ទីក្រុងរីយ៉ាត៖ កាលពីយប់មិញ គណៈប្រតិភូដឹកនាំដោយរដ្ឋមន្ត្រីការបរទេសរុស្ស៊ីបានធ្វើដំណើរទៅដល់ទីក្រុងរីយ៉ាត ប្រទេសអារ៉ាប៊ីសាអូឌីតហើយ ហើយអមដំណើរដោយទីប្រឹក្សារបស់លោកពូទីនទទួលបន្ទុកខាងកិច្ចការបរទេសលោកយូរី អ៊ូសាកូស (Yuri Ushakov)។ ភាគីអាមេរិកដឹកនាំដោយរដ្ឋមន្ត្រីការបរទេសរូប៊ីយ៉ូក៏បានទៅដល់អារ៉ាប៊ីសាអូឌីតរួចហើយដែរ។
គណៈប្រតិភូទាំង២ក្រុមនឹងជជែកគ្នាអំពីបញ្ហាសំខាន់ៗដូចជា៖ ការកែសម្រួលទំនាក់ទំនងអាមេរិក-រុស្ស៊ីដែលធ្លាក់ចុះខ្លាំងកាលពីជំនាន់លោកបៃដិនដោយសារសង្គ្រាមអ៊ុយក្រែន និងការដាក់ទណ្ឌកម្មសេដ្ឋកិច្ច, ការរៀបចំគម្រោងចរចាគ្នាដើម្បីដោះស្រាយបញ្ហាអ៊ុយក្រែន និងការរៀបចំគម្រោងជួបគ្នាកម្រិតកំពូលរវាងលោកត្រាំ និងលោកពូទីននាពេលអនាគត។
លោកអ៊ូសាកូសថ្លែងប្រាប់ទីភ្នាក់ងារព័ត៌មានរុស្ស៊ីថាគណៈប្រតិភូរបស់លោកមកអារ៉ាប៊ីសាអូឌីតលើកនេះដើម្បីជជែកគ្នាប្រកបដោយជំហានហ្មត់ចត់។ រដ្ឋមន្ត្រីរុស្ស៊ី លោកឡាវរ៉ូស (Sergei Lavrov) នឹងជជែកគ្នាជាមួយភាគីអាមេរិកដែលមានលោករូប៊ីយ៉ូ និងអ្នកដទៃទៀត។ របៀបវារៈសំខាន់គឺការបញ្ចប់សង្គ្រាមអ៊ុយក្រែន និងការស្ដារទំនាក់ទំនងឡើងវិញរវាងអាមេរិក និងរុស្ស៊ី។
លោករូប៊ីយ៉ូបានធ្វើដំណើរទៅដល់ទីក្រុងរីយ៉ាតមុនគេមុនឯងតាំងពីថ្ងៃចន្ទ។ ចំណែកទីប្រឹក្សាសន្តិសុខជាតិអាមេរិក និងប្រេសិតពិសេសទទួលបន្ទុកខាងកិច្ចការមជ្ឈិមបូព៌ាក៏បានទៅដល់រួចហើយដែរ។ អ្នកនាំពាក្យវិមានក្រឹមឡាំងថ្លែងថាលោកឡាវរ៉ូស និងលោកអ៊ូសាកូសនឹងជួបសមភាគីអាមេរិកនៅថ្ងៃអង្គារ ហើយនឹងកែសម្រួលទំនាក់ទំនងឱ្យបានល្អឡើងវិញ។
អាមេរិក និងរុស្ស៊ីចាប់ផ្ដើមពន្លឿនការចរចាគ្នាក្រោយការសន្ទនាគ្នាដ៏គួរឱ្យភ្ញាក់ផ្អើលតាមទូរស័ព្ទរវាងលោកត្រាំ និងលោកពូទីនកាលពីសប្ដាហ៍មុន។ លោកត្រាំអះអាងថាក្រោយការសន្ទនាគ្នាជាមួយលោកពូទីន និងលោកហ្សេឡិនស្គី លោកទាំង២សុទ្ធតែនិយាយដូចៗគ្នាថាពួកគេចង់បញ្ចប់សង្គ្រាមឱ្យបានឆាប់តាមដែលអាចធ្វើទៅបាន។ ចំពោះការចោទប្រកាន់ថាអាមេរិកលួចចរចាគ្នាស្ងាត់ៗជាមួយរុស្ស៊ីនោះ ខាងអាមេរិកចេញមកបកស្រាយហើយថាខ្លួនមិនមែនជាអ្នកអារកាត់នៅក្នុងរឿងនេះទេ។ ខ្លួននឹងដើរតួនាទីជាអន្តរការី ឬអ្នកកណ្ដាល។ ចំណែកតួអង្គសំខាន់គឺអ៊ុយក្រែន និងរុស្ស៊ីដែលត្រូវជជែកទល់មុខគ្នា។
រដ្ឋមន្ត្រីការបរទេសអាមេរិក លោករូប៊ីយ៉ូ ដែលបានសន្ទនាគ្នាតាមទូរស័ព្ទជាមួយលោកឡាវរ៉ូសកាលពីថ្ងៃសៅរ៍សប្ដាហ៍មុននោះ លោកថ្លែងថានេះជាកិច្ចជំនួបបឋមសម្រាប់ជាការស្ទាបស្ទង់ចិត្តថ្លើមគ្នា។ លោកថាអាមេរិកកំពុងមើលជំហររបស់រស្ស៊ីដើម្បីចង់ដឹងថាតើលោកពូទីនមានឆន្ទៈមោះមុតកម្រិតណានៅក្នុងការចរចាសន្តិភាព។ មិនទាន់បានអីផង ប្រមុខដឹកនាំអ៊ុយក្រែនប្រកាសពីប្រទេសអារ៉ាប់រួមថាលោកមិនទទួលស្គាល់គម្រោងជួបគ្នានេះឡើយ។
លោកថាលោកនឹងមិនទទួលយកជាដាច់ខាតនូវលទ្ធផលនៃកិច្ចជំនួបដែលគ្មានចំណែករបស់អ៊ុយក្រែនចូលរួម។ ទីប្រឹក្សាសន្តិសុខជាតិអាមេរិក លោកម៉ាយវ៉ាល់ (Mike Walt) ថ្លែងថាគ្មាននរណាមានសិទ្ធិចាប់បង្ខំឱ្យអ៊ុយក្រែនទទួលយកកិច្ចព្រមព្រៀងសន្តិភាពជំនួសឱ្យអ៊ុយក្រែនខ្លួនឯងទេ។ ចំពោះសំណួរថាតើទីក្រុងវ៉ាស៊ីនតោននឹងគាំទ្របេសកកម្មថែរក្សាសន្តិភាពរបស់កងទ័ពអឺរ៉ុបនៅអ៊ុយក្រែនដែរឬទេ? ទីប្រឹក្សារូបនេះយល់ថាបញ្ហានេះចាំនិយាយគ្នានៅពេលក្រោយទៀត៕
ចែករំលែកព័តមាននេះ