រាជធានីភ្នំពេញ ៖ លោកសាន សុវណ្ណឌឿន បានបង្ហាញក្តីរីករាយឡើងវិញ បន្ទាប់ពីទីផ្សារចាប៉ីដងវែងរបស់លោក ហាក់ងើបឡើងវិញសម្រាប់ដើមឆ្នាំថ្មីនេះ ក្នុងពេលដែលរយៈពេលប៉ុន្មានឆ្នាំចុងក្រោយ អាជីពរបស់លោកមួយនេះ ហាក់នៅទ្រឹងស្ទើរដាច់បាយ…
រាជធានីភ្នំពេញ ៖ លោកសាន សុវណ្ណឌឿន បានបង្ហាញក្តីរីករាយឡើងវិញ បន្ទាប់ពីទីផ្សារចាប៉ីដងវែងរបស់លោក ហាក់ងើបឡើងវិញសម្រាប់ដើមឆ្នាំថ្មីនេះ ក្នុងពេលដែលរយៈពេលប៉ុន្មានឆ្នាំចុងក្រោយ អាជីពរបស់លោកមួយនេះ ហាក់នៅទ្រឹងស្ទើរដាច់បាយ ។
ជាអ្នកស្នងចាប៉ីដងវែងពីព្រឹទ្ធាចារ្យជើងចាស់ លោក សាន សុវណ្ណឌឿន នៅតែអាចរក្សាអាជីពចាប៉ីដងវែងរបស់ខ្លួនជាប់មកដល់បច្ចុប្បន្ន បើទោះបីជាអាជីពសិល្បៈបុរាណមួយនេះ ហាក់មានទីផ្សារនៅចង្អៀត និងមិនសូវមានការគាំទ្រច្រើនពីយុវជនសម័យថ្មីនេះក៏ដោយ ។
យ៉ាងណា សម្រាប់ដើមឆ្នាំថ្មីនេះ អាជីពចាប៉ីដងវែងរបស់លោកបានកម្រើកទីផ្សារឡើងវិញ ពោលរហូតមកទល់នាពេលនេះ លោកបានចេញសម្តែងនៅក្នុងកម្មវិធីនានាជាបន្តបន្ទាប់ ។
ថ្លែងប្រាប់កោះសន្តិភាពតាមសារអេឡិចត្រូនិច លោក សាន សុវណ្ណឌឿន បានលើកឡើងថា បច្ចុប្បន្នលោកត្រូវបានគេជួលឲ្យទៅសម្តែងក្នុងចន្លោះពី៥ទៅ៨រោងហើយ ហើយក៏នៅមានរោងជាបន្តបន្ទាប់ទៀតផងដែរ ។
លោកបន្តថា ការសម្តែងរបស់លោក គឺភាគច្រើនជាកម្មវិធីបុណ្យ ហើយបន្ទាប់មក ក៏មានកម្មវិធីមង្គលការ កម្មវិធីឡើងផ្ទះ ជប់លៀងខួបកំណើត ថតប្រម៉ូដលក់ដី លក់ម្ហូបអារហារ ហើយនៅក្នុងនោះ ក៏មានទទួលថតជីវប្រវត្តិខ្លីៗផងដែរ ។
លោកបញ្ជាក់ថា ទីផ្សារសម្តែងរបស់លោកបើប្រៀបធៀបមុនជំងឺកូវីដគឺតិចជាងមុន តែបើនិយាយពីក្រោយកូវីដ គឺអាចនិយាយបានថា ច្រើនគួរសម ខណៈពេលដែលក្នុងយុគសម័យបច្ចេកវិទ្យានានេះលោកអាចរៀបចំរកទីផ្សារបានដោយខ្លួនឯង ព្រោះយើងមានបណ្តាញសង្គមនៅក្នុងដៃ ។
ដោយឡែក ពាក់ព័ន្ធតម្លៃពីការសម្តែងវិញលោក សាន សុវណ្ណឌឿន បានលើកឡើងថា បើសិនជួលលោកសម្តែងនៅភ្នំពេញ គឺមានតំលៃម្នាក់៣៥០$ ហើយបើនៅខេត្តជិតៗម្នាក់៤៥០$ តែបើនៅខេត្តរាងឆ្ងាយអាចលើសនឹងតិចតួច នេះតំលៃច្រៀងកម្មវិធី តែបើថតពីជីវប្រវត្តិគឺត្រូវមើលតាមអត្ថបទវែងឬខ្លី ។
លោកបញ្ជាក់ថា សម្រាប់ការសម្តែងតាមទូរទស្សន៍ក៏មានការសម្តែងនៅទូរទស្សន៍ជាតិ និងCTN តែបច្ចុប្បន្ន វាងាយស្រួលទេ ព្រោះយើងអាចបង្ហាញសមត្ថភាពបានច្រើន ដោយសារយើងមានបណ្តាញសង្គមនៅក្នុងដៃសំខាន់ចេះប្រើឲមានប្រយោជន៍សម្រាប់ខ្លួនឯង ។
បើតាមលោកសាន សុវណ្ណឌឿន លោកសូមលើកទឹកចិត្តដល់ក្មេងៗឲ្យផលិតវីឌីអូឲ្យបានច្រើនតាមប្រព័ន្ធ បណ្តាញសង្គម ព្រោះយូរទៅគង់តែល្បី និងទីផ្សារ ដោយមិនពិបាក ព្រោះកាលពីមុនវារៀងពិបាករឿងរកទីផ្សារដោយសារប្រពន្ធ័ផ្សព្វផ្សាយមានតែវិទ្យុ និងទូរទស្សន៍ ៕
ចែករំលែកព័តមាននេះ