រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី១៣ ខែកុម្ភៈ ឆ្នាំ២០២៥ នេះបានធ្វើសន្និសីទកាសែតបង្ហាញជនសង្ស័យជាឃាតកច្របាច់ករសម្លាប់កម្មការិនីកាត់ដេរ ជាគូដណ្ដឹងនិងក្រុមក្មេងទំនើងលួចឆក់ប្លន់ចំនួនសរុបចំនួន២៨នាក់ ។ លោកវរសេនីយ៍ឯក…
រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី១៣ ខែកុម្ភៈ ឆ្នាំ២០២៥ នេះបានធ្វើសន្និសីទកាសែតបង្ហាញជនសង្ស័យជាឃាតកច្របាច់ករសម្លាប់កម្មការិនីកាត់ដេរ ជាគូដណ្ដឹងនិងក្រុមក្មេងទំនើងលួចឆក់ប្លន់ចំនួនសរុបចំនួន២៨នាក់ ។
លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានអោយដឹងថា ដោយអនុវត្តតាមបទបញ្ជាពីឯកឧត្តមស ថេត អគ្គស្នងការនគរបាលជាតិ និងតាមការណែនាំរបស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងមានបទបញ្ជាពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កម្លាំងជំនាញការិយាល័យព្រហ្មទណ្ឌកំរិតស្រាល និងការិយាល័យព្រហ្មទណ្ឌកំរិតធ្ងន់ សហការជាមួយនគរបាលនៃអធិការដ្ឋាននានា ធ្វើការស្រាវជ្រាវបង្ក្រាបបានករណីឃាតកម្មក្រុមក្មេងទំនើងលួចឆក់ប្លន់ជាបន្តបន្ទាប់ដោយឃាត់ជនសង្ស័យបានចំនួន២៨នាក់ ដែលយកមកធ្វើសន្និសីទកាសែតបង្ហាញមុខជាសាធារណៈនៅថ្ងៃនេះ។
លោកវរសេនីយ៍ឯក សំ វិច្ឆិកា បានឲ្យដឹងទៀតថា ចាប់តាំងពីថ្ងៃទី១០ ខែកុម្ភៈ រហូតថ្ងៃទី១៣ កុម្ភៈ ឆ្នាំ ២០២៥ នគរបាលព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញ និងនគរបាលខណ្ឌកំបូល,នគរបាលខណ្ឌឬស្សីកែវ,ខណ្ឌពោធិ៍សែនជ័យ,ខណ្ឌច្បារអំពៅ,ខណ្ឌដូនពេញ និងខណ្ឌដង្កោ បានបង្ក្រាបបានជនសង្ស័យជាបន្តបន្ទាប់ចំនួន៩ករណីដោយឃាត់ខ្លួនចំនួន២៨
នាក់ ។
នៅក្នុងនោះ ករណីឃាតកម្ម១ករណីឃាត់បាន១នាក់, ករណីវាយប្លន់ម៉ូតូ២ករណីឃាត់ខ្លួន១៤នាក់ ជាក្មេងទំនើង, ករណីលួច៤ករណីឃាត់ខ្លួន៥នាក់, ករណីឆក់២ករណីឃាត់ខ្លួនបាន៤នាក់ និងកាន់កាប់អាវុធគ្មានការអនុញ្ញត១ករណីឃាត់ខ្លួនបានចំនួន៤នាក់ជាក្មេងទំនើង។
លោកវរសេនីយ៍ឯក សំ វិច្ឆិកា បានឲ្យដឹងទៀតថា ករណីឃាតកម្មគិតទុកជាមុន ត្រូវបានកម្លាំងនគរបាលព្រហ្មទណ្ឌកំរិតស្រាល ដឹកនាំលោកឧត្តមសេនីយ៍ត្រី ប៊ុន សត្យាស្នងការរងនគបាលរាជធានីភ្នំពេញទទួលផែននគរបាលព្រហ្មទណ្ឌបានសហការជាមួយនគរបាលខណ្ឌពោធិ៍សែនជ័យ និងសហការជាមួយនគរបាលខេត្តព្រះសីហនុ បង្ក្រាបបានឃាត់ខ្លួនបានបន្ទាប់ពីរៀបចំគំរោងគិតទុកជាមុនសម្លាប់អតីតគូដណ្ដឹងអស់ពេលប្រមាណជិតមួយខែ។
ឃាតករូបនោះមានចិត្តសាហាវបានរៀបចំគម្រោងទុកជាមុន ដោយទំនាក់ទំនងលួងលោមគូដណ្ដឹងដែលបែកបាក់គ្នានិងលួចខ្សែកខ្សែដៃជនរងគ្រោះតែត្រូវបានជនរងគ្រោះដឹងខ្លួនទាន់ និងបានរៀបចំគម្រោងទិញថ្នាំបំពុលជនជនរងគ្រោះតែពុំបានសម្រេចដោយជនរងគ្រោះដឹងខ្លួនទាន់។ លុះក្រោយមក ក៏បានច្របាច់ក៏សម្លាប់អតីតគូដណ្ដឹងប្លន់យកគ្រឿងអលង្ការ រួចគេចខ្លួនទៅខេត្តកំពង់សោម តែគេចមិនផុតពីសំណាញ់ច្បាប់។
គួរបញ្ជាក់ថា ឃាតកម្មនេះបង្កឲ្យភ្ញាក់ផ្អើល កាលពីម៉ោង១ និង៣០នាទីរសៀលថ្ងៃទី២០ ខែមករា ឆ្នាំ២០២៥ នៅចំណុចបន្ទប់លេខ៦៦ ជាន់ទី៣ ផ្ទះជួលស្ថិតនៅក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ ក៏បានសំណូមពរដល់បងប្អូនសាធារណជននៅក្នុងបណ្ដាញសង្គម សូមកុំបង្ហោះព័ត៌មានណាពុំពិត ដែលធ្វើឲ្យប៉ះពាល់ដល់សមត្ថកិច្ចដូចជានៅករណីនៅក្នុងខណ្ឌសែនសុខ ម្ចាស់បានយកម៉ូតូទៅលក់ហើយប្រាប់បងប្អូនថា ត្រូវចោរប្លន់ហើយត្រូវបានគេបង្ហោះនៅក្នុងបណ្ដាញ។
លោកក៏បានបញ្ជាក់ឲ្យដឹងទៀតថា កន្លងមក ឲ្យតែមានបទល្មើសកើតឡើងឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ មិនទុកចោលនោះទេដោយដាក់បទបញ្ជាទៅកម្លាំងនគរបាលជំនាញដូចជានគរបាលនៅតាមមូលដ្ឋានចុះធ្វើការស្រាវជ្រាវហើយឈានទៅបង្ក្រាបបទល្មើសបានជាបន្តបន្ទាប់៕
ចែករំលែកព័តមាននេះ