រាជធានីភ្នំពេញ ៖ ជនរងគ្រោះ រងរបួសចំនួន៥នាក់ ដែលបាននិងកំពុងសង្គ្រោះបន្ទាន់នៅមន្ទីរពេទ្យមិត្តភាពកម្ពុជា-ចិន (ពេទ្យលោកសង្ឃ)ក្នុងករណីអគ្គិភ័យឆេះក្លឹបកម្សាន្ដ «មីតណាយព្រីមៀរ» នៅខណ្ឌដង្កោ ដើម្បីជួយដោះស្រាយការលំបាកខ្វះខាត និងជាការយកចិត្តទុក្ខដាក់គិតគូពីសុខទុក្ខប្រជាពលរដ្ឋជារហូតមកនោះ…
រាជធានីភ្នំពេញ ៖ ជនរងគ្រោះ រងរបួសចំនួន៥នាក់ ដែលបាននិងកំពុងសង្គ្រោះបន្ទាន់នៅមន្ទីរពេទ្យមិត្តភាពកម្ពុជា-ចិន (ពេទ្យលោកសង្ឃ)ក្នុងករណីអគ្គិភ័យឆេះក្លឹបកម្សាន្ដ «មីតណាយព្រីមៀរ» នៅខណ្ឌដង្កោ ដើម្បីជួយដោះស្រាយការលំបាកខ្វះខាត និងជាការយកចិត្តទុក្ខដាក់គិតគូពីសុខទុក្ខប្រជាពលរដ្ឋជារហូតមកនោះ ជាក់ស្ដែង ថ្ងៃនេះ លោក ឃួង ស្រេង អភិបាលរាជធានីភ្នំពេញ និងលោកស្រី ជា ស៊ីណា ឃួង ស្រេង បានឧបត្ថម្ភថវិកាដល់អ្នករងរបួសទាំង៥នាក់ស្មើៗគ្នា ក្នុងម្នាក់២លានរៀល ។
ថវិកានេះ នៅល្ងាចថ្ងៃទី៥ កុម្ភៈ ២០២៥ ត្រូវបានលោក សុខ ពេញវុធ អភិបាលរងរាជធានីភ្នំពេញ ជាតំណាងលោក ឃួង ស្រេង អភិបាលរាជធានីភ្នំពេញ និងលោកស្រី អមដំណើរដោយលោកលោក ប៉ិច សុខឃឿន ចៅសង្កាត់ទឹកល្អក់ទី១ នាំយកទៅប្រគល់ជូនដល់ដៃក្រុមគ្រួសាររបស់ជនរងគ្រោះ នៅមន្ទីរពេទ្យមិត្តភាពកម្ពុជា-ចិន (ពេទ្យលោកសង្ឃ) តែម្តង ។
បើតាមលោក សុខ ពេញវុធ បានឲ្យដឹងថា ៖ លោកអភិបាល នៃគណៈអភិបាលរាជធានីភ្នំពេញ និងលោកស្រី ជា ស៊ីណា ឃួង ស្រេង បានចាត់ឱ្យលោក នាំយកអំណោយជាថវិកាមកប្រគល់ជូនជនរងគ្រោះចំនួន៥នាក់ ដែលរងរបួស ដោយអគ្គិភ័យឆេះរាងកាយ ក្នុងករណីអគ្គិភ័យឆេះក្លឹបកម្សាន្ដ «មីតណាយព្រីមៀរ» នៅខណ្ឌដង្កោ កាលពីព្រឹកថ្ងៃទី៥ ខែកុម្ភៈ ឆ្នាំ២០២៥ ដោយម្នាក់ៗ ទទួលបានថវិកាចំនួន២លានរៀល ។ ចំពោះអ្នកស្លា.ប់ចាំវគ្គក្រោយ ។
ជាមួយនិងការយកចិត្តទុកដាក់នេះដែរ នាព្រឹកថ្ងៃទី៥ ខែកុម្ភៈ ឆ្នាំ២០២៥ គឺខណៈពេលភ្លើងកំពុងឆាបឆេះក្លឹបយ៉ាងសន្ធោសន្ធៅនោះ លោក ឃួង ស្រេង ក៏បានចុះដឹកនាំបញ្ជាផ្ទាល់ដល់ទីតាំងកើតហេតុផងដែរ ដើម្បីធ្វើយ៉ាងណាសង្គ្រោះជនរងគ្រោះចេញពីភ្លើងឱ្យបានទាន់ពេល និងពន្លត់អគ្គិភ័យឱ្យបានលឿន ។
គួរបញ្ជាក់ថា ៖ ករណីអគ្គិភ័យឆេះ ក្លឹបកម្សាន្ដ មីតណាយព្រីមៀរ នៅខណ្ឌដង្កោ មានជនរងគ្រោះស្លា.ប់២នាក់ និងរងរបួសធ្ងន់ចំនួន០៥នាក់ កំពុងសង្គ្រោះបន្ទាន់នៅមន្ទីរពេទ្យមិត្តភាពកម្ពុជា-ចិន (ពេទ្យលោកសង្ឃ) ។ អ្នករងរបួសធ្ងន់ធ្ងរទាំង៥នាក់នេះ រួមមាន ៖
ទី១.ឈ្មោះ រី ប៊ុនធីម ភេទប្រុស អាយុ៣០ឆ្នាំ រលាក១០០%។
ទី២.ឈ្មោះ សាយ ភារា ភេទប្រុស អាយុ២៦ឆ្នាំ រលាក៦៥%។
ទី៣.ឈ្មោះ មួន មករា ភេទប្រុស អាយុ២១ឆ្នាំ រលាក១០០%។
ទី៤.ឈ្មោះ មិន រតនៈ ភេទប្រុស អាយុ៣៥ឆ្នាំ រលាក១០០%។
និងទី៥.ឈ្មោះ ថេង ថៃ ភេទប្រុស អាយុ២០ឆ្នាំ រលាក៣០% ។
សូមបញ្ជាក់ផងដែរថា ករណីអគ្គិភ័យនេះបានកើតឡើងនាវេលាម៉ោង១០និង៣០នាទីព្រឹក ថ្ងៃទី៥ ខែកុម្ភៈ ឆ្នាំ២០២៥ នៅតាមបណ្ដោយផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុមានជាងផ្សារដែកបានចូលទៅផ្សារជួសជុលនៅខាងក្នុង លុះមកដល់វេលាកើតហេតុស្រាប់តែឆាបឆេះយ៉ាងសន្ធោសន្ធៅ បង្កការភ្ញាក់ផ្អើលដល់ប្រជាលរដ្ឋរាយការណ៍ទៅសមត្ថកិច្ចចុះមកអន្តរាគមន៍ភ្លាមៗ ។
ក្លឹបកម្សាន្តខាងលើមានយីហៅ មីតណាយព្រីមៀរក្លឹប មានទំហំ ៣៥ម៉ែត្រ គុណ៤០ម៉ែត្រ ឆេះខូចខាតសម្ភារៈក្នុងក្លឹបអស់ទាំងស្រុង និងម៉ូតូ ៥គ្រឿង និងរាលដាលដល់បន្ទប់ផ្ទះសំណាក់ទំហំ ៣,៥ម៉ែត្រ គុណ ០៥ម៉ែត្រ ចំនួន១បន្ទប់ ។ ក្នុងប្រតិបត្តិការអន្តរាគមន៍ សង្គ្រោះ កម្លាំងសមត្ថកិច្ចជំនាញបានប្រើពេលប្រមាណ ៣ម៉ោង និងបានប្រើប្រាស់ទឹកអស់ចំនួន៥០ឡាន ស្មើនឹង១៦០ម៉ែត្រគូប ៕
ចែករំលែកព័តមាននេះ