រាជធានីភ្នំពេញ ៖ ក្នុងពេលដែលរឿងរ៉ាវដ៏ក្តៅគគុក ពាក់ព័ន្ធទៅការទម្លាយរឿងរ៉ាវជាសាធារណៈរបស់តារាសម្តែងជាបន្តបន្ទាប់ ពាក់ព័ន្ធផលិតករ ឬម្ចាស់ផលិតកម្មមួយចំនួនជំពាក់លុយ និងមិនបើកលុយឲ្យតួសម្តែងនោះ អតីតផលិតករជើងចាស់មួយរូប ក៏បានចេញមកទម្លាយពាក្យសម្តីរបស់ម្ចាស់ផលិតកម្មមួយដែលស្តាប់ហើយហួសចិត្ត ។…
រាជធានីភ្នំពេញ ៖ ក្នុងពេលដែលរឿងរ៉ាវដ៏ក្តៅគគុក ពាក់ព័ន្ធទៅការទម្លាយរឿងរ៉ាវជាសាធារណៈរបស់តារាសម្តែងជាបន្តបន្ទាប់ ពាក់ព័ន្ធផលិតករ ឬម្ចាស់ផលិតកម្មមួយចំនួនជំពាក់លុយ និងមិនបើកលុយឲ្យតួសម្តែងនោះ អតីតផលិតករជើងចាស់មួយរូប ក៏បានចេញមកទម្លាយពាក្យសម្តីរបស់ម្ចាស់ផលិតកម្មមួយដែលស្តាប់ហើយហួសចិត្ត ។
«តើរាល់ថ្ងៃហ្នឹងចាំតែលុយហ្នឹងទេអី?» ។ នេះជាពាក្យសម្តីដែលធ្លាប់បាននិយាយនៅចំពោះមុខអតីតផលិតករ គង់ ច័ន្ទរិទ្ធី ខណៈពេលដែលពាក្យសម្តីមួយនេះបានធ្វើឲ្យលោកមានការហួសចិត្តយ៉ាងខ្លាំង ក្នុងពេលដែលលោកចាត់ទុកពាក្យថា នេះជាលេស ដើម្បីគេចវេសពីការដោះស្រាយបញ្ហា ។
តាមរយៈការខមមិននៅពីក្រោមសំណេរដែលបានបង្ហោះដោយតារាសម្តែងអ្នកនាង ទូច ស៊ីណាត ដែលបានលើកឡើងថា សិល្បករជួបបញ្ហាច្រើនណាស់ តែគ្មានអ្នកអើពើសោះ ហ៊ឺ រស់នៅដូចគ្មានម៉ែឪគ្រប់គ្រងនោះ លោក គង់ ច័ន្ទរិទ្ធី ក៏បានចូលទៅសរសេរថា ពាក់ព័ន្ធនឹងវិស័យសិល្បៈវីដេអូនេះ ក្នុងនាមខ្ញុំជាអតីតចាងហ្វាងផលិតកម្ម -ផលិតករ និងអ្នកដឹកនាំរឿងគឺមិនចង់និយាយវែងឆ្ងាយទេ ព្រោះថាសម្តីនិយាយលើកឡើងពីតារាសម្តែងទាំងអស់នេះ សុទ្ធតែពាក្យពិត ដែលមានផលិតករ និងផលិតកម្មមួយចំនួនបានពោលពាក្យដូចគាត់និយាយពិតមែន ដោយយកលេសនេះលេសនោះ មកដោះស្រាយជាមួយតារាសម្ដែង ។
លោកបញ្ជាក់ថា ភាពកេងប្រវ័ញ្ចលើកម្លាំងពលកម្ម និងញើសឈាមរបស់តារាសម្ដែង និងក្រុមការងារផលិតពីបណ្ដាផលិតករ និងផលិតកម្មមួយចំនួន ដែលខ្ញុំបានសង្កេតឃើញរយៈកាលកន្លងមកនេះ គឺតែងតែមានបញ្ហាជាមួយតារាសម្ដែងនិងក្រុមផលិតផងដែរ ។ លោកថា និយាយចំទៅ មានផលិតករនិងផលិតកម្មមួយដែលខ្ញុំមិនបញ្ចេញឈ្មោះបាននិយាយចំពោះមុខខ្ញុំថា «តើរាល់ថ្ងៃហ្នឹង ចាំតែលុយហ្នឹងទេអី?»។
បើតាមលោកគង់ ច័ន្ទរិទ្ធី ថា ខ្ញុំមានទស្សនៈមួយដល់ផលិតករ និងផលិតកម្មមួយចំនួនមេត្តាយល់ថា បើគ្មានក្រុមតារាសម្ដែង និងក្រុមការងារផលិតទេ ការផលិតខ្សែវីដេអូរឿងរបស់អស់លោកផលិតករ ក៏មិនអាចដំណើរការទៅបានដែរ ។ ដូច្នេះ សូមអស់លោកផលិតករ និងផលិតកម្មមួយចំនួនដែលពាក់ព័ន្ធនឹងការកេងប្រវ័ញ្ចកម្លាំងពលកម្មរបស់តារាសម្ដែង និងក្រុមផលិតគួរពិចារណាឡើងវិញ។
លោកបន្ថែមថា ទស្សនៈដែលខ្ញុំបានលើកឡើងនេះ សូមបណ្ដាផលិតកម្មនិងផលិតករមួយចំនួនដែលមានស្មារតីយោគយល់គោរពដល់តម្លៃរបស់តួសម្ដែង និងក្រុមការងារសូមអធ្យាស្រ័យខ្ញុំមិនបាននិយាយប៉ះពាល់ដល់អស់លោកទេ។ ខ្ញុំនិយាយតែផលិតកម្មឬផលិតករណាដែលកេងប្រវ័ញ្ចលើកម្លាំងពលកម្មរបស់ក្រុមការងារ និងតារាសម្ដែងតែប៉ុណ្ណោះ។សូមអធ្យាស្រ័យ តាមការគួរ ។
ជាការកត់សម្គាល់ រហូតមកទល់នាពេលនេះ មានអ្នកសិល្បៈជាបន្តបន្ទាប់បានសម្រេចទម្លាយរឿងរ៉ាវដ៏រសើបដែលបានកើតមានឡើងពាក់ព័ន្ធផលិតករមួយចំនួនបានកេងប្រវ័ញ្ច និងមិនព្រមបើកលុយគ្រប់ក្រោយការសម្តែងរួច ។
ពួកគេម្នាក់ៗក៏បានស្នើសុំដល់ស្ថាប័នពាក់ព័ន្ធ ជាពិសេស សមាគមសិល្បករខ្មែរឲ្យចេញមុខជួយដោះស្រាយ ក្នុងពេលដែលរឿងរ៉ាវនេះ ក៏មានអ្នកសិល្បៈមួយចំនួនបានជូនដំណឹងទៅសមាគមរួចហើយ ប៉ុន្តែនៅមិនទាន់មានដំណឹងឆ្លើយតបជាវិជ្ជមានណាមួយនៅឡើយទេ ៕
ចែករំលែកព័តមាននេះ