ទីក្រុងវ៉ាស៊ីនតោន៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បានជូនកាដូទៅលោកត្រាំនូវឧបករណ៍ផ្ញើសារផលិតពីមាសសុទ្ធនៅពេលលោកទាំង២ជួបគ្នានៅសេតវិមាន។ នេះបើយោងតាមការបង្ហើបឱ្យដឹងពីខុទ្ទកាល័យរបស់លោកណឺតាន់យ៉ាហ៊ូផ្ទាល់តែម្ដង។ សូមជម្រាបថាឧបករណ៍ផ្ញើសារនេះច្រើនប្រើប្រាស់កាលពីសម័យមុននៅពេលមិនទាន់មានបច្ចេកវិទ្យាទំនាក់ទំនងទំនើប។
ឧបករណ៍នេះត្រូវក្រុមហេសបូឡានៅប្រទេសលីបង់ប្រើប្រាស់នៅក្នុងទំនាក់ទំនងការងាររបស់ខ្លួន ហើយត្រូវភ្នាក់ងារសម្ងាត់អ៊ីស្រាអែលលួចបង្កប់គ្រឿងផ្ទុះនៅក្នុងនោះ និងចុចបំផ្ទុះពេញប្រទេសលីបង់កាលពីប៉ុន្មានខែមុន។ អំណោយដ៏ថ្លៃថ្លានេះចាត់ទុកជានិមិត្តរូបនៃកាលានុវត្តភាព (ឬចំណុចរបត់នៃព្រឹត្តិការណ៍) នៅក្នុងសង្គ្រាមប្រឆាំងនឹងក្រុមហេសបូឡា។
ខុទ្ទកាល័យរបស់លោកណឺតាន់យ៉ាហ៊ូបញ្ជាក់ថាការចុចបំផ្ទុះឧបករណ៍ផ្ញើសាររបស់ក្រុមហេសបូឡាកាលពីខែកញ្ញា ឆ្នាំ២០២៤នោះជាស្នាដៃរបស់អ៊ីស្រាអែល។ ខុទ្ទកាល័យថ្លែងបន្តទៀតថាករណីផ្ទុះឧបករណ៍ផ្ញើសារនៅក្នុងគ្រានោះជាការបង្ហាញអំពីចំណុចខ្លាំងរបស់អ៊ីស្រាអែលដែលអាចស៊ីរូងផ្ទៃក្នុងដល់កណ្ដាលបេះដូងរបស់ក្រុមហេសបូឡាតែម្ដង។ ដូច្នេះ អ៊ីស្រាអែលខ្លាំងទាំងផ្នែកចារកម្ម, ទាំងផ្នែកបច្ចេកវិទ្យា និងការបំភាន់ភ្នែក។
សូមរំលឹកថាការផ្ទុះឧបករណ៍ផ្ញើសារកាលនោះធ្វើឱ្យក្រុមហេសបូឡាភ្ញាក់ផ្អើលយ៉ាងខ្លាំងនៅពេលផ្ទុះយ៉ាងកងរំពងពេញផ្ទៃប្រទេសលីបង់ បណ្ដាលឱ្យស្លាប់មនុស្សរាប់សិបនាក់ និងរបួសរាប់ពាន់នាក់។ កាលពីចុងខែវិច្ឆិកា អ៊ីស្រាអែល និងហេសបូឡាយល់ព្រមឈប់បាញ់គ្នា ហើយបិទបញ្ចប់ការយកគ្នាជាសត្រូវរយៈពេលជាងមួយឆ្នាំ។ ប៉ុន្តែបញ្ហាមិនទាន់បញ្ចប់ត្រឹមហ្នឹងទេ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ