រាធានីភ្នំពេញ ៖ លោកវរសេនីយ៍ឯក ហុង ពិសិដ្ឋ អធិការនគរបាលខណ្ឌកំបូល ប្រាប់សិស្សសាលា «ពិភពបញ្ញា» ថា ជួបគ្នាថ្ងៃនេះគឺជាសិស្សសាលានិងប៉ូលិស…
រាធានីភ្នំពេញ ៖ លោកវរសេនីយ៍ឯក ហុង ពិសិដ្ឋ អធិការនគរបាលខណ្ឌកំបូល ប្រាប់សិស្សសាលា «ពិភពបញ្ញា» ថា ជួបគ្នាថ្ងៃនេះគឺជាសិស្សសាលានិងប៉ូលិស ឬ គឺជាពូនិងក្មួយ ប៉ុន្តែបើថ្ងៃក្រោយក្មួយណាក្លាយទៅជាក្មេងទំនើង ឬសេពនិងជួញដូរគ្រឿងញៀននោះ គឺជាជនសង្ស័យហើយ លែងជាពូ និងក្មួយទៀតហើ ពេលនោះពូត្រូវតែបង្ក្រាបមិនលើកលែងទេ។
ការលើកឡើងបែបនេះនៅក្នុងពេលដែលលោកអធិការ ដឹកនាំមន្ត្រីក្រោមឱវាទ នៃអធិការដ្ឋានខណ្ឌកំបូលចុះទៅធ្វើការផ្សព្វផ្សាយអំពីផលប៉ះពាល់ នៃការប្រើប្រាស់គ្រឿងញៀន ច្បាប់ចរាចរណ៍ផ្លូវគោក ជាពិសេសបញ្ហាក្មេងទំនើង ព្រមទាំងបញ្ហាជាច្រើនទៀតដល់សិស្សសាលាខាងលើ ។
ពិធីនោះបានធ្វើឡើងនៅព្រឹកថ្ងៃទី៣០ ខែធ្នូ ឆ្នាំ២០២៤ នៅក្នុងសាលាពពិភពបញ្ញា ដែលមានទីតាំងស្ថិតនៅក្នុងភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ ។ ដោយមានការចូលរួមលោក លោកស្រី ដែលជាអធិការរង ទទួលផែនសេនាធិការផែនប្រឆាំងបទល្មើសគ្រឿងញៀន ផែនសណ្ដាប់ធ្នាប់ចរាចរណ៍។ ផែនអន្តរាគមន៍ លោក នាយប៉ុស្តិ៍នគរបាលរដ្ឋបាលកំបូល មន្ត្រីក្រុមប្រឹក្សា សង្កាត់កំបូល ព្រមទាំងលោកគ្រូអ្នកគ្រូ សាលាព និងសិស្សានុសិស្ស សរុបចំនួន១៩៨នាក់ ស្រីចំនួន១០៤នាក់។ ដោយបាននាំយកស្លាយ ចាក់បញ្ចាំងនៅវីដេអូឃ្លីប ក្រុមក្មេងទំនើងចំនួន៧នាក់ ដែលទើបបង្ក្រាបបានចុងក្រោយ ឲ្យសិស្សសាលាខាងលើទស្សនាផងដែរ ដើម្បីកុំឲ្យយកតម្រាប់តាម ។
លោកវរសេនីយ៍ឯក ហុង ពិសិដ្ឋ អធិការ នៃអធិការដ្ឋាននគរបាលខណ្ឌកំបូល បានថ្លែងទៅកាន់សិស្សទាំងអស់ថា បច្ចុប្បន្នក្មេងទំនើងគឺជាបញ្ហាក្ដៅគគុកមួយដែលប្រមុខរាជរដ្ឋាភិបាលសម្ដេចមហាបវរធិបតីហ៊ុន ម៉ាណែត ដាក់ចេញនៅបទបញ្ជាយ៉ាងម៉ឺងម៉ាត់ឲ្យបង្ក្រាបឲ្យអស់ ។ ស្របពេលនេះដែរ អធិការដ្ឋាននគរបាលខណ្ឌកំបូលបានស្រាវជ្រាវរហូតឈានដល់ការបង្ក្រាបនិងឃាត់ខ្លួនក្រុមក្មេងទំនើងនៅក្នុងមូលដ្ឋានរបស់ខ្លួនបានជាបន្តបន្ទាប់ច្រើនករណី ច្រើនក្រុមរួចមកហើយ ។ ក្រៅពីនេះដោយអនុវត្តតាមផែនការដឹកនាំរបស់ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ អធិការ ដ្ឋាននគរបាលខណ្ឌកំបូល បានចុះធ្វើការផ្សព្វផ្សាយជាបន្តបន្ទាប់នៅតាមសាលារៀនរដ្ឋនិងឯកជនព្រមទាំងតាមបណ្ដាភូមិ ទីប្រជុំជនរបស់សង្កាត់នានាទូទាំងខណ្ឌកំបូល ស្ដីពីផលប៉ះពាល់ នៃការប្រើប្រាស់គ្រឿងញៀន ច្បាប់ចរាចរណ៍ផ្លូវគោក ជាពិសេសបញ្ហាក្មេងទំនើងតែម្ដង ព្រមទាំងបញ្ហាផ្សេងៗជាច្រើនទៀតផងដែរ ។
ដោយឡែកនៅក្នុងពេលចាក់បញ្ចាំងស្លាយស្ដីពីការបង្ក្រាបក្រុមក្មេងទំនើងនោះ លោកអធិការក៏បានណែនាំកុំដល់សិស្សសាលាខាងលើកុំយកគំរូតាមបង្កើតបក្សពួក តាំងខ្លួនជាក្មេងទំនើង ឬ ក្រុមបងធំ សេពឬជួញដូរគ្រឿងញៀនឲ្យសោះ ។ លោកក៏បានណែនាំឲ្យសិស្សគោរពច្បាប់ចរាចេកុំបើកបរលឿនហួសហេតុពេកដែលនាំឲ្យមានគ្រោះថ្នាក់ដល់ជីវិត របួសពិការបាត់បង់អនាគត ចូរខិតខំសិក្សារៀនសូត្រ ស្ដាប់ដំបូន្មានឪពុកម្ដាយ អាណាព្យាបាល លោកគ្រូ អ្នកគ្រូ ឲ្យបានខ្ជាប់ខ្ជួន ធ្វើយ៉ាងណាឲ្យក្លាយខ្លួនជាូនល្អ និងសិស្សល្អ គំរូល្អក្នុងសង្គមជាតិយើង ។
លោកអធិការក៏បានឲ្យលេខទូរស័ព្ទរបស់លោកដែលតេឡេក្រាមទៅកាន់សិស្សទាំងអស់ ដើម្បីរាយការណ៍នៅពេលមានគ្រោះអគ្គិភ័យកើតឡើង ឬ មានការគម្រាមកំហែងពីជនណាម្នាក់ ដើម្បីលោកដឹកនាំបញ្ជាកម្លាំងជួយអន្តរាគមន៍បានទាន់ពេលវេលា ។ លោកក៏បានសំណូមពរដល់មាតាបិតាអាណាព្យាបាលសិស្សគាំទ្រដល់ចំណាត់ការរបស់រាជរដ្ឋាភិបាល ក្នុងការបង្ក្រាបក្មេងទំនងនេះ ដើម្បីភាពសុខសាន្តរបស់យើងទាំងអស់គ្នា ។ បន្ទាប់មកលោកក៏បានអនុញ្ញាតឲ្យលោក លោកស្រី ដែលជាអធិការរងនគរបាលទទួលផែននីមួយៗ ឡើងផ្សព្វផ្សាយរាល់ផលប៉ះពាល់នៃការប្រើប្រាស់គ្រឿងញៀន ច្បាប់ចរាចរណ៍ផ្លូវគោក ជាពិសេសបញ្ហាក្មេងទំនើង ដល់សិស្សានុសិស្ស នៃសាលាពិភពបញ្ញានោះផងដែរ ៕
ចែករំលែកព័តមាននេះ