ទីក្រុងរីយ៉ាត៖ អាមេរិក និងរុស្ស៊ីចាប់ផ្ដើមចាកចេញដំណើរទៅអារ៉ាប៊ីសាអូឌីតដើម្បីដោះស្រាយបញ្ហាអ៊ុយក្រែន និងដើម្បីរៀបចំគម្រោងជួបគ្នាកម្រិតកំពូលរវាងលោកត្រាំ និងលោកពូទីន។ លើកនេះច្បាស់ហើយថាអឺរ៉ុបគ្មានចំណែកនៅក្នុងការចរចាគ្នាទេ។ ហេតុនេះ អ៊ុយក្រែនកំពុងភ័យខ្លួនថាហេងស៊យខ្លួនក៏ត្រូវគេទុកនៅក្រោយវាំងនន ឬក្រៅសង្វៀនដូចអឺរ៉ុបដែរ។
ប៉ុន្តែលោកត្រាំថាអ៊ុយក្រែននឹងមានកៅអីអង្គុយដ៏សមគួរមួយនៅក្នុងការចរចា។ គ្រាន់តែថាលោកមិនបានបញ្ជាក់ថាអ៊ុយក្រែនអាចលូកមាត់នៅក្នុងការចរចា ឬគ្រាន់តែអង្គុយស្ដាប់មេធំៗចរចាគ្នា? លោកហ្សេឡិនស្គីត្អូញត្អែរថាលោកមិនត្រូវអាមេរិកហៅទៅចូលរួមកិច្ចជំនួបគ្នានៅអារ៉ាប៊ីសាអូឌីតទេ។ ដូច្នេះ លោកហ្សេឡិនស្គីសូមផ្ដាំទុកជាមុនថាលោកមិនទទួលយកជាដាច់ខាតនូវកិច្ចព្រមព្រៀងសន្តិភាពដែលសម្រេចគ្នាស្ងាត់ៗតែ២នាក់អាមេរិក និងរុស្ស៊ីដោយគ្មានសួរមតិរបស់អ៊ុយក្រែន។
រដ្ឋមន្ត្រីការបរទេសអាមេរិក លោកម៉ាកូ រូប៊ីយ៉ូ (Marco Rubio) រួមជាមួយទីប្រឹក្សាសន្តិសុខជាតិអាមេរិក លោកម៉ាយវ៉ាល់ (Mike Waltz) និងប្រេសិតពិសេសអាមេរិក លោកស្ទីវ វីតខូស (Steve Witkoff) ចាប់ផ្ដើមធ្វើដំណើរទៅអារ៉ាប៊ីសាអូឌីត។ គម្រោងជួបគ្នានេះធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីលោកត្រាំនិយាយទូរស័ព្ទជាមួយលោកពូទីន និងលោកហ្សេឡិនស្គី។
កាលពីយប់ថ្ងៃសៅរ៍ លោករូប៊ីយ៉ូបាននិយាយទូរស័ព្ទទៅសមភាគីរុស្ស៊ីដោយផ្ដោតសំខាន់ទៅលើបញ្ហាអ៊ុយក្រែន និងបញ្ហាដទៃទៀត។ នៅឯកិច្ចប្រជុំសន្តិសុខជាតិនៅអាល្លឺម៉ង់ លោកហ្សេឡិនស្គីព្រលយពាក្យថារាល់ការចរចាគ្នាពាក់ព័ន្ធនឹងអ៊ុយក្រែនគួរណាស់មានចំណែកអ៊ុយក្រែនចូលរួម។ លោកថាអ៊ុយក្រែនមិនទទួលយកទេនូវការសម្រេចចិត្តពីក្រោយខ្នងរបស់ពួកយើង។ បើដោះស្រាយបញ្ហាអ៊ុយក្រែនត្រូវតែមានអ៊ុយក្រែនចូលរួម បើដោះស្រាយបញ្ហាអឺរ៉ុបត្រូវតែមានអឺរ៉ុបចូលរួម។
ប្រេសិតពិសេសរបស់អាមេរិកទទួលបន្ទុកខាងការដោះស្រាយបញ្ហាអ៊ុយក្រែន លោកខេតខេឡក់ (Keith Kellogg) ថ្លែងថាអ៊ុយក្រែននឹងមានកៅអីអង្គុយនៅក្នុងការចរចាគ្នា។ លោកថាតាមពិតទៅ តួអង្គសំខាន់នៅក្នុងការចរចាគ្នាគឺរុស្ស៊ី និងអ៊ុយក្រែនហ្នឹងហើយ។ ចំណែកអាមេរិកគ្រាន់តែដើរតួនាទីជាអន្តរការី (អ្នកកណ្ដាល ឬអ្នកសម្របសម្រួល) តែប៉ុណ្ណោះ។ ដោយឡែក ចំពោះសំណួរថាតើអឺរ៉ុបនឹងមានចំណែកទេ? លោកខេឡក់សូមឆ្លើយភ្លាមៗថាអឺរ៉ុបគ្មានមុខនៅក្នុងការចរចាគ្នាទេ។
ឥឡូវនេះ គេសង្កេតឃើញថាលោកហ្សេឡិនស្គីហាក់ដូចជាចង់អូសទាញអឺរ៉ុបឱ្យចូលទៅក្នុងកញ្ចប់ចរចាគ្នាដែរដោយសម្អាងថាសន្តិសុខជាតិរបស់អ៊ុយក្រែនក៏ពាក់ព័ន្ធនឹងសន្តិសុខជាតិរបស់អឺរ៉ុបដែរ។ ប៉ុន្តែចំណុចស្លាប់រស់នៅត្រង់គោលជំហរមិនស្របគ្នារវាងអាមេរិក និងអឺរ៉ុប។ លោកត្រាំអាចនឹងគិតថាបើអូសអឺរ៉ុបចូលក្នុងការចរចាគ្នាមិនមែនប្រញាប់ឱ្យត្រូវគ្នាទេ ប៉ុន្តែជាលក្ខណៈយកជើងរាទឹកទៅវិញ។ លោកហ្សេឡិនស្គីក៏ហាក់ដូចជាអន្ទង់វែងឆ្នាំងវែងពេកហើយនៅក្នុងរឿងនេះ។
លោកហ្សេឡិនស្គីទទួលអារម្មណ៍ថាអាមេរិកហាក់ដូចជាបោះសន្ទូចរំលងភ្នំ ឬក៏ថាធ្វើអ្វីអន្តនោម័ត និងឆិនឆៃដើម្បីចរចាគ្នាឱ្យឆាប់ចប់។ លោកព្រលយពាក្យថាវាជារឿងដ៏គ្រោះថ្នាក់ដែលយើងចាប់ផ្ដើមភ្លាមអត់ទាន់ពិភាក្សាគ្នានៅក្នុងចំណោមសម្ព័ន្ធមិត្តទេ ប៉ុន្តែបែរជាចរចាគ្នាជាមួយសត្រូវរបស់យើងតែម្ដង។ លោកសូមបញ្ជាក់ជំហររបស់អ៊ុយក្រែនឡើងវិញថាយើងចាំបាច់ត្រូវតែប្រកាន់ជំហររួមគ្នា។ អ៊ុយក្រែន អាមេរិក និងអឺរ៉ុបត្រូវតែនៅជាមួយគ្នាមុននឹងនាំគ្នាទៅចរចាជាមួយលោកពូទីន។
មន្ត្រីរដ្ឋាភិបាលអាមេរិកទទួលស្គាល់ថាគេមិនបានអញ្ជើញអ៊ុយក្រែនឱ្យចូលរួមកិច្ចជំនួបរវាងអាមេរិក និងរុស្ស៊ីនៅអារ៉ាប៊ីសាអូឌីតពិតមែន។ ប៉ុន្តែមិនមែនមានន័យថាគេដាក់អ៊ុយក្រែនឱ្យនៅក្រៅសង្វៀនទេ។ ជាបឋម អាមេរិកចង់ជជែកគ្នាទ្វេភាគីជាមួយរុស្ស៊ីសិន។ បន្ទាប់មកអាមេរិកជជែកគ្នាទ្វេភាគីជាមួយអ៊ុយក្រែនទៀត។ នៅទីបញ្ចប់ជជែកគ្នាត្រីភាគីរវាងអាមេរិក អ៊ុយក្រែន និងរុស្ស៊ី៕
ចែករំលែកព័តមាននេះ