំងស្នងការដ្ឋាននគរបាលខេត្តបន្ទាយមានជ័យ កម្លាំងស្នងការនគរបាលខេត្តបាត់ដំបង បានធ្វើការស្រាវជ្រាវ ហើយឈានឃាត់ខ្លួនជនសង្ស័យជាជនជាតិចិន ចំនួន៥នាក់ ដែលពាក់ព័ន្ធការប្រព្រឹត្តបទល្មើសហិ.ង្សាដោយចេតនាមានស្ថានទម្ងន់ទោស (ប្រើកាំបិតខ្លីចាក់បណ្តាលឲ្យរងរបួសកំបះគូថ និងត្រគៀកចំនួន០៨កាំបិត) និងប្រើប្រាស់អាវុធដោយគ្មានការអនុញ្ញាត (ប្រើអាវុធខ្លីក្លែងក្លាយ ភួង់គំរាម និងអាវុធ AK47 ចំនួន០២ដើម បាញ់ចុះដីចំនួន០១គ្រាប់) ប្រព្រឹត្តនៅចំណុចបរិវេណអគាររតនៈ សម្បត្តិ ផ្លូវសហព័ន្ធរុស្សី ភូមិតាងួន២ សង្កាត់កាកាប១ ខណ្ឌពោធិសែនជ័យ រាជធានីភ្នំពេញ កាលពីថ្ងៃទី១៤ ខែកុម្ភៈ ឆ្នាំ២០២៥ វេលាម៉ោង១២និង០០នាទី ថ្ងៃត្រង់ ។
លោកវរសេនីយ៍ឯក សំ វិច្ឆិកា បានឲ្យដឹងទៀតថា ប្រតិបត្តិការបង្ក្រាបជនជាតិចិន ដែលបង្កហិង្សានេះ បានធ្វើឡើងក្នុងរយៈពេលមិនដល់២៤ម៉ោងផង បន្ទាប់ពីកើតហេតុ។ ការផ្ទុះអាវុធនេះ គឺផ្ដើមចេញពីអំពើហិ.ង្សារវាងជនជាតិចិន និងជនជាតិចិន មានទំនាស់គ្នានៅខារ៉ាអូខេ។ ដោយជនសង្ស័យជាជនជាតិចិន ខឹងនឹងជនជាតិចិនម្នាក់ ដែលចាក់មកលើខ្លួន ប្រមាណ៧កាំបិត ហើយក្រោយមកជនសង្ស័យ បានទៅយកកាំភ្លើងដែលកម្មង់ទិញទុក ដើម្បីសងសឹក។ នៅមុនពេលកើតហេតុ សង្ស័យក៏មានការប្រទូសរាយគ្នា ហើយក៏បានយកកាំភ្លើងចេញពីក្នុងរថយន្ត មកបាញ់គូទំនាស់ តែមិនបង្កឲ្យមានរបួសស្នាមឡើយ ដោយបាញ់បុកដី ។
លោកវរសេនីយ៍ឯក សំ វិច្ឆិកា ក៏បានបញ្ជាក់ថា អ្នកបង្កទំនាស់ គឺទើបមកពីខេត្តព្រះសីហនុ និងម្នាក់ ដែលកាន់កាំភ្លើងខ្លី(ជ័រ) គឺទើបមកពីប្រទេសចិន ។
បន្ទាប់ពីបង្កហិ.ង្សា ជនសង្ស័យក៏បានជិះរថយន្តគេចខ្លួនភ្លាមៗ សមត្ថកិច្ចនគរបាលខណ្ឌពោធិ៍សែនជ័យ និងនគរបាលព្រហ្មទណ្ឌ នៃស្នងការនគបាលរាជធានីភ្នំពេញ ចុះទៅធ្វើការស្រាវជ្រាវ ហើយបានឃើញរថយន្តម៉ាក FAW BEFTUNE T90 ពណ៌ប្រផេះ ពាក់ផ្លាកលេខ ភ្នំពេញ 2CA-7210 របស់ជនសង្ស័យ ដែលធ្វើសកម្មភាពផ្ទុះអាវុធរួច បានជិះយកទៅផ្លុងចោល នៅដីវាលស្ថិតនៅភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ បន្ទាប់មកកម្លាំងសមត្ថកិច្ចបានធ្វើការឃាត់ខ្លួនជនសង្ស័យម្នាក់ជាជនជាតិចិន ដែលបានដើរមកយករថយន្តខាងលើ រួចក៏បានធ្វើការឆែកឆេរ ក្នុងរថយន្តឃើញមានអាវុធវែង (AK47) ចំនួន២ដើម ។ ភ្លាមៗកម្លាំងផែនការងារនគរបាលព្រហ្មទណ្ឌ នៃស្នងការដ្ឋានគរបាលរាជធានីភ្នំពេញ បានបន្តសហការជាមួយនគរបាលនាយកដ្ឋានព្រហ្មទណ្ឌក្រសួងមហាផ្ទៃ និងស្នងការដ្ឋាននគរបាលខេត្តបន្ទាយមានជ័យ ហើយបន្តស្រាវជ្រាវឃាត់បានជនសង្ស័យ ចំនួន៤នាក់ ក្នុងនោះជនជាតិចិន៣នាក់ និងជនជាតិខ្មែរ ជាអ្នកបើករថយន្តតាក់ស៊ីម្នាក់ នៅចំណុចផ្លូវជាតិលេខ៥ ភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ដោយដកហូតរថយន្តឡិចស៊ីស RX330 ពាក់ស្លាកលេខ ភ្នំពេញ 2AH-2304 មួយគ្រឿង តែក្រោយមកអ្នករថយន្តបើកបររថយន្តតាក់ស៊ី ត្រូវបានអប់រំ ហើយត្រឡប់ទៅវិញ។ ក្រោយមក បន្តស្រាវជ្រាវឃាត់ខ្លួនបានជនសង្ស័យម្នាក់ទៀតព្រមទាំងដកហូតបានកាំភ្លើងខ្លី(ជ័រ)មួយដើម ។
នៅក្នុងប្រតិបត្តិការនេះដែរ សមត្ថកិច្ចដកហូតវត្ថុតាង ៖
-គ្រាប់កាំភ្លើងប្រភេទ អាកា មិនទាន់ផ្ទុះ ចំនួន ០១គ្រាប់
-ការ៉ុង ពណ៌ស ចំនួន ០១
-អាវុធខ្លីគ្មានម៉ាក(ក្លែងក្លាយ) ពណ៌ខ្មៅ ចំនួន ០១ដើម និងគ្រាប់ចំនួន ០៣ គ្រាប់ (ជ័រ)
-អាវុធវែង ម៉ាក AK47 ចំនួន ០២ ដើម (លេខ AR៧៧២ និងលេខ១៩៧៤)
-គ្រាប់អាវុធវែង និងខ្លី សរុបចំនួន ៥៩គ្រាប់
-ខោជើងខ្លី មានស្នាមប្រឡាក់ឈាម ចំនួន ០១
-រថយន្តម៉ាក FAW BESTUNE ពណ៌ប្រផេះ ពាក់ផ្លាកលេខ ភ្នំពេញ 2A7210 ចំនួន ០១ គ្រឿង
-រថយន្តម៉ាក TOYOTA LEXUS RX៣៣០ ពណ៌ ទឹកមាស ពាក់ផ្លាកលេខ ភ្នំពេញ 2AH-2304 ចំនួន ០១គ្រឿង ។
លោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានអោយដឹងទៀតថា នៅក្នុងរយៈពេលមួយឆ្នាំកន្លងមក នគរបាលរាជធានីភ្នំពេញ បង្ក្រាបបានបទល្មើសចំនួន៤៤៩ ករណី ស្មើនឹង ៩២.៨១ភាគរយ ឃាត់ខ្លួនជនសង្ស័យចំនួន ៦៥៨ នាក់។ នៅក្នុងនោះបទឧក្រិដ្ឋ បង្ក្រាបបាន ៦៨ករណី ឃាត់ខ្លួនជនសង្ស័យចំនួន ១៤០នាក់។ នេះបញ្ជាក់ពីការខិតខំប្រឹងប្រែងរបស់ស្នងការនគរបាលរាជធានីភ្នំពេញ ក្រោមការដឹកនាំ និងបញ្ជាផ្ទាល់ពីឧត្តមសេនីយ៍ឯក ជួន ណារិន្ទ អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ ៕
ចែករំលែកព័តមាននេះ