មន្ត្រីជាន់ខ្ពស់ក្រសួងធនធានទឹក ដឹកនាំក្រុមបច្ចេកទេស ចុះពិនិត្យការងារនាំទឹកពីស្ទឹងព្រែកត្នោតបញ្ជូនមកកាន់អាងទឹកទន្លេបាទី ក្នុងខេត្តតាកែវ
ខេត្តតាកែវ ៖ នៅថ្ងៃពុធ ទី២២ ខែមករា ឆ្នាំ២០២៥នេះ ឯកឧត្តម ចាន់ ស៊ីណាត រដ្ឋលេខាធិការ…
ខេត្តតាកែវ ៖ នៅថ្ងៃពុធ ទី២២ ខែមករា ឆ្នាំ២០២៥នេះ ឯកឧត្តម ចាន់ ស៊ីណាត រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានអញ្ជើញដឹកនាំក្រុមការងារបច្ចេកទេសក្រសួង ចុះត្រួតពិនិត្យការងារនាំទឹកពីតំបន់ខាងលើស្ទឹងព្រែកត្នោតមកផ្គត់ផ្គង់ឱ្យតំបន់ទន្លេបាទី ក្នុងភូមិសាស្ត្រខេត្តកណ្តាល និងខេត្តតាកែវ ។
ឯកឧត្តមរដ្ឋលេខាធិការ បានបញ្ជាក់ឱ្យដឹងថា ការនាំទឹកមកកាន់តំបន់ទន្លេបាទី គឺដើម្បីយកទៅជួយសង្គ្រោះស្រូវប្រាំងរបស់ប្រជាកសិករ ដែលកំពុងប្រឈមនឹងការខ្វះខាតទឹក ស្រោចស្រព ប្រមាណ៤ពាន់ហិកតា នៅតាមបណ្តាឃុំមួយចំនួន ក្នុងភូមិសាស្ត្រស្រុកបាទី ខេត្តតាកែវ ។
សូមបញ្ជាក់ថា កាលពីថ្ងៃទី២១ ខែមករា ឆ្នាំ២០២៥ ក្នុងឱកាសជួបជាមួយប្រជាពលរដ្ឋក្នុងឃុំកណ្ដឹង ស្រុកបាទី ខេត្តតាកែវ ឯកឧត្តមរដ្ឋមន្ត្រី ថោ ជេដ្ឋា បានចាត់ឱ្យក្រុមការងារបច្ចេកទេសក្រសួងធនធានទឹក និងឧតុនិយម ដើម្បីរៀបចំបូមទឹកពីស្ទឹងព្រែកត្នោតបញ្ជូនចូលក្នុងអាងទឹកទន្លេបាទី ហើយបញ្ជូនបន្តតាមប្រឡាយមេហនុមាន ដើម្បីទៅស្រោចស្រពផ្ទៃដីស្រូវប្រាំង ដែលកំពុងខ្វះខាតទឹក សំដៅជួយដោះបញ្ហាប្រឈមចំពោះមុខរបស់ប្រជាកសិករ ៕
ចែករំលែកព័តមាននេះ