ខេត្តព្រៃវែង ៖ ប្រជាពលរដ្ឋ ដែលរស់នៅក្នុងទីប្រជុំជនអ្នកលឿង បានបង្ហាញ នូវការគាំទ្រជាខ្លាំង ចំពោះអាជ្ញាធរស្រុកពាមរក៍ និងកម្លាំងស្នងការដ្ឋាននគរបាលខេត្តព្រៃវែង ដែលបានចុះរៀបចំសណ្ដាប់ធ្នាប់ នៅក្នុងទីប្រជុំជនអ្នកលឿង…
ខេត្តព្រៃវែង ៖ ប្រជាពលរដ្ឋ ដែលរស់នៅក្នុងទីប្រជុំជនអ្នកលឿង បានបង្ហាញ នូវការគាំទ្រជាខ្លាំង ចំពោះអាជ្ញាធរស្រុកពាមរក៍ និងកម្លាំងស្នងការដ្ឋាននគរបាលខេត្តព្រៃវែង ដែលបានចុះរៀបចំសណ្ដាប់ធ្នាប់ នៅក្នុងទីប្រជុំជនអ្នកលឿង ធ្វើឲ្យទីប្រជុំជននេះ មានសណ្ដាប់ធ្នាប់ និងសោភណ្ឌភាព ល្អស្អាតជាងមុន ។
មន្ត្រីសាលាស្រុកពាមរក៍ បានឲ្យដឹងថា សកម្មភាពចុះរៀបចំសណ្ដាប់ធ្នាប់នេះ គឺធ្វើនៅតាមបណ្ដោយផ្លូវជាតិលេខ១១ និងផ្លូវជាតិលេខ១ ក្នុងទីប្រជុំជនអ្នកលឿង ជាពិសេស គឺតំបន់ផ្សារអ្នកលឿង តែម្ដង ដោយតម្រូវឲ្យក្រុមប្រជាពលរដ្ឋ ក៏ដូចជាអាជីវករ រុះរើរៀបចំសម្ភារៈរបស់ខ្លួន ខិតចូលទៅក្នុងផ្ទះ ឱ្យផុតពីចិញ្ចើមផ្លូវ និងកាត់សំយ៉ាបផ្ទះ ដែលតលយចូលមកលើចិញ្ចើមផ្លូវ ចោលអោយអស់ ដើម្បីទុកចិញ្ចើមផ្លូវឲ្យទូលាយ អាចឲ្យប្រជាពលរដ្ឋធ្វើដំណើរដោយថ្មើរជើងបាន ។
ប្រធានការិយាល័យសណ្ដាប់ធ្នាប់ នៃស្នងការដ្ឋាននគរបាលខេត្តព្រៃវែង បានអោយដឹងថា មុនពេលចុះមកអនុវត្ត នាពេលនេះ ទាំងខាងអាជ្ញាធរ ក៏ដូចជាខាងសមត្ថកិច្ច បានចុះមកធ្វើការអប់រំ ណែនាំ និងធ្វើកិច្ចសន្យា ជាមួយប្រជាពលរដ្ឋជាម្ចាស់ផ្ទះចំនួនពីរដង រួចមកហើយ ដោយតម្រូវឲ្យរុះរើ សម្ភារៈ និងកាត់សំយ៉ាបផ្ទះ ចេញដោយខ្លួនឯង ហើយជាក់ស្ដែងនៅពេលនេះ ឃើញថា មានប្រជាពលរដ្ឋជាច្រើន បានយល់ព្រមធ្វើតាមការណែនាំរបស់អាជ្ញាធរ និងសមត្ថកិច្ច ប៉ុន្តែក៏មានពលរដ្ឋមួយចំនួនតូច ហាក់នៅរឹងរុះ មិនព្រមធ្វើតាមកិច្ចសន្យារបស់ខ្លួនទេ។ ដូច្នេះ ទើបខាងគណៈកម្មការ ដែលមានទាំងអាជ្ញាធរស្រុក និងកម្លាំងសមត្ថកិច្ចស្រុកខេត្ត បានចុះធ្វើការរៀបចំនិងកាត់សំយាបជូនពួកគាត់តែម្ដង ។
ក្រៅពីចុះរៀបចំសម្រាប់ធ្នាប់ នៅតាមបណ្ដោយផ្លូវជាតិលេខ១១ និងផ្លូវជាតិលេខ១នេះ គណៈកម្មការ ដែលមានអាជ្ញាធរស្រុក និងកម្លាំងសមត្ថកិច្ចផងនោះ ក៏បានចុះរៀបចំនៅតាមផ្លូវបេតុង ជុំវិញផ្សារអ្នកលឿង ផងដែរ ដោយបានបើកផ្លូវទាំងនោះ ឲ្យធំទូលាយ នឹងធ្វើដំណើរបានស្រួលជាងមុន ហើយក៏ទទួលបាន នូវការគាំទ្រពីសំណាក់ប្រជាពលរដ្ឋយ៉ាងខ្លាំង ផងដែរ ។
ប៉ុន្តែទន្ទឹមនឹងនោះ ប្រជាពលរដ្ឋ ក៏បានស្នើសុំឲ្យគណៈកម្មការនេះ ចុះធ្វើការតាមដាននិងត្រួត ពិនិត្យឲ្យបានជាប់ជាប្រចាំ ពីព្រោះកន្លងមកធ្លាប់មានអាជីវករខ្លះ ដែលមានចរិតខិលខូច ពេលសមត្ថកិច្ចចុះដេញ នាំគ្នារើផុតពីផ្លូវ ដល់ពេលសមត្ថកិច្ចចេញបាត់ ពួកគាត់នាំគ្នាចេញមកលក់លើផ្លូវដដែល ជាពិសេស ផ្លូវបេតុងជុំវិញផ្សារអ្នកលឿង ដែលធ្វើឲ្យផ្លូវកាន់តែរួមតូច និងស្ទះជាប្រចាំ ៕
ចែករំលែកព័តមាននេះ