រាជធានីភ្នំពេញ ៖ អគាររោងចក្រកាត់ដេរសម្លៀកបំពាក់ ហ្វ័រម៉ាត (ខេមបូឌា) ខូ អិលធីឌី មានទីតាំងស្ថិតនៅតាមផ្លូវ៥០ម៉ែត្រ ភូមិអន្លូងគង សង្កាត់ព្រៃស…
រាជធានីភ្នំពេញ ៖ អគាររោងចក្រកាត់ដេរសម្លៀកបំពាក់ ហ្វ័រម៉ាត (ខេមបូឌា) ខូ អិលធីឌី មានទីតាំងស្ថិតនៅតាមផ្លូវ៥០ម៉ែត្រ ភូមិអន្លូងគង សង្កាត់ព្រៃស ខណ្ឌដង្កោ រាជធានីភ្នំពេញ រួមទាំងម៉ាស៊ីនសង្វាក់ផលិតកម្ម និងសម្ភារវត្ថុធាតុដើមព្រមទាំងផលិតផលសម្រេចទាំងអស់នៅក្នុងនោះផង ត្រូវព្រះអគ្គិលេបត្របាក់អស់ទាំងស្រុងកាល៦និង៤០នាទីល្ងាចថ្ងៃទី ១១ ខែកុម្ភៈ ឆ្នាំ២០២៥ ។
បើតាមនគរបាលខណ្ឌដង្កោបានប្រាប់ឲ្យដឹងថា អគាររោងចក្រកាត់ដេរខាងលើនោះ ជាប្រភេទសំណង់ថ្មប្រក់ស័ង្កសី ទំហំ ១០,០០០ម៉ែត្រការ៉េ ដែលមានម្ចាស់ ឈ្មោះYOO MIWOL ភេទស្រី អាយុ៥១ឆ្នាំ ជនជាតិកូរ៉េខាងត្បូង ហើយ១អគារនេះ មានកម្មករបម្រើការងារនៅក្នុងនោះជាង៤០០នាក់។ ប៉ុន្តែពុំមានកម្មករណាម្នាក់រងរបួស ឬស្លាប់នោះឡើយ ព្រោះខណៈនោះផុតម៉ោងធ្វើការទៅ ដែលហើយកម្មករនិយោជកទាំងអស់បានចាកចេញអស់ទៅហើយ ចំណែកមូលហេតុ នៃការឆាបឆេះនេះក៏មិនទាន់ត្រូវបានដឹងនៅឡើយ ដោយពេលនេះកំពុងស្ថិតនៅក្នុងដំណាក់កាលស្រាវជ្រាវ ។
នគរបាលបានប្រាប់ឲ្យដឹងបន្តទៀតថា ក្រោយពេលទទួលបានព័ត៌មាននេះ អាជ្ញាធរ និងសមត្ថកិច្ចបានចេញអន្តរាគមន៍ភ្លាមៗ ប៉ុន្តែភ្លើងឆេះលឿនខ្លាំងណាស់ លុះពេលទៅដល់ឃើញអគាររោងចក្រទាំងមូលរុំព័ទ្ធទៅដោយអណ្ដាតភ្លើងជុំជិត ដែលមើលទៅឃើញក្រហមឆ្អៅលាយឡំជាមួយផ្សែងឃ្មួលខ្មាញ់បាត់ទៅហើយ។ ពេលនោះ រថយន្តពន្លត់អគ្គិភ័យនៅតាមបណ្ដាអង្គភាព និងក្រុមហ៊ុននានាបានចេញទៅពន្លត់ជាបន្តបន្ទាប់ច្រើនគ្រឿង ដោយគិតត្រឹមវេលាម៉ោង២២និង៥០នាទីយប់ថ្ងៃខែឆ្នាំដដែល បានថមថយអណ្ដាតភ្លើង ប៉ុន្តែនៅតែឆេះហុយនៅឡើយ។ ប្រសិនបើមិនបានបន្តធ្វើសកម្មភាពពន្លត់បន្តនោះទេ ភ្លើងនិងឆេះខ្លាំងឡើងវិញ អាចនឹងរាលដល់ទីតាំងផ្សេងទៀតមិនខានឡើយ ហើយកម្លាំងជំនាញនៅតែបន្តពន្លត់ភ្លើងរហូតដល់វេលាថ្ងៃត្រង់ថ្ងៃទី១២ ខែកុម្ភៈ ឆ្នាំ២០២៥ កម្លាំងអាជ្ញាធរ និងសមត្ថកិច្ច ជាពិសេសក្រុមអ្នកពន្លត់ភ្លើង នៅតែបន្តស្ថិតនៅទីនោះ ដោយប្រើគ្រឿងចក្រកាយកម្ទេចកម្ទីរបំប៉ើងឡើងលើបណ្ដើរ បាញ់ទឹកពន្លត់បណ្ដើរជាបន្តបន្ទាប់ ។
នគរបាលខាងលើ បានប្រាប់ឲ្យដឹងបន្ថែមថា រថយន្តពន្លត់អគ្គិភ័យ ដែលធ្វើប្រតិបត្តិការពន្លត់ភ្លើងខាងលើនោះ គិតត្រឹមពីពេលចាប់ផ្ដើមឆេះរហូតដល់វេលាម៉ោង២២និង៥០នាទីយប់ថ្ងៃខែឆ្នាំដដែលនោះប៉ុណ្ណោះ រួមមាន រថយន្តពន្លត់អគ្គិភ័យការិយាល័យបង្ការពន្លត់ និងសង្គ្រោះអគ្គិភ័យ នៃស្នងការដ្ឋាននគរបាលរាជធានីភ្នំពេញ ចំនួន២១គ្រឿងប្រើប្រាស់ទឹកអស់ចំនួន១០៥រថយន្តស្មើនឹង ៤២០ម៉ែត្រគូប។ រថយន្តពន្លត់អគ្គិភ័យក្រសួងមហាផ្ទៃចំនួន០៤គ្រឿង ប្រើប្រាស់ទឹកអស់ចំនួន១២រថយន្ត ស្មើនឹង៧២ម៉ែត្រគូប។ រថយន្តពន្លត់អគ្គិភ័យកងរាជអាវុធហត្ថរាជធានីភ្នំពេញ ចំនួន០៣គ្រឿង ប្រើប្រាស់ទឹកអស់ចំនួន០៣រថយន្តស្មើនឹង ១២ម៉ែត្រគូប។ រថយន្តពន្លត់អគ្គិភ័យកងពលតូចលេខ៧០ ចំនួន ០៤គ្រឿង ប្រើប្រាស់ទឹកអស់ចំនួន០៦រថយន្ត ស្មើនឹង ៦០ម៉ែត្រគូប។ រថយន្តពន្លត់អគ្គិភ័យបញ្ជាការដ្ឋានកងពលតូចទ័ពពិសេសឆ័ត្រយោងលេខ៩១១ ចំនួន០២គ្រឿង ប្រើប្រាស់ទឹកអស់ចំនួន០៤រថយន្ត ស្មើនឹង២៤ម៉ែត្រគូប។ រថយន្តអគ្គិភ័យមណ្ឌលកែប្រែ (ម.១) មួយគ្រឿង ប្រើប្រាស់ទឹកអស់ចំនួន០២រថយន្តស្មើនឹង ១២ម៉ែត្រគូប។ រថយន្តអគ្គិភ័យក្រុមហ៊ុនស្រាបៀរកម្ពុជា០១គ្រឿង ប្រើប្រាស់ទឹកអស់ចំនួន០៤រថយន្តស្មើនឹង ២៤ម៉ែត្រគូប។ រថយន្តអគ្គិភ័យទីក្រុងកោះពេជ្រចំនួន០៣គ្រឿង ប្រើប្រាស់ទឹកអស់ចំនួន០៦រថយន្ត ស្មើនឹង ៤០ម៉ែត្រគូប ។ រថយន្តអគ្គិភ័យបុរីប៉េងហួត ចំនួន០២គ្រឿង ប្រើប្រាស់ទឹកអស់ចំនួន ០៤ឡាន ស្មើនឹង ២៤ម៉ែត្រគូប។ រថយន្តអគ្គិភ័យរបស់រោងចក្រចំនួន០២គ្រឿង ប្រើប្រាស់ទឹកអស់ចំនួន០៥រថយន្តស្មើនឹង៥០ម៉ែត្រគូប ។
នគរបាលបានបញ្ជាក់ប្រាប់ថា បើគិតមកដល់ថ្ងៃទី១២ ខែកុម្ភៈ នៅពុំទាន់ដឹងថា ត្រូវចំណាយទឹកអស់ប៉ុន្មានរថយន្ត និងប៉ុន្មានម៉ែត្រគូបបន្តទៀតនោះឡើយ ចំណែកអគាររោងចក្រខាងលើ ព្រមទាំងម៉ាស៊ីនសង្វាក់ផលិតកម្ម សម្ភារផ្សេង វត្ថុធាតុដើម និងផលិតផលសម្លៀកបំពាក់សម្រេចទាំងអស់ ត្រូវអគ្គិលេបត្របាក់អស់ទាំងស្រុងគ្មានសល់ ប៉ុន្តែមិនទាន់ដឹងថា គិតជាទឹកប្រាក់ប៉ុន្មាននៅឡើយទេ ។
សូមជម្រាបជូនផងដែរថា នៅក្នុងខែកុម្ភៈ ឆ្នាំ២០២៥នេះ ត្រឹមតែរយៈពេល៦ថ្ងៃប៉ុណ្ណោះ នៅក្នុងសង្កាត់ព្រៃស ខណ្ឌដង្កោ រាជធានីភ្នំពេញ បានកើតមានគ្រោះអគ្គិភ័យទ្រង់ទ្រាយធំ ចំនួន២លើកហើយ ដែលបានធ្វើឲ្យខាតបង់ប្រាប់រាប់សិបម៉ឺនដុល្លារ ថែមទាំងឆក់យកជីវិតមនុស្ស និងរងរបួសធ្ងន់ផងដែរ ។
គេនៅចាំបានថា កាលពីវេលាម៉ោង១០ និង៤៥នាទីព្រឹកថ្ងៃទី០៥ ខែកុម្ភៈ ឆ្នាំ២០២៥ ក្លិបកម្សាន្តរាត្រី«មីតណាយព្រីមៀរក្លិប»មានទីតាំងស្ថិតនៅតាមផ្លូវ៥០ម៉ែត្រ ជិតស្តុបឫស្សីផ្អែម ក្នុងភូមិប្រកា សង្កាត់ព្រៃស ខណ្ឌដង្កោ រាជាធានីភ្នំពេញ ត្រូវបានអគ្គិឆាបឆេះសន្ធោសន្ធៅ អស់ទាំងស្រុង។ ពេលនោះ ត្រូវបានសមត្ថកិច្ចរកឃើញថា ផ្ដើមចេញពីជាងផ្សាដែកហើយឆ្លងចរន្តអគ្គិសនី ដែលបានបង្កជាសោកនាដកម្ម បណ្ដាលឲ្យបុគ្គលិកបម្រើការងារនៅក្នុងក្លិបនោះចំនួន៤នាក់បានស្លាប់នៅក្នុងអណ្ដាតភ្លើង និងចំនួន៣នាក់ទៀត រងរបួសធ្ងន់ ហើយត្រូវបានបញ្ជូនទៅសង្គ្រោះនៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ។ ដោយឡែកលើកទី២ គឺករណីឆេះរោងចក្រកាត់ដេរហ្វ័រម៉ាត (ខេមបូឌា) ខូ អិលធីឌី ខាងលើនោះទៀត ថ្វីដ្បិតតែគ្មានមនុស្សរងគ្រោះ ប៉ុន្តែបានខាតបងប្រាក់រាប់សិបម៉ឺនដុល្លារ ហើយកម្មករជាង៤០០នាក់ ប្រឈមនឹងគ្មានការងារធ្វើមួយរយៈ ទំរាំមានការស្ដាររោងចក្រឡើងវិញបាន ៕
ចែករំលែកព័តមាននេះ