ទីក្រុងប៊ែឡាំង៖ អធិការបតីអាល្លឺម៉ង់រិះគន់អនុប្រធានាធិបតីអាមេរិកដែលនិយាយវាយប្រហារទ្វីបអឺរ៉ុប។ លោកវេនរិះគន់អឺរ៉ុបចំពោះការចាត់វិធានការក្ដៅទៅលើអ្នកនិយាយភាសាដែលបង្កកំហឹង និងទៅលើក្រុមស្ដាំនិយមជ្រុល។ ដូច្នេះ លោកសូលសូមពន្លះទៅវិញថាអ្នកដទៃគ្មានសិទ្ធិស្ដីប្រដៅអាល្លឺម៉ង់ និងទ្វីបអឺរ៉ុបឱ្យធ្វើទៅតាមក្បាលចិត្តរបស់ពួកគេជាដាច់ខាត។
អនុប្រធានាធិបតីអាមេរិកកាលពីថ្ងៃសុក្របាននិយាយពន្លះ១០០ៗទៅលើពួកអឺរ៉ុបនៅពេលគាត់ទៅចូលរួមកិច្ចប្រជុំសន្តិសុខជាតិនៅទីក្រុងមុយនិច។ លោកចោទប្រកាន់ថាអឺរ៉ុបរឹតត្បិតសេរីភាពក្នុងការបញ្ចេញមតិ។ លោកវេនក៏បានរិះគន់អាល្លឺម៉ង់ដែលពួតដៃគ្នារវាងគណបក្សនយោបាយនានាដើម្បីទប់ស្កាត់មិនឱ្យគណបក្សស្ដាំនិយមអាចឈ្នះឆ្នោតឡើងកាន់អំណាច។
ជាកិច្ចឆ្លើយតប លោកសូលវាយបកវិញថាការនិយាយរបស់លោកវេនមិនសមរម្យទាល់តែសោះ។ ជាពិសេស រឹតតែមិនសមរម្យក្នុងនាមអាមេរិក និងអឺរ៉ុបជាមនុស្សនៅក្នុងសម្ព័ន្ធភាពតែមួយ។ លោកសូមច្រានចោលការលើកឡើងរបស់អនុប្រធានាធិបតីរូបនេះ។ លោកសូលថាលោកមានហេតុផលដែលមិនត្រូវរវីរវល់ជាមួយគណបក្សស្ដាំនិយមជ្រុលនៅអាល្លឺម៉ង់។
គណបក្សស្ដាំនិយមជ្រុលនៅអាល្លឺម៉ង់ដែលទទួលបានសំឡេងគាំទ្រប្រហែល២០%តាមការស្ទង់មតិមុនការបោះឆ្នោតនាថ្ងៃទី២៣ ខែកុម្ភៈខាងមុខនេះត្រូវគេចោទប្រកាន់លាបពណ៌យ៉ាងខ្លាំង។ គណបក្សនយោបាយសំខាន់ៗដទៃទៀតនៅអាល្លឺម៉ង់ក៏រងការរើសអើងដូចគ្នា។ នៅអាល្លឺម៉ង់ថ្វីដ្បិតសិទ្ធិបញ្ចេញមតិបើកយ៉ាងទូលំទូលាយ ប៉ុន្តែគេប្រយ័ត្នប្រយែងចំពោះការសាបព្រោះនយោបាយជាតិនិយមជ្រុលព្រោះប្រទេសនេះធ្លាប់មានរបួសស្នាមកាលពីអតីតកាលនៅពេលប្រទេសជាតិស្ថិតក្រោមការដឹកនាំរបស់គណបក្សណាហ្ស៊ី (អ៊ីទ្លែ)។
លោកសូលថ្លែងថាយើងមិនបណ្ដោយឱ្យវិលត្រឡប់មកវិញនូវរបបហ្វាស៊ីស, ការប្រកាន់ពូជសាសន៍ និងសង្គ្រាមឈ្លានពានជាដាច់ខាត។ ហេតុនេះ មតិភាគច្រើនលើសលប់នៅក្នុងប្រទេសរបស់យើងសូមប្រឆាំងជំទាស់ជាដាច់ខាតចំពោះអ្នកណាដែលលើកតម្លៃ ឬគិតថាជារឿងត្រឹមត្រូវនូវទង្វើឧក្រិដ្ឋរបស់គណបក្សជាតិសង្គមនិយម (របស់អ៊ីទ្លែ)។
លោកជេឌីវេនបានជួបសំណេះសំណាលជាមួយប្រធានគណបក្សស្ដាំនិយមជ្រុលអាល្លឺម៉ង់បន្ទាប់ពីលោកប្រកាសគាំទ្រគណបក្សនេះជាសម្ព័ន្ធភាពនយោបាយរបស់លោក។ នេះអាចជាការជួយឃោសនាឱ្យគណបក្សស្ដាំនិយមជ្រុលក៏ថាបាន។ ហេតុនេះ លោកសូលរិះគន់ខ្លាំងៗ និងចាត់ទុកថានេះជាការជ្រៀតជ្រែកនៅក្នុងនយោបាយ និងការបោះឆ្នោតនៅអាល្លឺម៉ង់។
គ្រាន់តែចាប់ផ្ដើមបើកឆាកភ្លាម រដ្ឋាភិបាលរបស់លោកត្រាំហាក់ដូចជាមានភាពរកាំរកូសជាមួយពួកអឺរ៉ុបជាបណ្ដើរៗ។ នៅក្នុងបញ្ហាអ៊ុយក្រែនក៏ដូចគ្នា។ បន្ទាប់ពីលោកត្រាំនិយាយទូរស័ព្ទស្ងាត់ៗជាមួយលោកពូទីន ពួកអឺរ៉ុបចាប់ផ្ដើមអាក់អន់ចិត្ត។ ឥឡូវនេះទៀត ប្រេសិតពិសេសរបស់អាមេរិកទទួលបន្ទុកខាងកិច្ចការអ៊ុយក្រែនបញ្ជាក់ច្បាស់ហើយថាការចរចាសន្តិភាពនោះគ្មានចំណែករបស់អឺរ៉ុបឡើយ។ នៅក្នុងកិច្ចប្រជុំនៅទីក្រុងមុយនិច លោកជេឌីវេនមិនបាននិយាយចំៗអំពីអ៊ុយក្រែនទេ។
លោកយល់ថាអ្វីដែលជាការគំរាមកំហែងចំពោះទ្វីបអឺរ៉ុបមិនមែនចិន ឬរុស្ស៊ីទេ។ ប៉ុន្តែគឺការដើរថយក្រោយនៃគោលការណ៍ជាមូលដ្ឋានគ្រឹះរបស់អឺរ៉ុបដែលមានជាអាទិ៍សេរីភាពខាងការបញ្ចេញមតិ និងការចាត់វិធានការលើជនអន្តោប្រវេសន៍ដែលហូរចូលដូចទឹកបាក់ទំនប់ដល់ដំណាក់កាលគ្រប់គ្រងលែងបាននៅអឺរ៉ុប។ នៅពេលលោកវេនឡើងថ្លែងសុន្ទរកថានោះ ក្រុមអ្នកការទូតអង្គុយស្ដាប់ចំហមាត់ដោយស្ងៀមស្ងាត់។ គ្មាននរណាហ៊ាននិយាយស្ដីអ្វីទេ ហើយក៏គ្មាននរណាទះដៃគាំទ្រដែរ៕
ចែករំលែកព័តមាននេះ