រាជធានីភ្នំពេញ ៖ យោងតាមព័ត៌មានបឋម បានឲ្យដឹងថា មានជនជាតិចិន មិនស្គាល់អត្តសញ្ញាណ ចំនួន២ក្រុម មានទំនាស់គ្នា ចំនួន៣លើកក្នុងពេលផឹកស៊ីច្រៀងខារ៉ាអូខេ នៅក្នុងហាងមួយកន្លែង…
រាជធានីភ្នំពេញ ៖ យោងតាមព័ត៌មានបឋម បានឲ្យដឹងថា មានជនជាតិចិន មិនស្គាល់អត្តសញ្ញាណ ចំនួន២ក្រុម មានទំនាស់គ្នា ចំនួន៣លើកក្នុងពេលផឹកស៊ីច្រៀងខារ៉ាអូខេ នៅក្នុងហាងមួយកន្លែង ដោយលើកទី១ និងលើកទី២ បានដេញវាយកា.ប់ចា.ក់គ្នា ប៉ុន្តែពុំបណ្ដាលឲ្យមានអ្នករងរបួសនោះទេ ហើយក៏ស្ងប់ស្ងាត់បន្តិចទៅវិញ លុះលើកទី៣ ស្រាប់តែភាគីម្ខាងទៀត មានគ្នា៣នាក់ បានរត់ទៅយកអាវុធវែង០២ដើម និងអាវុធខ្លី០១ដើម ចេញពីក្នុងរថយន្ត ដែលចតនៅមុខអគារនោះទៅដេញបាញ់គូទំនាស់ ប៉ុន្តែបាញ់អត់បាន ក៏បាញ់មេឃ១គ្រាប់ រួចជិះរថយន្តគេចខ្លួនបាត់អស់តែម្ដង ។
ហេតុការនោះបានកើតឡើងបង្កឲ្យមានការភ្ញាក់ផ្អើលពីវេលាម៉ោង១២ថ្ងៃត្រង់ ថ្ងៃទី១៤ ខែកុម្ភៈ ឆ្នាំ២០២៥ នៅក្នុងហាងខារ៉ាអូខេមួយកន្លែង នៅក្នុងអគារ «មជ្ឈមណ្ឌលរតនៈសម្បត្តិ» ដែលមានទីតាំងនៅក្នុងភូមិតាងួន២ សង្កាត់កាបទី១ ខណ្ឌពោធិ៍សែនជ័យ រាជធានីភ្នំពេញ ។
ប្រភពដដែល បានប្រាប់ឲ្យដឹងបន្តទៀតថា នៅវេលាព្រឹកថ្ងៃកើតហេតុ មានជនជាតិចិន២ក្រុម បានចូលទៅផឹកស៊ីច្រៀងខារ៉ាអូខេនៅក្នុងមជ្ឈមណ្ឌលរតនៈសម្បត្តិ នោះ ក្រោយមក ពុំដឹងថា ពួកគេមានរឿងអ្វីនោះទេ ស្រាប់តែបានមានទំនាស់គ្នា(ចិននិងចិន) រហូតឈានដល់ការដេញវាយកា.ប់ចា.ក់គ្នាម្ដងហើយម្ដងទៀត ចំនួន២ដង ទាំងព្រឹក ប៉ុន្តែមិនបានបណ្ដាលឲ្យមានអ្នករងរបួសនោះទេ។ ក្រោយពីការស្ងប់ស្ងាត់បន្តិច នៅវេលាម៉ោង១២ថ្ងៃត្រង់ថ្ងៃដដែល ស្រាប់តែមានទំនាស់គ្នា ជាលើកទី៣បន្តទៀត ទើបភាគីម្ខាងទៀត មានគ្នា៣នាក់ បានរត់ទៅយកអាវុធវែង ០២ដើម និងអាវុធខ្លី ០១ដើមចេញពីក្នុងរថយន្ត ដែលចតនៅមុខអគារនោះទៅដេញបាញ់គូទំនាស់ ប៉ុន្តែខណៈនោះ គូទំនាស់ដឹងខ្លួនទាន់ ក៏បាននាំគ្នារត់ចេញគេចខ្លួនអស់ ទើបក្រុមខ្មាន់កាំភ្លើង ទាំង៣នាក់នោះ បាញ់មេឃ១គ្រាប់ បញ្ចេញកំហឹង បន្ទាប់មក បានរើសសំបកគ្រាប់កាំភ្លើង (សំបកកាទូស្ស) ដាក់ចូលក្នុងរថយន្តជិះគេចខ្លួន បាត់ស្រមោល ។
ក្រោយពេលកើតហេតុ កម្លាំងសមត្ថកិច្ចខណ្ឌពោធិ៍សែនជ័យ បានចុះទៅធ្វើការស្រាវជ្រាវ ហើយបានរកឃើញរថយន្តចំនួន២គ្រឿង ដែលត្រូវជនជាតិចិន ប្លុងចោល នៅម្ដុំជិតកន្លែងកើតហេតុខាងលើ ព្រមទាំងបានធ្វើការឃាត់ខ្លួនបុរសជាជនសង្ស័យ ដែលជាជនជាតិចិន២នាក់ នាំទៅសាកសួរ នៅអធិការដ្ឋាននគរបាលខណ្ឌពោធិ៍សែនជ័យ ផងដែរ ។
សមត្ថកិច្ចរកឃើញអាវុធ AK47 ចំនួន២ដើម នៅក្នុងរថយន្តផងដែរ ពេលនេះនាំយកទៅកាន់ស្នងការដ្ឋាននគរបាលរាជធានីភ្នំពេញ ៕
ចែករំលែកព័តមាននេះ