ខេត្តបាត់ដំបង ៖ វិស័យធានារ៉ាប់រង គឺជាវិស័យហិរញ្ញវត្ថុមិនមែនធានាគារ ដែលបាននិងកំពុងដើរតួនាទីជាសមាសភាពមួយដ៏សំខាន់ ក្នុងការទ្រទ្រង់វិស័យសន្តិសុខសង្គម និងសេដ្ឋកិច្ចជាតិ នេះជាប្រសាសន៏លោក ប៊ូ ច័ន្ទភីរូ…
ខេត្តបាត់ដំបង ៖ វិស័យធានារ៉ាប់រង គឺជាវិស័យហិរញ្ញវត្ថុមិនមែនធានាគារ ដែលបាននិងកំពុងដើរតួនាទីជាសមាសភាពមួយដ៏សំខាន់ ក្នុងការទ្រទ្រង់វិស័យសន្តិសុខសង្គម និងសេដ្ឋកិច្ចជាតិ នេះជាប្រសាសន៏លោក ប៊ូ ច័ន្ទភីរូ អគ្គនាយក នៃនិយ័តករធានារ៉ាប់រងកម្ពុជា ដែលបានថ្លែងក្នុងសិក្ខាសាលាផ្សព្វផ្សាយអំពី «ផលិតផលធានារ៉ាប់រងទូទៅ» កាលពីរសៀលថ្ងៃទី១៨ ខែកុម្ភៈ នៅសណ្ធាគារ «ស្ទឹងសង្កែ» ក្រុងបាត់ដំបង ដែលមានលោក ពិន ប្រាកដ អភិបាលរងខេត្ត ជាគណៈអធិបតិ និងសិស្សនិស្សិតប្រមាណ២០០នាក់បានចូលរួមផង ។
នៅក្នុងសន្ទរកថា លោក ប៊ូ ច័ន្ទភីរូ បានថ្លែងថា សិក្ខាសាលានេះ ត្រូវបានរៀបចំឡើងក្នុងគោលបំណងលើកកម្ពស់ការយល់ដឹងរបស់ប្រជាពលរដ្ឋអំពី«ផលិតផលធានារ៉ាប់រងទូទៅ» ជាពិសេស អត្ថប្រយោជន៏ផលិតផលធានារ៉ាប់រងផ្ទាល់ ។
លោកអគ្គនាយក បានលើកឡើងថា ជាមួយនឹងស្ថេរភាពនយោបាយ ព្រមទាំងកំណើនសេដ្ឋកិច្ច ដែលកម្ពុជារក្សាបានក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់ និងភាពដឹកនាំដ៏ឈ្លាសវៃរបស់ថ្នាក់ដឹកនាំ នៃរាជរដ្ឋាភិបាលកម្ពុជា បានធ្វើឲ្យទីផ្សារធានារ៉ាប់រងកម្ពុជា រីកចម្រើនយ៉ាងឆាប់រហ័សស្របតាម «យុទ្ធសាស្ត្រចតុកោណដំណាក់កាលទី៤» និង «យុទ្ធសាស្ត្របញ្ចកោណ» របស់រាជរដ្ឋាភិបាល ។
បើតាមការកត់សម្គាល់អំពី«ទីផ្សារធានារ៉ាប់រងកម្ពុជា» លោក ប៊ូ ច័ន្ទភីរូ បានមើលឃើញថា ទីផ្សារធានារ៉ាប់រងកម្ពុជា បាននិងកំពុងរីកចម្រើនយ៉ាងឆាប់រហ័ស ជាមួយនឹងកំណើនជាមធ្យមប្រចាំឆ្នាំប្រមាណ២០% ។
លោកថា បច្ចុប្បន្នទំហំទីផ្សារធានារ៉ាប់រង កើនឡើងដល់ប្រមាណ៣៧០លានដុល្លាអាមេរិក ក្នុងឆ្នាំ២០២៤។ ទំហំទីផ្សារនេះបានរួមភាគទានក្នុងសេដ្ឋកិច្ចកម្ពុជា តែប្រមាណ១,១៧% ហើយដង់ស៊ីតេធានារ៉ាប់រងមានតែ២២ដុល្លារសម្រាប់មនុស្សម្នាក់ ដែលអត្រាទាំងនេះនៅមានកម្រិតទាប បើធៀបនឹងតំបន់ និងសកលលោក ។
ត្រង់ចំណុចនេះ លោកអគ្គនាយកបានចាត់ទុកថា ការអភិវឌ្ឍទីផ្សារធានារ៉ាប់រងកម្ពុជា នៅមានបញ្ហារប្រឈមមួយចំនួន។ បញ្ហាប្រឈមដ៏ធំគឺ«កង្វះការយល់ដឹងរបស់សាធារណជន អំពីអត្ថប្រយោជន៏ នៃការធានារ៉ាប់រងចំពោះបុគ្គលម្នាក់ៗ គ្រួសារនីមួយៗ និងសង្គមជាតិទាំងមូល ។
និយ័តករធានារ៉ាងរងកម្ពុជា បានកំណត់យកការងារជម្រុញការលើកកម្ពស់ ការយល់ដឹងរបស់សាធារណជន អំពីអត្ថប្រយោជន៏ នៃការធានារ៉ាប់រង ក៏ដូចជាការធានារ៉ាប់រងទូទៅតាមរយៈសិក្ខាសាលា និងតាមគ្រប់មធ្យោបាយផ្សព្វផ្សាយ ជាការងារអទិភាព។ នេះជាដំណោះស្រាយ និងការឆ្លើយតបជាវិជ្ជមាន របស់លោកអគ្គនាយក ទៅនឹងបញ្ហាប្រឈមនានាខាងលើនេះ ។
នៅចំពោះមុខគណៈអធិបតិ បុគ្គលិក និងសិស្សនិស្សិតរាប់រយនាក់ លោក ប៊ូ ច័ន្ទភីរូ បានបញ្ជាក់ថា «ផលិតផលធានារ៉ាប់រងកម្ពុជា» ដែលបានរៀបចំសិក្ខាសាលាពេលនេះ ដើម្បីចែករំលែកចំណេះដឹង ក៏ដូចជាបញ្ជ្រាបការយល់ដឹងពីអត្ថប្រយោជន៏របស់ផលិតផលធានារ៉ាប់រងទូទៅ និងដើម្បីបង្កើនទំនុកចិត្តដល់អតិថិជនធានារ៉ាប់រង ព្រមទាំងប្រជាពលរដ្ឋ ដែលមានបំណងជាវផលិតផលធានារ៉ាប់រងផងដែរ ។
ដូច្នេះលោករំពឹងថា សិក្ខាកាមទាំងអស់ ដែលបានចូលរួមក្នុងសិក្ខាសាលានេះ នឹងទទូលបាន នូវចំណេះដឹងកាន់តែច្បាស់អំពីសេវាធានារ៉ាប់រង ជាពិសេស ការធានារ៉ាប់រងទូទៅ ។
សូមបញ្ជាក់ថា នៅក្នុងសិក្ខាសាលាផ្សព្វផ្សាយអំពី «ផលិតផលធានារ៉ាប់រងទូទៅ»នេះ ក៏មានមន្ត្រីជំនាញៗ ដែលមានបទពិសោធន៏ក្នុងការងារនេះ ធ្វើបទបង្ហាញ ក៏ដូចជាការពន្យល់យ៉ាងលម្អិត អំពីដំណើរការទូទៅ នៃការធានារ៉ាប់រងនេះផងដែរ ៕
ចែករំលែកព័តមាននេះ