ទីក្រុងប៉េកាំង៖ ប្រទេសចិនថ្កោលទោសជាទម្ងន់ចំពោះករណីដែលនាវាចម្បាំងកាណាដាបើកកាត់ច្រកសមុទ្រតៃវ៉ាន់។ យោធាចិនថ្លែងថាខ្លួនបានចេញសេចក្ដីព្រមានតាមរយៈការឱ្យសញ្ញាពីទ័ពអាកាស និងទ័ពជើងទឹកដើម្បីឱ្យនាវានោះចាកចេញជាបន្ទាន់។ ហេតុការណ៍នេះកើតឡើងតែប៉ុន្មានថ្ងៃប៉ុណ្ណោះបន្ទាប់ពីនាវាចម្បាំងរបស់អាមេរិកក៏បើកបរកាត់ទីនោះផងដែរ។
ជានិច្ចកាល នាវាចម្បាំងរបស់កងទ័ពជើងទឹកអាមេរិករួមទាំងនាវារបស់ក្រុមសម្ព័ន្ធមិត្តអាមេរិកដូចជាកាណាដា, អង់គ្លេស និងបារាំងជាដើមឧស្សាហ៍លួចឆ្មក់បើកបរឆ្លងកាត់តាមច្រកសមុទ្រតៃវ៉ាន់ដែលប្រទេសចិនចាត់ទុកជាតំបន់របស់ខ្លួន។ ពួកគេបើកបរកាត់ទីនេះយ៉ាងហោចណាស់ឱ្យបានម្ដងក្នុងមួយខែជាលក្ខណៈស្ទង់ចិត្ត និងធ្វើតេស្តការអត់ធ្មត់របស់ចិន។
ទង្វើរបស់កាណាដានមានចេតនាក្រឡុកស្ថានការណ៍នៅច្រកសមុទ្រតៃវ៉ាន់ឱ្យវ៉ល់ និងធ្វើឱ្យប៉ះពាល់សន្តិភាព និងស្ថិរភាពនៅច្រកសមុទ្រនេះ។ ខាងលើនេះជាអ្វីដែលបញ្ជាការដ្ឋានកងទ័ពរំដោះប្រជាជនចិនប្រកាសនៅក្នុងសេចក្ដីថ្លែងការណ៍។ ចិនថាកងទ័ពខ្លួនត្រៀមលក្ខណៈកម្រិតខ្ពស់គ្រប់ពេលដើម្បីទប់ទល់នឹងការគំរាមកំហែង និងការបង្កហេតុតាមគ្រប់រូបភាព។
កាណាដាមិនទាន់ធ្វើអត្ថាធិប្បាយទៅលើរឿងនេះទេ។ ប៉ុន្តែប្រភពពីយោធាចិន និងតៃវ៉ាន់អះអាងថានាវាចម្បាំងកាណាដាឈ្មោះអូតាវ៉ា (Ottawa)។ តៃវ៉ាន់ថានាវានោះបានបើកទៅភាគខាងជើង។ យោធាតៃវ៉ាន់គ្មានមតិយោបល់លើរឿងនេះទេ គ្រាន់តែបន្តការសង្កេតតាមដានតែប៉ុណ្ណោះ។ ប៉ុន្តែក្រសួងការបរទេសតៃវ៉ាន់ប្រកាសស្វាគមន៍ដំណើរមកដល់នៃនាវានេះ។
ក្រសួងយល់ថាកាណាដាជាថ្មីម្ដងទៀតបានចាត់វិធានការដ៏ហ្មត់ចត់មួយដើម្បីធានាថាច្រកសមុទ្រតៃវ៉ាន់ត្រូវតែធ្វើដំណើរឆ្លងកាត់ដោយសេរី, ដោយសន្តិភាព និងដោយបើកទូលាយ។ ក្រសួងយល់ថាកាណាដាធ្វើបែបនេះដើម្បីបង្ហាញថាខ្លួនប្រកាន់ជំហរដាច់ណាត់ថាច្រកសមុទ្រតៃវ៉ាន់មិនមែនជាកម្មសិទ្ធិរបស់ប្រទេសណាផ្ដាច់មុខទេ ប៉ុន្តែជាច្រកសមុទ្រអន្តរជាតិ។
កាលពីពេលកន្លងមក តៃវ៉ាន់ក៏ឧស្សាហ៍ប្រកាសជំទាស់នឹងសកម្មភាពរបស់យោធាចិនទាំងជើងទឹក និងជើងអាកាសនៅក្បែរដែនកោះរបស់ខ្លួន។ កាលពីព្រឹកថ្ងៃចន្ទ ក្រសួងការពារជាតិតៃវ៉ាន់ថ្លែងថារយៈពេល២៤ម៉ោងចុងក្រោយនេះ ចិនបញ្ជូនយន្តហោះចម្បាំង៤១គ្រឿង និងនាវាចម្បាំង៩គ្រឿងដើម្បីហោះហើរ និងបើកបរទៅកៀកនឹងច្រកសមុទ្រតៃវ៉ាន់ និងភាគនិរតីកោះតៃវ៉ាន់។
ជានិច្ចយោធាចិនតែងធ្វើសមយុទ្ធយោធាដើម្បីបញ្ចេញប្រតិកម្មតបទៅនឹងទង្វើរបស់ប្រទេសលោកខាងលិចជាពិសេស ដែលបញ្ជូននាវាបើកបរកាត់ច្រកសមុទ្រតៃវ៉ាន់។ ដូច្នេះ គេមិនទាន់ដឹងថាតើលើកនេះ ប្រទេសចិននឹងចាត់វិធានការអ្វីជាបន្តទៀតដើម្បីបញ្ចេញប្រតិកម្មតបទៅនឹងព្រឹត្តិការណ៍វិវត្តថ្មីបំផុតនេះ៕
ចែករំលែកព័តមាននេះ